¿Mi oy ta melel li Diose?
Li kʼusi chal Vivliae
Li Vivliae chakʼbutik sprevailtak ti jamal xvinaj ti oy ta melel li Diose. Jech xtok, chalbutik ti sventa jchʼuntik ti oy Diose skʼan ‹xijtojobutik ta snopel›, maʼuk noʼox ti naka jchʼuntik kʼusi chal li relijionetike (1 Juan 5:20; Romanos 12:1). Jkʼelbetik junantik sprevailtak ta Vivlia ti chakʼ ta ilel ti oy li Diose.
Ti lek xcholet pasbil li vinajel balumile xchiʼuk ti oy kuxlejale, chakʼ ta ilel ti oy buchʼu la spase. Xi chal li Vivliae: «Oy buchʼu svaʼanoj li jujupʼej nae, pe jaʼ spasoj Dios skotol li kʼusitik oye» (Ebreos 3:4). Akʼo me kʼun ta aʼiel li kʼusi chal li tekstoe, pe epal krixchanoetik ti lek chanunajemike vokol chaʼiik ta chʼunel. a
Li krixchanoutike stalel onoʼox ti ta jkʼantik ti oyuk sbalil li jkuxlejaltike. Pe maʼuk noʼox ta jkʼantik li kʼusi chtun yuʼun jpat jxokontike, yuʼun ‹chtun kuʼuntik li beiltasel chakʼ Diose›, jech kʼuchaʼal chal Vivliae. Jaʼ xkaltik, ti oy ta koʼontontik yojtikinel xchiʼuk yichʼel ta mukʼ li Diose (Mateo 5:3; Apokalipsis 4:11). Ti jech oy ta koʼontontik taje, chakʼ ta ilel ti oy jun Dios ti snaʼ xkʼanvane, ti la spasutik sventa oyuk ta koʼontontik ta jsaʼtik li kʼusitik ta mantale xchiʼuk ti xijmuyubaje (Mateo 4:4).
Epal albil kʼopetik ta Vivliae jech tajek kʼotanuk ta pasel akʼo mi voʼne xa yaloj tal. Kʼalal jech tajek kʼotanuk ta pasel li albil kʼopetike, chakʼ ta ilel ti maʼuk snopben krixchano li Vivliae (2 Pedro 1:21).
Li buchʼutik la stsʼibaik li Vivliae snabeik van skʼoplal jutuk siensia li ta skʼakʼalilike. Junantik voʼne jnaklejetike xchʼunojik toʼox ti kuchbil ta jkot elefante li balumile, ta jkot jabalí, ta jkot tot vakax o ta yan chonbolom. Pe li Vivliae chal ti Diose «muʼyuk kʼusi la stʼuyan-o li balumile» (Job 26:7). Jech xtok, kʼalal chalbe skʼoplal balumil li Vivliae ‹volvol› xi (Isaias 40:22). Ep buchʼutik chkʼot ta nopel yuʼunik ti jaʼ akʼbil snaʼik yuʼun Dios li kʼusi la stsʼibaik li jtsʼibajometik ta Vivliae, yuʼun lek xchapet chalbeik smelolal li kʼu yelan oy li balumile.
Li Vivliae tstakʼ li kʼusitik tsjakʼbe sbaik li buchʼutik mu xchʼunik ti oy Diose, jech kʼuchaʼal: Mi lek yoʼonton xchiʼuk skotol xuʼ yuʼun li Diose, ¿kʼu yuʼun ti oy choplejal xchiʼuk vokolile? ¿Kʼu yuʼun yakʼoj tajek vokolil li relijionetike? (Tito 1:16). Li kʼusi chal Vivlia ta sventa taje xchiʼuk li kʼusi yan tsjakʼbe sbaike, xuʼ xkoltaatik-o sventa xchʼunik ta stojolal Dios.
a Jun skʼelobile, sventa li vinajel balumile, li Allan Sandage ti chchanbe skʼoplal kʼanaletike (astrónomo) xi laj yale: «Kʼalal chkil ti lek xcholet li kʼusitik oy ta vinajel balumile, ta jnop ti mu ta jechuk noʼox tale. Ti oy buchʼu lek xcholoje. Mu stakʼ nabel skʼoplal li Diose. Pe kʼalal chkiltik skotol li kʼusitik oye, mu xuʼ xkaltik ti ta jech noʼox tal stuke».
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Kʼuxi xuʼ xkamigointik li Diose?
Oy vuktos kʼusi skʼan xapas sventa xavamigoin li Diose.
