¿Kʼusi jaʼ li mukʼta tsatsal vokolile?

CHICHʼ TIJEL TA

Li kʼusi chal Vivliae

Li mukʼta tsatsal vokolile jaʼ li vokolil ti muʼyuk bu jech yiloj˗o li krixchanoetike. Jech kʼuchaʼal chal li albil kʼopetik ta Vivliae, jaʼo chkʼot ta pasel «li ta slajebal xa kʼakʼale» o li ta «slajebale» (2 Timoteo 3:1; Daniel 12:4). Xi chal Markos 13:19: «Li vaʼ kʼakʼale, jaʼ skʼakʼalil tsatsal vokolil ti muʼyuk bu jech kʼotem-o ta pasel kʼalal lik spas balumil li Dios kʼalal to avie, mi jaʼuk chtal yan velta xtok» (Daniel 12:1; Mateo 24:21, 22).

¿Kʼusi chkʼot ta pasel li ta mukʼta tsatsal vokolile?

Chichʼ lajesel li jecheʼ relijione. Ta anil noʼox chichʼ lajesbel skʼoplal li jecheʼ relijione (Apokalipsis 17:1, 5; 18:9, 10, 21). Taje jaʼ tspas li Naciones Unidas ti te skʼoplal li ajvaliletike. Kʼalal jech tspase, jaʼ me yakal tspasik li kʼusi oy ta yoʼonton Diose (Apokalipsis 17:3, 15-18). a
Chichʼ tsakel ta kʼop li melel relijione. Li Esekiele akʼbat yil yuʼun Dios ti «li Gog ta yosilal Magogue», jaʼ xkaltik, jtsop jteklumetik ti tspas ta jmoj sjolike, chakʼik persa sventa slajesbeik skʼoplal li melel relijione. Pe li Diose muʼyuk chakʼ ti slajesbeik skʼoplal li steklumale (Esekiel 38:1, 2, 9-12, 18-23).
Chichʼ chapanel li krixchanoetike. Jaʼ chchapanvan li Jesuse xchiʼuk «chchʼak li krixchanoetik jech kʼuchaʼal chchʼak lokʼel xchij ta stojolal tentsunetik li jchabichije» (Mateo 25:31-33). Li kʼusi tstsak ta venta kʼalal chchapan jun krixchanoe jaʼ mi la skolta li yermanotak Kristoe, jaʼ xkaltik, li buchʼutik ch˗ajvalilajik xchiʼuk ta vinajele (Mateo 25:34-46).
Ta xichʼik tsobel li buchʼutik ch˗ajvalilajik xchiʼuk Jesus li ta Ajvalilal yuʼun Diose. Skotol li yajtuneltak Dios ti tukʼ laj yakʼ sbaik xchiʼuk ti laj yichʼik tʼujel sventa x˗ajvalilajik xchiʼuk Kristoe ta xchamik, vaʼun ta xichʼik chaʼkuxesel ta vinajel (Mateo 24:31; 1 Korintios 15:50-53; 1 Tesalonisenses 4:15-17).
Chtal li Armajedone. Li ta Vivliae, li Armajedone xi chichʼ albel skʼoplal xtoke: «paskʼop ta smukʼta kʼakʼalil Dios ti jaʼ li Buchʼu skotol xuʼ yuʼune» xchiʼuk «li skʼakʼalil Jeovae» (Apokalipsis 16:14, 16; Isaias 13:9; 2 Pedro 3:12). Li ta paskʼop liʼe chichʼik lajesel skotol li buchʼutik chal Kristo ti oy smulike (Sofonias 1:18; 2 Tesalonisenses 1:6-10). Jech xtok, chichʼ lajesbel skʼoplal li politika ta spʼejel balumile ti jaʼ skʼoplal li jtiʼvanej chonbolom ti vukpʼej sjol chal ta Vivliae (Apokalipsis 19:19-21).

¿Kʼusi chkʼot ta pasel mi echʼ xa ox li mukʼta tsatsal vokolile?

Chichʼ chukel li Satanas xchiʼuk li spukujtake. Jun tsatsal anjel tsjip ochel ta «xab» li Satanas xchiʼuk spukujtake (Apokalipsis 20:1-3). Xkoʼolaj ti chamemik xae, yuʼun muʼyuk kʼusi stakʼ spasik tey. Li xab taje xkoʼolaj ta jun chukinab, jaʼ yuʼun muʼyuk xa kʼusi chopol stakʼ spas li Satanase (Apokalipsis 20:7).
Chlik li Jmil Jabile. Li vaʼ orae, chlik ventainvanuk li Ajvalilal yuʼun Dios ta Jmil Jabile. Tstaik epal bendision yuʼun li krixchanoetike (Apokalipsis 5:9, 10; 20:4, 6). Li ta balumile «epal krixchanoetik» kuxul chkomik li ta mukʼta tsatsal vokolile xchiʼuk chilik kʼu yelan chlik li Jmil Jabile (Apokalipsis 7:9, 14; Salmo 37:9-11).

a Li ta slivroal Apokalipsise, «Mukʼta Babilonia» xchiʼuk «jchonbail ants» chichʼ albel skʼoplal li jecheʼ relijionetike (Apokalipsis 17:1, 5). Li jtiʼvanej chonbolom ti kuxul tsoj skolorale ti jaʼ tslajesbe skʼoplal li Mukʼta Babiloniae jaʼ skʼoplal jun organisasion ta spʼejel balumil ti oy ta yoʼonton tspas ta jmoj skotol li jteklumetik ta spʼejel balumile. Kʼalal lik li organisasion taje, jaʼ toʼox sbi Sociedad de Naciones, pe li avie jaʼ xa li Organización de las Naciones Unidas.