Epal krixchanoetike koʼol nakalik akʼo mi muʼyuk nupunemik ta registro civil. Junantike jech tspasik sventa masuk la xojtikin sbaik o sventa snaʼik mi lek onoʼox chbat xkuxlejalik mi nupunike. Pe ¿mi lek van ti jech tsnopike?

Li ta mantal liʼe ta jtakʼtik batel li sjakʼobiltak liʼe:

•  ¿Kʼusi chal li Vivliae?

•  Mi baʼyel jmoj lanakiike, ¿mi jaʼ van chkoltavan sventa lekuk xbat li anupunelike?

•  ¿Mi jaʼ van chkoltavan sventa xatsʼin atakʼinik?

•  Mi chakʼan ti lekuk xbat ta tʼujel avuʼun li anup achiʼile, ¿mi skʼan van baʼyuk xachiʼin ta naklej?

•  ¿Kʼusi ti lek ta pasele?

•   Li Vivliae chal ti chopol ti chchiʼin sbaik ta vayel li buchʼutik muʼyuk nupunemik ta registro civile. Jaʼ yuʼun, chal ti mu stakʼ ti xijmulivaje (1 Korintios 6:18; 1 Tesalonisenses 4:3). Li mulivajele te smakojbe skʼoplal kʼalal chchiʼin sbaik ta vayel akʼo mi snopojik ti chnupunik li ta jelavele. a Li buchʼutik koʼol nakalik ti muʼyuk nupunemike muʼyuk me yakal chchʼunik li beiltaseletik ta Vivliae, jaʼ yuʼun xuʼ sta svokolik jech kʼuchaʼal liʼe: li jun tsebe xuʼ xchiʼin yol ti muʼyuk toʼox jech snopoje.

•   Li Jeovae jaʼ la slikes li nupunele. Jaʼ yuʼun, xi laj yale: «Ta xikta komel stot xchiʼuk smeʼ li vinike, jaʼ xa chchiʼin˗o ta naklej li yajnile, vaʼun tspas ta jun sbekʼtalik li chaʼvoʼike» (Jenesis 2:24). Kʼalal lek nupunemik li jun vinik xchiʼuk jun antse, jaʼ chkoltaatik sventa junuk yoʼontonik xchiʼuk ti lekuk xbat xkuxlejalik mi laj yil yalab xnichʼnabik li ta jelavele.

 Jlomantike chalik ti tanae. Tsnopik ti sventa xojtikin sbaik leke skʼan ti koʼoluk li kʼusitik spasik ta yut nae xchiʼuk ti skʼelik ti kʼu yelan stalelalik ta melele. Akʼo mi jech, li kʼusi chkoltavan ta melel sventa xmuyubajike jaʼ kʼalal chakʼ yeik ti muʼyuk onoʼox chikta sbaik akʼo mi tsots svokol snuptanike.

 ¿Kʼusi van xuʼ xkoltaatik sventa mu xchʼak sbaik akʼo mi oy kʼusi tsots snuptanike? Junantike tsnopik ti kʼalal koʼol chnakiike jaʼ sventa tspasik preva o sventa snaʼik mi jaʼ ta melel li snup xchiʼilike xchiʼuk ti xuʼ xchʼak sbaik kʼusiuk ora skʼanike. Pe taje mu jechuk. Li kʼusi chkoltavan ta melel sventa lekuk xbat li snupunelike jaʼ ti oyuk ta yoʼontonik ta jujuntal ti skolta sbaik sventa xchapan li skʼopik xchiʼuk ti mu xchʼak sbaike.

 Ta jpʼelchaʼpʼel noʼoxe: Kʼalal jun vinik xchiʼuk jun ants koʼol ta xnakiike, jaʼ skʼan xal ti muʼyuk oy ta yoʼontonik ti xnupunik lek ta registro civile, yuʼun tsnopik ti jaʼ sventa jlikel noʼoxe xchiʼuk ti stakʼ xchʼak sbaike.

 Beiltasel ta Vivlia: «Kʼusiuk noʼox ti yakal tstsʼun li jun krixchanoe jaʼ tstsobbe sat xtok» (Galatas 6:7).

 Junantike chalik ti tanae. Jun grupo ti oy kʼusi chchanbeik skʼoplal ta Estados Unidose la sjakʼbeik sloʼil jtsop krixchanoetik. Jutuk mu j˗oʼloluk li buchʼutik laj yichʼ jakʼbel sloʼilike laj yalik ti jaʼ noʼox koʼol chnakiik ta skoj ti chʼabal lek stakʼinik xchiʼuk ti oy ta yoʼonton stsʼin stakʼinike. Pe kʼalal oy xa ox kʼuk sjalil koʼol nakalike, li buchʼutik laj yichʼ jakʼbel sloʼilike te laj yakʼik venta ti muʼyuk˗o lek stakʼinike xchiʼuk ti muʼyuk to chapalik sventa xnupunike.

 Xuʼ me jta jvokoltik yuʼun mi jaʼ noʼox koʼol nakalutik ti muʼyuk lek nupunemutike. Li buchʼutik mas chil svokolike jaʼ li antsetike. Jech kʼuchaʼal liʼe, jutuk mu skotoluk velta kʼalal chchʼak sbaike jaʼ xa chikʼ komel xchiʼuk jaʼ xa tsbain skʼelel yalab li jun antse.

 Ta jpʼelchaʼpʼel noʼoxe: Akʼo mi oy sbalil yalojik ti jaʼ noʼox koʼol chnakiike, pe ti melel xkaltike, mas ep li vokoliletik ta snuptanike.

 Beiltasel ta Vivlia: «Voʼon Jeovaun, voʼon Adiosun, voʼon ta jchanubtasot sventa xatabe sbalil atuk» (Isaias 48:17).

 Junantik chalik ti jeche. Pe li livro Akʼo persa sventa mu xachʼak abaik (Fighting for Your Marriage) xi chale: «Li krixchanoetik ti koʼol nakajtike mas xa vokol chaʼiik ti xchʼak sbaik ta jelavele». ¿Kʼu yuʼun ti jech chale? Yuʼun mi laj yakʼik venta ti oy kʼusitik ti mu koʼoluk tskʼupinik spasele xchiʼuk ti muʼyuk xa jun yoʼonton nakalike, jaʼo kʼalal oy xa ox kʼusi koʼol sbainojik spasele, xuʼ van oy xa ox smascotaik, koʼol xa ox tstoj snaik o oy xa ox van yuni neneʼik ti muʼyuk toʼox snopoj chilike. Xi chalik li buchʼutik xchanojbeik skʼoplale: «Muʼyuk chchʼak sbaik ta skoj ti nopem xa xaʼiik ti koʼol nakalike xchiʼuk ti mu xa kʼusi stakʼ pasel chaʼiike». b Xi to chal li livro Akʼo persa ti mu xachʼak abaike: «Li krixchanoetik ti oy ox ta yoʼonton xchʼak sbaike nupunik onoʼox, yuʼun kʼajomal xa jaʼ li kʼusi stakʼ pasel laj yaʼiike».

 Ta jpʼelchaʼpʼel noʼoxe: Kʼalal jmoj nakalik ti muʼyuk nupunemik leke, mas xa me vokol chaʼiik xchʼak sbaik akʼo mi xakʼik venta ti oy kʼusi mu koʼoluk tskʼupinike o ti muʼyuk xa jun yoʼonton nakalike.

 Beiltasel ta Vivlia: «Li buchʼu pʼije tsta ta ilel li vokolile, vaʼun tsnakʼ sba, pe li buchʼutik chʼabal spʼijilike tukʼ chjelavik batel, vaʼun tsta-o svokolik» (Proverbios 22:3).

 Sventa junuk avoʼontonik xchiʼuk ti lekuk xbat li anupunelike, tsako ta venta li beiltasel chakʼ Vivlia ta sventa li nupunele. Baʼyel ojtikino lek li buchʼu chakʼan chkʼot ta achiʼile, maʼuk ti baʼyel koʼol xa chanakiik ti muʼyuk toʼox nupunemoxuk lek ta registro civile. Kʼalal chatʼuj li buchʼu chkʼot ta anup achiʼile, mu jaʼuk xakʼel ti toj kʼupil xa sba xvinaje, li kʼusi skʼan xatsak ta ventae jaʼ ti koʼoluk li kʼusitik tsots skʼoplal chavilike xchiʼuk ti koʼoluk li kʼusitik achʼunojike.

 Li ta Vivliae xuʼ xata epal beiltaseletik sventa lekuk xbat li anupunelike. c Jech kʼuchaʼal liʼe: xuʼ xata beiltaseletik ti tskoltaot...

•   ... sventa mu xamukul sati li anup achiʼile.

•   ... sventa xatsʼites talelaletik sventa jaʼukot jun lekil malalil o jun lekil ajnilale.

•   ... sventa xavakʼ venta mi xuʼ xkʼot ta anup achiʼil li buchʼu yakal chanoviain o chanovioine.

 Mi chakʼan chanabe mas skʼoplale, batan ti bu chal: Nupultsʼakal xchiʼuk utsʼ alalil, ta jw.org.

 Beiltasel ta Vivlia: «Laj yakʼ ta naʼel Dios skotol li Tsʼibetike xchiʼuk toj jtunel sventa chanubtasel» (2 Timoteo 3:16).