Kʼalal chjelav batel li jabiletike, junantik nupultsʼakaletike muʼyuk mas chakʼbe sbaik ta ilel ti chkʼuxubin sbaike. ¿Mi skʼan van xavul avoʼonton mi jech yakal chkʼot ta pasel ta anupunele?

•  Li kʼusi skʼan xanaʼike

•  Li kʼusi skʼan xapasike

 Toj tsots me skʼoplal ti xkʼuxubin sbaik sventa tsotsuk li snupunelike. Jech kʼuchaʼal chtun kuʼun jveʼeltik xchiʼuk voʼ sventa lek tsotsukutik xchiʼuk ti mu xij-ipaje jaʼ jech skʼan xkʼuxubin sbaik li nupultsʼakaletik sventa tsotsuk-o li snupunelike. Akʼo mi ep xa jabil snupunelik, li malaliletik xchiʼuk ajnilaletike chtun yuʼunik ti kʼanbil xaʼi sbaik xchiʼuk ti ichʼbiluk ta mukʼ yuʼun li snup xchiʼilike.

 Li melel kʼanelale maʼuk noʼox tsaʼ li kʼusi tskʼan stuke. Jaʼ chakʼ ta yoʼonton ti xmuyubajuk yuʼun li snup xchiʼile. Jaʼ yuʼun, maʼuk noʼox chkʼuxubinvan kʼalal jech tskʼan yoʼonton stuke, moʼoj, yuʼun te ta sjol ti skʼan kʼuxubinel li snup xchiʼile xchiʼuk chakʼbe yipal sventa jechuk spas.

 Li ajnilaletike jaʼ mas chtun yuʼunik ti xichʼik kʼuxubinele. Xuʼ van skʼanoj tajek yajnil li jun vinike. Pe mi jaʼ noʼox chkʼuxubin ta sob, ta mal kʼakʼal o jaʼ noʼox kʼalal tskʼan chchiʼin ta vayele, yikʼal van tsnop li ajnilal ti muʼyuk kʼanbil ta melele. Jaʼ mas lek ti xkʼuxubin sbaik skotol orae.

 Vinajuk ta akʼopojelik ti chakʼuxubin abaike. Kʼalal chavalbe abaik «jkʼanojot tajmek» o «ximuyubaj ti laj kojtikin jbatike», kʼanbil chavaʼi abaik ta jujuntal.

 Teksto ta Vivlia ti tsots skʼoplale: «Yuʼun jaʼ chlokʼ ta aveik li kʼusitik oy ta avoʼontonike» (Mateo 12:34).

 Tojobtasel: Maʼuk noʼox xavalbe ti akʼanoj li anup achiʼile. Tsʼibabo junuk vun, junuk koreo elektroniko o junuk mensaje ta selular ti bu chavakʼ ta ilel ti akʼanoje.

 Akʼbo abaik ta ilel ti chakʼuxubin abaike. Kʼalal chamey abaik, chatsʼutsʼ abaik o chatsakbe aba akʼobike, jaʼ me svinajeb ti ta avoʼonton chlokʼ kʼalal «jkʼanojot tajmek» xachie. Xuʼ xavakʼ ta ilel ti akʼanoj anup achiʼil kʼalal chakʼel, chatsakbe skʼob o chavakʼbe junuk smotone. Yan kʼu sba chavakʼ ta ilel ti chakʼuxubinvane jaʼo kʼalal oy kʼusitik chapase. Jech kʼuchaʼal liʼe, li malalile xuʼ van skolta yajnil ta xkuchel li moral kʼalal chbatik ta manolajele, xuʼ sjambe li tiʼ na sventa baʼyel x-och li yajnile, xuʼ skolta ta sukʼel li setsʼetike, ta xchukʼel li skʼuʼ spokʼike xchiʼuk ta spasel li sveʼelike. Epal ajnilaletike maʼuk noʼox koltael chaʼiik taje, yuʼun jaʼ kʼuxubinel chaʼiik.

 Teksto ta Vivlia ti tsots skʼoplale: «Skʼan xijkʼanvan, yuʼun maʼuk noʼox ti chkaltike o ti ta ketik noʼox chlokʼe, moʼoj, yuʼun skʼan xkakʼtik ta ilel ta melel ta sventa li kʼusitik ta jpastike» (1 Juan 3:18).

 Tojobtasel: Jech-o xakʼuxubin avajnil o amalal jech kʼuchaʼal kʼalal anovio toʼox abaike.

 Chʼakbeik yorail sventa jmoj oyoxuk. Kʼalal chachʼakbeik yorail sventa atuk oyoxuk achaʼvoʼalike, tstsatsub li anupunelike xchiʼuk jech chavakʼbe yil anup achiʼil ti chakʼupin ti jmoj oyoxuke. Vokol van ta xchʼakbel yorail mi oy avalab anichʼnabik o mi oy ep kʼusitik abainojik spasele. Pe xuʼ xanop akʼopik sventa xapasik li kʼusi muʼyuk toj vokol ta pasele, jech kʼuchaʼal ti xalokʼik ta xanbal achaʼvoʼalike.

 Teksto ta Vivlia ti tsots skʼoplale: «Sventa xanaʼik stʼujel li kʼusi mas tsots skʼoplale» (Filipenses 1:10).

 Tojobtasel: Akʼo mi mu noʼox xokobik li nupultsʼakaletike, junantike tsnop skʼopik sventa «stuk chveʼik» o «stuk chbatik ta paxyal junuk savado o domingo».

 Ojtikino abaik mas. Jelel kʼu yelan ta jkʼantik kʼuxubinel. Albo abaik ti kʼu yelan chakʼan chakʼuxubin abaike xchiʼuk alik mi skʼan to mas xakʼuxubin abaik. Mi laje, akʼbeik yipal ta spasel li kʼusi laj avalbe abaike. Vuleso me ta ajolik ti tsots skʼoplal ti xakʼuxubin abaik sventa tsotsuk li anupunelike.

 Teksto ta Vivlia ti tsots skʼoplale: «Li kʼanelale [...] maʼuk tsaʼ li kʼusi lek chaʼi stuke» (1 Korintios 13:4, 5).

 Tojobtasel: Mu xasuj anup achiʼil sventa xkʼuxubinot, jaʼ lek xi xajakʼbe aba eke: «¿Kʼusi xuʼ jpas sventa masuk xkʼuxubinun li jnup jchiʼile?».