Li Diose la spas li baʼyel vinik xchiʼuk li baʼyel antse, vaʼun laj yakʼ nupunuk. Jaʼ la slikes li nupunel sventa jmoj oyik-o li jun vinik xchiʼuk jun antse xchiʼuk ti xil yalab xnichʼnabike (Jenesis 1:27, 28; 2:18).

 Li Diose tskʼan ti xmuyubajik li buchʼutik nupunemike (Proverbios 5:18). Jaʼ yuʼun, li ta Vivliae te yakʼoj mantaletik xchiʼuk beiltaseletik sventa lekuk xbat li nupunele.

Li ta mantal liʼe ta jkʼeltik batel:

•  ¿Kʼusi mantaletik yakʼoj Dios ta sventa li nupultsʼakaletike?

•  ¿Kʼusi tsnop Dios ta sventa li chʼakbail xchiʼuk li xtuchʼel nupunel ta registro civile?

•  ¿Mi persa skʼan xijnupun ta registro civil yoʼ lekuk xil li Diose?

•  Jech kʼuchaʼal chal li Vivliae, ¿kʼusi skʼan spas li malalil xchiʼuk li ajnilale?

•  ¿Mi chal Dios ti persa skʼan yalab xnichʼnabik li buchʼutik nupunemike?

•  ¿Mi xuʼ skoltaun ta jnupunel li kʼusi chal Vivliae?

•  Tekstoetik ta Vivlia ti chalbe skʼoplal li nupunele

 Li kʼusi oy onoʼox ta yoʼonton Dios ta slikebale jaʼ ti jaʼ noʼox xikʼ sbaik jun vinik xchiʼuk jun antse (Jenesis 2:24). Li Diose muʼyuk lek chil ti epuk yajnil li viniketike, ti chikʼ sbaik li buchʼutik xchiʼil noʼox sbaik ta vinikal o ta antsile o ti koʼol nakalik pe ti muʼyuk nupunemik ta registro civile (1 Korintios 6:9; 1 Tesalonisenses 4:3). Li Jesuse la xchanubtas yajchankʼoptak ti skʼan xchʼunik li mantal yakʼoj Dios ta sventa li nupunele (Markos 10:6-8).

 Li Diose tskʼan ti mu xichʼ tuchʼel li nupunele. Kʼalal chnupun li jun vinik xchiʼuk jun antse, jamal chalbe sbaik ti tukʼ chakʼ sbaik ta jujun tal ti kʼu sjalil kuxulike. Li Diose tskʼan ti xkʼotuk ta pasel yuʼunik taje (Markos 10:9).

 Bakʼintike, xuʼ van xchʼak sbaik kʼuk sjaliluk li malalil xchiʼuk li ajnilale, pe jaʼ van ta skoj ti oy junuk chbat skʼel yutsʼ yalal ti chtun yuʼun koltaele. Li Vivliae chal ti muʼyuk lek mi la xchʼak sbaik ta skoj li skʼopike. Li Vivliae jaʼ noʼox chal ti akʼo xchapan li skʼopike (1 Korintios 7:10).

 Li Vivliae chal ti jaʼ noʼox xuʼ xtuchʼ snupunelik ta registro civil mi oy buchʼu mulivaj junuk yuʼunike (Mateo 19:9). Mi oy junuk nupultsʼakal kʼot ta nopel yuʼunik ti chchʼak sbaik o ti chtuchʼ snupunelik ta registro civil ti maʼuk ta skoj mulivajele, mu me stakʼ xnupunik xchiʼuk yan vinik xchiʼuk yan ants (Mateo 5:32; 1 Korintios 7:11).

 Li Diose oy ta yoʼonton ti xchʼunik li mantaletik yakʼoj sventa nupunel li yajtsʼaklomtak Kristoe (Tito 3:1). Ti bu kʼalal xuʼ yuʼunike, ta xnupunik lek jech kʼuchaʼal chal li smantaltak ajvalile. Kʼalal jech tspasike, chakʼik iluk ti chichʼik ta mukʼ li ajvaliletike xchiʼuk li kʼusi tsnop Dios ta sventa li nupunel ti tskʼan ti jmojuk oyikuk-o li jun vinik xchiʼuk li jun antse. a

•   Li kʼusi skʼan spas li malalil xchiʼuk ajnilale. Li malalil xchiʼuk ajnilale skʼan xakʼbe sbaik ta ilel ti skʼanoj sbaike xchiʼuk ti xichʼ sbaik ta mukʼe (Efesios 5:33). Skʼan xakʼbe sbaik ta ilel ti skʼanoj sbaik kʼalal chchiʼin sbaik ta vayele xchiʼuk ti mu smukul sati sbaike (1 Korintios 7:3; Ebreos 13:4). Mi oy yalab xnichʼnabike, koʼol me oy ta sbaik stsʼitesel (Proverbios 6:20).

   ¿Buchʼu oy ta sba spasel li abteletik ta yut nae xchiʼuk buchʼu skʼan x-abtej? Li Vivliae muʼyuk jamal chalbe skʼoplal taje. Jujun nupultsʼakal skʼan snop stukik kʼusi mas lek sventa li yutsʼ yalalike.

•   Li kʼusi skʼan spas li malalile. Li Vivliae chal ti «malalile jaʼ jolil ta stojolal li yajnile» (Efesios 5:23). Taje jaʼ skʼan xal ti skʼan sbeiltas li yutsʼ yalale xchiʼuk ti lekuk kʼusi xkʼot ta nopel yuʼun sventa stabe sbalil li yajnil xchiʼuk xnichʼnabtake.

   Li malalile skʼan skʼel kʼusi chtun yuʼun li yutsʼ yalale, ti lekuk oyike xchiʼuk ti skolta sventa lekuk xil sbaik xchiʼuk li Diose (1 Timoteo 5:8). Kʼalal koʼol ch˗abtej xchiʼuk yajnile, tstsak ta venta li kʼusi tsnope xchiʼuk ti kʼu yelan chaʼi sba kʼalal oy kʼusi tsnop tspasike, chakʼ ta ilel ti ep sbalil chilbe li stalelaltake xchiʼuk li kʼusitik xtojob spasel li yajnile (Proverbios 31:11, 28). Li Vivliae chal ti skʼan ta slekil yoʼonton spas batel yabtel li malalile (Kolosenses 3:19).

•   Li kʼusi skʼan spas li ajnilale. Li Vivliae chal ti skʼan xichʼ «lek ta mukʼ smalal li ajnilale» (Efesios 5:33). Li Diose lek tajek chil li antsetik kʼalal tstsakik ta venta li abtelal tspas smalalike.

   Jech xtok, tskʼan ti skolta smalalik kʼalal oy kʼusi tsnop tspasike xchiʼuk ti xichʼik ta mukʼ kʼuchaʼal jolil ta utsʼ alalile (Jenesis 2:18). Li Vivliae lek chalbe skʼoplal li ajnilaletik ti tskolta smalalike (Proverbios 31:10).

 Muʼyuk. Ta voʼnee, li Diose laj toʼox yalbe junantik krixchanoetik ti akʼo xil xnichʼnabike, pe li yajtsʼaklomtak Kristo avie mu xa persauk xchʼunik li mantal taje (Jenesis 1:28; 9:1). Li Jesuse muʼyuk laj yalbe yajchankʼoptak ti akʼo xil xnichʼnabike. Jech xtok, li baʼyel yajtsʼaklomtak Kristoe muʼyuk laj yalbeik li buchʼutik nupunemik ti akʼo xil xnichʼnabike. Jujun nupultsʼakal skʼan snop stuk mi tskʼan yalab xnichʼnabik o mi muʼyuk.

 Xuʼ, yuʼun li ta Vivliae te yichʼoj tal mantaletik xchiʼuk beiltaseletik ti tskoltaot sventa lekuk xbat li anupunele, sventa mu xlik akʼopik xchiʼuk sventa stsal avuʼunik kʼusiuk noʼox vokolil chanuptanik.

 Li beiltaseletik ta Vivlia liʼe xuʼ skolta li nupultsʼakaletik sventa:

•   xakʼbe sbaik ta ilel li melel kʼanele (1 Korintios 13:4-7; Kolosenses 3:14).

•  ● tstsʼikbe sba spaltailik (1 Korintios 10:24).

•  ● chchikinta li kʼusi chalbe sbaike (Santiago 1:19).

•   xichʼ sbaik ta mukʼ (Romanos 12:10).

•   xakʼ sbaik ta perton (1 Pedro 4:8).

•   mu smukul sati sbaik (Markos 10:9).

•   xakʼbe sbaik ta ilel ti oy smalael yuʼunike (Efesios 4:2, 3).

•   koʼoluk skolta sbaik (Eklesiastes 4:9).

•   tsotsuk skʼoplal xilik li snupunelike (El Kantar de los Kantares 8:7).