Li ta Vivliae muʼyuk bu chalbe skʼoplal li syalesel olol ti yolbaj chichʼ pasele. Akʼo mi jech, oy ep versikuloetik ta Vivlia chakʼ kaʼitik kʼu yelan chil Dios li kuxlejale xchiʼuk ti te tsakal skʼoplal li uni olol ti muʼyuk to vokʼeme.

 Li kuxlejale jaʼ matanal yakʼoj Dios (Jenesis 9:6; Salmo 36:9). Skotol li kʼusitik kuxajtike ep sbalil ta xil li Diose, jech kʼuchaʼal li xkuxlejal uni olol ti te to ta yut chʼutile. Jaʼ yuʼun, kʼalal oy buchʼu yolbaj tsmil uni olol ti muʼyuk to vokʼeme, jaʼ chkʼot ta jmilvanej.

 Li Jeovae xi laj yalbe mantal li j-israeletike: «Mi oy la stsak sbaik ta majel viniketik xchiʼuk mi la staik ta netʼel jun ants ti xchiʼuk yole xchiʼuk mi vokʼ li yol ti muʼyuk to staoj yuale, pe mi muʼyuk buchʼu chame, li buchʼu netʼvane akʼo me stoj ti kʼu yepal tskʼanbe stojol li smalal antse; akʼo stoj ta stojolal jchapanvanejetik. Pe mi oy buchʼu junukal chame, skʼan me xichʼ milel ek li buchʼu milvane» (Eksodo 21:22, 23). a

•  ¿Bakʼin ti jaʼ xa jun kuxlejal chil li Diose?

•  ¿Mi xuʼ xakʼ ta perton Dios li buchʼu yolbaj syalesoj yole?

•  ¿Mi chopol van ti xichʼ yalesel jun uni olol ti oy ta vokol xkuxlejal o li xkuxlejal meʼile?

 Ta sat li Diose jaʼ xa jun kuxlejal chil kʼalal chlik napʼiuk ta xchʼut jun ants li jun olole o kʼalal chchiʼin komel yol li jun antse. Li ta Vivliae, li Diose jaʼ xa jun krixchano chil li jun uni olol ti muʼyuk to vokʼeme. Jkʼeltik junchibuk skʼelobil ti koʼol chilbe xkuxlejal li jun uni olol ti te to ta yut chʼutil xchiʼuk li olol ti jaʼ to vokʼe.

•   Li ajvalil Davide xi laj yalbe li Diose: «Laj avilun ta asat kʼalal naka toʼox linapʼ tale» (Salmo 139:16). Ta sat li Diose jaʼ xa jun krixchano ilat li David kʼalal muʼyuk toʼox vokʼeme.

•   Kalbetik yan skʼelobil, kʼalal mu toʼox chvokʼ li j-alkʼop Jeremiase, li Diose oy xa ox stʼujojbe lek yabtel. Xi laj yale: «Xkojtikinot xa onoʼox kʼalal skʼan toʼox jmeltsanot ta yalajeb ameʼe xchiʼuk kʼalal skʼan toʼox xavokʼe, la jtʼujot. Lakʼot kuʼun ta jun j-alkʼop ta stojolal mukʼtik lumetik» (Jeremias 1:5).

•   Li Lukase jaʼ jtsʼibajom yuʼun Vivlia xchiʼuk jaʼ doktor, la stunes li jpʼel kʼop ta griego sventa koʼol chalbe skʼoplal li uni olol ti vokʼem xae xchiʼuk li uni olol ti muʼyuk to vokʼeme (Lukas 1:41; 2:12, 16).

 Xuʼ. Li Diose xuʼ xakʼ ta perton li buchʼu yolbaj syalesoj yole, jaʼ noʼoxe skʼan xa jechuk chil li kuxlejal jech kʼuchaʼal chil li Diose. Jaʼ yuʼun, muʼyuk srasonal ti chopol tajek chaʼi sba ta skoj li kʼusi chopol la spase. Xi chal li Vivliae: «Toj lek xkʼuxubinvan li Jeovae xchiʼuk oy slekil yoʼonton [...]. Jech kʼuchaʼal toj nom xil sbaik li slokʼeb kʼakʼal xchiʼuk smaleb kʼakʼale, jaʼ jech nom tajek yakʼoj batel ta jtojolaltik li jmultike» (Salmo 103:8-12). b Li Jeovae chakʼ ta perton li buchʼu tsutes yoʼonton ta melel ta skoj li kʼusi chopol la spas ta voʼnee, ti te oy skʼoplal li buchʼu yolbaj la syales yole (Salmo 86:5).

 Ta skoj ti jaʼ xa jun kuxlejal chal Vivlia li jun olol ti muʼyuk to vokʼeme, muʼyuk srasonal ti xichʼ yalesel manchuk mi oy ta vokol xkuxlejal li meʼil o li olole.

 Kʼalal jaʼ xa yorail chvokʼ li olole, ¿kʼusi van stakʼ pasel mi jaʼo ta ora lik yil svokol li meʼil o li olole? Kʼalal oy bakʼintik jech chkʼot ta pasel taje, jaʼ xa tsnop yutsʼ yalal buchʼu junukal ti tskʼan chkuxie.