Skotol ora xibalik sba kʼusitik chalik li ta notisiaetike. Chakʼik ta ilel ta tele, ta selular, ta tavlet o ta komputadora xchiʼuk ep ta veltae jamal chakʼik ta ilel li kʼusitik chkʼotanuk ta pasele.

 Tstaik ta ilel ek li ololetike.

 ¿Kʼusitik xuʼ xapas sventa xachabi avalab anichʼnab ta skoj li kʼusitik chalik ta notisiaetike?

•  ¿Kʼusi xuʼ xkʼot ta stojolal kʼoxetik ta skoj li notisiaetike?

•  ¿Kʼuxi xuʼ xakolta avalab anichʼnab sventa mu masuk svul-o yoʼontone?

•  ¿Kʼusi xuʼ xapas mi oy kʼusi xibal sba yiloj ta xkuxlejal li avalab anichʼnabe?

•   Ep kʼoxetike chkom-o ta snopbenik li kʼusitik chilik ta notisiaetike. Akʼo me muʼyuk chalik li kʼu yelan chaʼi sbaike, xuʼ me ta xil-o svokolik. a Kʼalal chil ti tsvul tajek yoʼonton li stot smeʼike, mas to me tsvul-o yoʼonton li stukik eke.

•   Li ololetike xuʼ me yan-o kʼu yelan chaʼibeik smelolal li kʼusitik chlokʼ ta notisiaetike. Oy junantik ololetike tsnopik ti jaʼ jech tsnuptan yutsʼ yalal li kʼusi laj yilik ta notisiae. Kʼalal ep ta velta chakʼik ta ilel li kʼusi xibal sba kʼot ta pasele, li jun kʼoxe xuʼ me snop ti jech-o chkʼotilan ta pasele.

•   Li kʼoxetike mu snaʼik ti oy kʼusi mu meleluk chalik li ta notisiaetike. Li stukike mu snaʼik ti jaʼ sventa mas tspasik-o kanal takʼin mi mas ep krixchanoetik tskʼelik li notisia o kanal taje. Jech oxal, xuʼ mas xa tspʼolesik li kʼusitik chalik ta notisiae.

•   Mu toj masuk xakʼelik li notisiae. Taje maʼuk skʼan xal ti muʼyuk xa tstsakik ta venta avalab anichʼnab li kʼusitik yakal chkʼot ta pasele. Pe muʼyuk me tstabeik sbalil mi tskʼelilanik o chchikintaik notisiaetik ti chalik li kʼusitik muʼyuk lek kʼotem ta pasele.

   «Bakʼintike ta jloʼiltakutik li kʼusi laj yal ta notisia kʼalal te oy li kalab jnichʼnabkutike. Pe muʼyuk chkakʼkutik venta ti solel tsvul-o tajek yoʼontonike» (María).

   Teksto ta Vivlia ti tsots skʼoplale: «Li kʼusi tsvul-o yoʼonton li jun vinike jaʼ tslubtsanat yuʼun» (Proverbios 12:25).

•   Chikintabo lek xchiʼuk aʼio li kʼu yelan chaʼi sbaike. Mi vokol chaʼi avalab anichʼnab ta yalbel smelolal li kʼusi kʼot ta pasele, yikʼaluk xuʼ slokʼta ta junuk divujo. Kʼalal me laj yalbot li kʼusi tsvul-o yoʼontone, kʼunuk noʼox me ta aʼiel li kʼusi chavale sventa xaʼibe smelolale. Mu persauk xavalbeik skʼoplal skotol li kʼusi vinaj ta notisiae.

   «Chkakʼ venta ti mas jun yoʼonton li jtsebkutik kʼalal ta jchikintabekutik lek li kʼusi chale. Jaʼ mu lekuk ti xi xkalbetike: ‹Stalel xa jech li kuxlejal avie, skʼan xnop xkaʼitik›» (Sarahi).

   Teksto ta Vivlia ti tsots skʼoplale: «Oyuk ta avoʼontonik xchikintael, nopik me lek kʼalal chakʼopojike» (Santiago 1:19).

•   Koltao avalab anichʼnab sventa oyuk noʼox smelol xilik li notisiae. Mi laj yaʼi ta notisia avalab anichʼnab ti oy buchʼu laj yichʼ elkʼanele, xuʼ van tsnop ti ep buchʼutik chichʼik elkʼanele. Pe ti mu jechuk ta melele. Jaʼ yuʼun, albeik smelolal kʼusitik chapasik sventa xachabiike. Teuk ta ajol ti kʼalal oy kʼusi chlokʼ ta notisiae, jaʼ skʼan xal ti oy kʼusi chkʼot ta pasel ti mu staleluk xae.

   «Koltao avalab anichʼnab sventa mu masuk svul yoʼontonike. Jutuk mu skotoluk velta li kʼu yelan chaʼi sbaike, jaʼ ta skoj li kʼusi tsnopike. Jaʼ yuʼun, skʼan jkolta kalab jnichʼnabtik sventa lekuk kʼusi snopike. Vaʼun, mas me jun yoʼontonik» (Lourdes).

   Teksto ta Vivlia ti tsots skʼoplale: «Li buchʼu xaʼibe smelolale oy spʼijil chkʼopoj xchiʼuk chkʼot ta oʼontonal li kʼusi chale» (Proverbios 16:23).