Kʼalal oy kʼusi chal o tspas anup achiʼil ti cha-ilin-o yuʼune, chavakʼ van persa ti mu xavakʼ ta ilel ti kapemote. Pe kʼalal ep kʼusi chlik sjakʼbot ti kʼu yuʼun jelel xavinaje, mas to cha-ilin yuʼun. Mi jech kʼot ta pasele, ¿kʼusi xuʼ xapas sventa xatsal li skapemal ajole?

•  Li kʼusi skʼan xanaʼe

•  Li kʼusi xuʼ xapase

•   Mi mu jnaʼ jpajtsan jbatik kʼalal kapemutike, xuʼ xij-ipaj-o. Li buchʼu xchanojbeik skʼoplale chalik ti kʼalal mu jpajtsan skapemal joltike, xuʼ xmuy-o jpresiontik, tstsakutik chamel ta koʼontontik, ta jchʼutik xchiʼuk chij-ipaj ta at-oʼonton. Jech xtok, mu x-och jvayeltik, ta jvul koʼontontik, tstsakutik chamel ta jnukuliltik xchiʼuk xuʼ xpaj ta abtel li jchinabtike. Jaʼ yuʼun xi chal li Vivliae: «Comtsanic li ilinele xchiʼuc li scʼacʼal avoʼntonique; mu me xaʼilin, yuʼun xuʼ chopol chbat avuʼun» (Salmo 37:8).

•   Mi la jnakʼ skapemal joltike, xuʼ xkil jvokoltik xtok. Kʼalal ta jnakʼ skapemal joltike, xkoʼolaj ta jun chamel ti chlajesvan tal ta yut jbekʼtaltike. Jech kʼuchaʼal liʼe, xuʼ van chlik loʼiltavanan o ti chopol noʼox chavil skotole. Mi jech atalelal taje, mas me vokol chaʼi anup achiʼil ti jmoj oyoxuke, vaʼun jaʼ chlik-o kʼop li ta anupunelike.

•   Jaʼuk xakʼelbe slekil talelal li anup achiʼile. Tsʼibao oxib stalelal ti lek chavilbee. Vaʼun jaʼuk xanopbe skʼoplal mi oy kʼusi la spas anup achiʼil ti la-ilin yuʼune. Taje jaʼ tskoltaot yoʼ xatsal li skapemal ajole.

   Beiltasel ta Vivlia: «Tojik ta vokol» (Kolosenses 3:15).

•   Chano yakʼel perton. Akʼo persa yaʼibel smelolal li kʼusi tsnop anup achiʼile. Taje jaʼ tskoltaot ta yaʼibel smelolal ti kʼu yelan chaʼi sbae, jech kʼuchaʼal chal li Vivliae (1 Pedro 3:8). Vaʼun xiuk xajakʼbe abae: «¿Mi ta melel toj chopol li kʼusi la spasbun ti mu xa xkakʼ pertone?».

   Beiltasel ta Vivlia: «Li bochʼo bije ta sventa smucʼul yoʼnton chcuch yuʼun li ilbajinele» (Proverbios 19:11).

•   Ta slekiluk avoʼonton xaval ti kʼu yelan chavaʼi abae. Jaʼuk xaval ti kʼu yelan chavaʼi abae. Jech kʼuchaʼal liʼe, mu xiuk xavale: «Kʼalal muʼyuk chavalbun tal bu oyote, muʼyuk chatsakun ta venta chkaʼi». Mas lek ti xiuk xavale: «Ta jvul koʼonton kʼalal echʼem ora chavule, yuʼun mu jnaʼ mi lek oyot». Kʼalal ta slekil avoʼonton chavale, jaʼ tskoltaot yoʼ xatsal li skapemal ajole.

   Beiltasel ta Vivlia: «Skotoluk me ora oyuk lek smuil li akʼopojelike» (Kolosenses 4:6).

•   Chikinta-o li kʼusi chale. Mi laj xa ox kʼopojane, akʼo kʼopojuk ek li anup achiʼile xchiʼuk mu xatuchʼbe ta be li sloʼile. Mi laj yoʼontone, albo ti kʼu yelan avaʼibe smelolal li kʼusi laj yale. Jaʼ tskoltaot yoʼ xatsal li skapemal ajole.

   Beiltasel ta Vivlia: «Skʼan me akotolikuk oyuk ta avoʼontonik xchikintael, nopik me lek kʼalal chakʼopojike» (Santiago 1:19).