Xuʼ. Li Vivliae xuʼ skoltautik sventa mu oyuk-o jmul xkaʼi jbatik (Salmo 32:1-5). Mi laj jpas jmultik xchiʼuk mi la jsutes koʼontontik ta melele, li Diose chakʼutik ta perton xchiʼuk tskoltautik sventa lekuk xkaʼi jbatik (Salmo 86:5). Li Vivliae chal ti oy sbalil ti oy jmul chkaʼi jbatik bakʼintike yuʼun tskoltautik sventa jlekubtas jtalelaltik xchiʼuk ti mu jpastik yan velta li mulile (Salmo 51:17; Proverbios 14:9). Pe li Vivlia xtoke chakʼ kiltik ti muʼyuk lek mi oy-o jmul chkaʼi jbatik, ti jnoptik ti mu xa xijtukʼibe o ti muʼyuk xa jbaliltik chilutik li Diose. Mi jech chkaʼi jbatike xuʼ me ‹jten-o jbatik ta j-echʼel yuʼun li at-oʼontone› (2 Corintios 2:7, Xchʼul Cʼop ti Jtotic Diose ta skʼop Chamula).

•  ¿Kʼusitik xuʼ oy jmul xkaʼi jbatik yuʼun?

•  ¿Kʼusi xuʼ xapas mi jech chavaʼi abae?

•  Tekstoetik ta Vivlia sventa mulil xchiʼuk yakʼel perton

 Ep kʼusitik xuʼ oy jmul xkaʼi jbatik yuʼun. Yikʼaluk van chopol kʼusi la jpasbetik li buchʼu jkʼanojtike o ti muʼyuk jpastik li kʼusi skʼan jpastik kalojtike. Bateltike voʼotik xa oy jmul chkaʼitik akʼo mi mu jechuk. Jech kʼuchaʼal liʼe: mi ta jnoptik ti skʼan lek jpatik skotole xuʼ me oy jmul chkaʼi jbatik mi mu jechuk kʼot ta pasele. Jaʼ yuʼun, li Vivliae chal ti skʼan mu tukʼuk tajek xkaʼi jbatike (Eklesiastes 7:16).

 Mu me xchibajesot mi oy amul chavaʼi abae, jaʼ lek oyuk kʼusitik xapas sventa junuk avoʼontone. ¿Kʼusitik xuʼ xapas?

•   Akʼo venta li kʼusitik jaʼ ta amule. Kʼopono Jeova a xchiʼuk kʼanbo perton (Salmo 38:18; Lukas 11:4). Mi ta melel asutesoj avoʼonton xchiʼuk chavakʼ avipal sventa mu xapas yan velta li mulile ta me xchikinta aorasion li Diose (2 Kronikas 33:13; Salmo 34:18). Jaʼ noʼox snaʼoj Jeova ti kʼu kelantik ta melele. Kʼalal chakʼ venta ti muʼyuk xa ta jpastik yan velta li mulile chakʼutik ta perton, yuʼun «tukʼ xchiʼuk xuʼ jpat koʼontontik ta stojolal li Diose» (1 Juan 1:9; Proverbios 28:13).

   Pe mi anaʼoj ti oy buchʼu chopol kʼusi apasojbee akʼo venta ti jaʼ ta amule xchiʼuk kʼano perton ta sjunul avoʼonton. Yikʼaluk van mu kʼunuk ta pasel, pe skʼan tsotsuk avoʼonton xchiʼuk bikʼit xavakʼ aba. Oy chaʼtos kʼusi chata mi ta sjunul avoʼonton chakʼan pertone: Baʼyel, muʼyuk xa me amul chavaʼi aba, xchibal, xuʼ me jun avoʼontonik (Mateo 3:8; 5:23, 24).

•   Nopbo skʼoplal li kʼusi chal Vivlia ta sventa li xkʼuxul yoʼonton Diose. Kʼelo kʼusi chal 1 Juan 3:19, 20. Tee chal ti oy bateltik «ti oy jmul chkaʼi jbatik yuʼun li koʼontontike», jaʼ xkaltik, ti chkakʼbe jba jmulintik skotole vaʼun ti jnoptik ti mu xa jtatik ti skʼanutik li Diose, pe chal xtok ti «mas to toyol skʼoplal li Diose, jaʼ mu sta li koʼontontike». ¿Pe kʼusi skʼan xal taje? Jaʼ ti xojtikinutik leke, ti snaʼoj kʼu yelan chkaʼi jbatike xchiʼuk snaʼoj li kʼusi vokol chkaʼitik stsalele. Jech xtok, snaʼoj ti jpasmulilutik xchiʼuk ti oy onoʼox xijchʼaye (Salmo 51:5). b Jaʼ yuʼun, li Jeovae ta sjunul yoʼonton chchʼam li buchʼu tsutes yoʼonton ta melele (Salmo 32:5).

•   Chʼayo xa ta ajol li kʼusi kʼotem ta pasele. Li Vivliae chalbe skʼoplal viniketik xchiʼuk antsetik ti oy kʼusitik chopol la spasike, pe ti jelik ta tsʼakale. Li buchʼu jech kʼot ta stojolale jaʼ li Saulo ti likem ta Tarsoe ti laj yichʼ ojtikinel ta mas tsʼakal kʼuchaʼal li jtakbol Pabloe. Li stuke jaʼ toʼox fariseo vinik xchiʼuk tsots tajek laj yilbajin li yajtsʼaklomtak Jesuse (Echos 8:3; 9:1, 2, 11). Kʼalal la snaʼ ti jaʼ yakal tskontrain Dios xchiʼuk Mesias o Kristoe la sutes yoʼonton, la sjel stalelal xchiʼuk kʼot ta jun lekil yajtsʼaklom Kristo. Li Pabloe chopol tajek laj yaʼi sba ta skʼoj li kʼusitik la spase, pe la xchʼay ta sjol. Ta skoj ti laj yakʼ ta ilel xkʼuxul yoʼonton Jeova ta stojolale, li Pabloe ta sjunul yoʼonton la xchol mantal xchiʼuk muʼyuk xchʼay ta sjol li spatobil yoʼonton ti xuʼ xkuxi ta sbatel osile (Filipenses 3:13, 14).

 Jeremias 31:34: «Ta jchʼaybe li spaltailike xchiʼuk muʼyuk xa bu ta jvules ta jol li smulike».

 Kʼusi skʼan chal: Li Diose chakʼutik ta perton ta melel, yuʼun muʼyuk stikʼ ta jsatik li kʼusi chopol jpasojtike.