Epal totil meʼiletike mu xakʼbeik stunes redes sociales li yalab xnichʼnabike, yuʼun xibal sba kʼusi xuʼ snuptanik. Pe mi chavakʼbe akʼo stunesik li avalab anichʼnabe, ¿kʼuxi xuʼ xakolta sventa mu chopoluk kʼusi snuptanike? ¿Kʼuxi xuʼ xachanubtas sventa xtojobikuk stunesel li Internete?

Li ta mantal liʼe, ta jkʼeltik batel:

•  Li kʼusi mas tsots skʼoplal chaʼi li avalab anichʼnabe

•  Ti kʼu yelan chaʼi sba li avalab anichʼnabe

•  Ti kʼu yelan stalelal ta redes sociales li avalab anichʼnabe

•  Kʼusitik jmoj xuʼ xachanbeik skʼoplal

 Li kʼusi skʼan xanaʼe: Ta skoj ti chmeʼin tajek skʼelel li redes socialese, skʼan van xachanubtas yoʼ xchanik kʼu sjalil xuʼ xchʼay˗o yoʼontonik.

 Beiltasel ta Vivlia: «Sventa xanaʼik stʼujel li kʼusi mas tsots skʼoplale» (Filipenses 1:10).

 Nopo ta sventa liʼe: Li avalab anichʼnabe, ¿mi muʼyuk xa lek chvay, muʼyuk xa tspas starea xchiʼuk mi muʼyuk xa chchiʼinoxuk ta skoj ti tstunes tajek li redes socialese? Li buchʼutik chchanbeik skʼoplale chalik ti te van balunebuk ora skʼan xvayik li chex kerem tsebetike. Pe li buchʼutik jal tajek chchʼay˗o yoʼontonik li ta redes socialese, mu xa van sta vukub ora chvayik.

 Li kʼusi xuʼ xapase: Albo avalab anichʼnab li kʼusi mas tsots skʼoplal skʼan spasike xchiʼuk ti kʼu yuʼun skʼan ta spʼisoluk noʼox stunesik li redes socialese. Albo mantaletik, jech kʼuchaʼal liʼe, ti muuk stunesik selular o tavleta kʼalal chvayik xae. Chanubtaso sventa snaʼuk spajesel sba stukike, yuʼun chkoltaatik kʼalal mi svaʼlejik xa oxe (1 Korintios 9:25).

 Li kʼusi skʼan xanaʼe: Kʼalal jun kerem o tseb tskʼelbe sfototak xchiʼuk li videoetik tsmuyes li yamigotak ti lek xa tajek yilel kʼusi tspasike, xuʼ van stuk chaʼi˗o sba, tsvul yoʼonton xchiʼuk ch˗ipaj ta at˗oʼonton.

 Beiltasel ta Vivlia: «Iktaik [...] ti xpichʼet avoʼontonike» (1 Pedro 2:1).

 Nopo ta sventa liʼe: Kʼalal tstunes redes sociales li avalab anichʼnabe, ¿mi chopol chaʼi sbaik kʼalal tskoʼoltas sbaik xchiʼuk yantike? ¿Mi jaʼ lek xa tajek yilel chilbeik xkuxlejal li yantik ti jaʼ mu jechuk li stukike?

 Li kʼusi xuʼ xapase: Albo avalab anichʼnab ti toj xibal sba mi tskoʼoltas sba xchiʼuk yantike. Teuk me ta ajol ti mas to tsots chaʼiik li tsebetike, yuʼun li stukike mas tsots skʼoplal chilik ti lekuk xil sbaik xchiʼuk li yantike xchiʼuk ti lekuk xvinajike. Jech xtok, xuʼ xavalbe akerem o atseb ti muuk stunesik kʼuk sjalil li redes socialese. Jun chex kerem ti Jacob sbie xi laj yale: «La jtupʼ kʼuk sjalil li aplikasion sventa redes socialese. Taje jaʼ la skoltaun sventa jaʼuk jpas li kʼusi mas tsots skʼoplale, ti lekuk xkaʼi jbae xchiʼuk ti lekuk xkil jba xchiʼuk yantike».

 Li kʼusi skʼan xanaʼe: Kʼalal ta jtunestik li redes socialese, xkoʼolaj ti chkakʼtik ta ilel kʼu yelan jkuxlejaltik ta stojolal epal krixchanoetik. Ta skoj ti buchʼuuk noʼox xuʼ xil li kʼusi ta jmuyestike, xuʼ xlik˗o kʼop xchiʼuk xuʼ yan˗o xa kʼusitik chalik.

 Beiltasel ta Vivlia: «Jipik lokʼel skotol li kʼusi toj chopol oy ta avoʼontonike, li skʼakʼal avoʼontonike, ti chavilta abaike, ti tsotsik xa aveik chakʼopon abaike, ti chachopol kʼopta abaike [...]. Jaʼ mas lek ti oyuk slekil avoʼontonik ta jujuntale» (Efesios 4:31, 32).

 Nopo ta sventa liʼe: Li akerem o a tsebe ¿mi oy chloʼiltavan, stikʼoj sba ta kʼop o mi oy kʼusi chopol chal ta skoj li redes socialese?

 Li kʼusi xuʼ xapase: Chanubtaso avalab a nichʼnab ti lekuk xakʼ ta ilel stalelal kʼalal tstunes li internete. Li livro Niños conectados (yuʼun Martin Kutscher, ti jaʼ la sjelubtas José Pérez Escobar). Xi chale: «Li totil meʼilutike oy ta jbatik xchanubtasel kalab jnichʼnabtik ti muʼyuk lek mi oy kʼusi chopol ta jpastike, akʼo mi ta internet oyutik o mi maʼuk».

 Teuk ta ajol ti mu toj tsotsuk skʼoplal li redes socialese xchiʼuk ti mu skotoluk totil meʼiletik chakʼbeik stunes li yalab xnichʼnabike. Mi chavakʼbe stunes li avalab anichʼnabe, kʼelo lek mi snaʼ ti ta spʼisoluk noʼox skʼan xchʼay-o yoʼontone, ti snaʼuk stʼujel lek li buchʼutik chchiʼinane xchiʼuk ti mu skʼel li kʼusitik chopol chlokʼ tale.