¿Mi oy yalojbot anup achiʼil ti toj ep xa chbat yuchʼel pox avuʼune? Mi jeche, jkʼeltik junantik li kʼusitik xuʼ skoltaote.

Li ta mantal liʼe ta jkʼeltik batel oxtos:

•  Chakʼ vokolil ta nupunel kʼalal ch˗echʼ ta mas yuchʼel poxe

•  ¿Mi ch˗echʼ xa ta mas yuchʼel avuʼun li poxe?

•  Kʼelo me aba ti mu xlik apak akʼoplale

•  Li kʼusi stakʼ xapase

 K’alal ch-ech’ ta mas ku’untik yuch’el poxe, ta me xij˗ipaj yuʼun. Xuʼ stsakutik cirrosis hepática, cáncer o chamel ta koʼontontik. Pe maʼuk noʼox taje, yuʼun chakʼ jvokoltik ta jnupuneltik xtok. Kʼalal oy buchʼu ch˗echʼ ta mas yuʼun yuchʼel poxe, xuʼ xlik yutilan li snup xchiʼile o ti smaje, tspasik ta povre, tsloʼla snup xchiʼil o ti xtuchʼ snupunelike.

 Li Vivliae chal ti kʼalal ch˗echʼ ta mas li yuchʼel poxe «chtiʼvan kʼuchaʼal jkot kiletel chon xchiʼuk chakʼ svenenoal kʼuchaʼal jkot chon» (Proverbios 23:32). ¿Kʼuxi xuʼ xanaʼ mi ch˗echʼ xa ta mas avuʼun li yuchʼel poxe?

 Li sjakʼobiltak ta olone tskoltaot yoʼ xavakʼ venta mi ch˗echʼ xa ta mas yuchʼel avuʼun li poxe:

•   ¿Mi vokol chavaʼi chapajes aba kʼalal chavuchʼ poxe?

•   ¿Mi jaʼ xa chanopilanbe˗o skʼoplal ti bakʼin chavuchʼ pox yan veltae?

•   ¿Mi jech˗o chavuchʼilan pox akʼo mi stsakojot xa chamel o ti chlik ak’opik xchi’uk li anup achi’ile?

•   Kʼalal chavikta yuchʼel pox junchibuk kʼakʼale, ¿mi muʼyuk xa lek chavaʼi aba o cha˗ipaj˗o yuʼun?

•   ¿Mi oy chlik akʼopik xchiʼuk anup achiʼil ta skoj ti kʼu yepal chavuchʼ poxe?

•   ¿Mi yantik xa ch˗epaj ti kʼu yepal chavuchʼ poxe?

•   ¿Mi oy ta nakʼal chavuchʼ pox o mi chanak’ pox li ta ana o ta avabtele?

 Mi oy jech yakal chapas junuke o mi skotole, xuʼ van yakal xa ch˗echʼ ta mas yuchʼel avuʼun li poxe.

 ¿Mi oy yalojbot anup achiʼil ti ch˗echʼ xa ta mas ti kʼu yepal chavuchʼ poxe? Mi jeche, xuʼ van la apak akʼoplal o muʼyuk la atsak ta venta li kʼusi laj yalbote. Jech xtok, yikʼaluk van chavakʼbe smulin anup achiʼil o yantik ti chavuchʼ poxe xchiʼuk xuʼ van xi avaloje:

•   «Ti tauk xavichʼun ta kʼuxe, muʼyuk chkuchʼ pox ti jechuke».

•   «Ti jechuk tsots tajek cha˗abtej k’ucha’al vo’one, ta xavuchʼ pox jna’ eke».

•   «Oy to buchʼutik mas chuchʼik pox kʼuchaʼal li voʼone».

 Mi oy jech avaloj jkojuke, ¿mi jaʼ van ta skoj ti mas tsots skʼoplal chavil li yuchʼel pox ti maʼuk li anup achiʼile? ¿Kʼusi ti mas tsots skʼoplal skʼan xavile?

 Beiltasel ta Vivlia: «Li vinik ti nupuneme jaʼ tsvul˗o yoʼonton [...] ti kʼuxi xuʼ lek x-ilat yuʼun li yajnile» (1 Korintios 7:33).

•   Tsako ta venta li kʼusi tsvul˗o yoʼonton li anup achiʼile. Akʼo mi chanop ti ch˗echʼ ta mas li k’usitik chale, pe lek onoʼox ti xatsak ta ventae. Pe mi mu xa xajel chavaʼie xchiʼuk ti jech˗o chavuchʼilan pox akʼo mi chil svokol li anup achiʼile, xuʼ van jaʼ jun senyail ti meʼinem xa ta avoʼonton li uchʼ poxe.

   Beiltasel ta Vivlia: «Ta jujuntal akʼo saʼik li kʼusi lek chaʼi yan krixchanoe, maʼuk li kʼusi lek chaʼi stukike» (1 Korintios 10:24).

•   Sabo skʼoplal. Jnoptik noʼox ti jaʼot jun soltaroe. Sventa xapas kanal li ta paskʼope, skʼan xanaʼ li kʼusitik tspas avajkontrae. Jaʼ noʼox jech ek, sventa stsal avuʼun li uchʼ poxe, skʼan xanaʼ kʼusi smakojbe skʼoplal xchiʼuk ti kʼuxi chmeʼin ta yoʼonton li krixchanoetike. Jech xtok, skʼan xanaʼ kʼusi xuʼ xapas sventa xavikta yuchʼel li poxe xchiʼuk ti mu xa xatambe yuchʼel yan veltae.

   Beiltasel ta Vivlia: «Jechuk˗o xatsʼik abaik ta spasel li kʼusi tskʼan abekʼtalik ti tstsakoxuk ta kʼope» (1 Pedro 2:11).

•   Kʼano koltael. Oy centros de rehabilitación, klinikaetik, ospitaletik o yan programaetik sventa skoltaik li buchʼutik meʼinem ta yoʼontonik uchʼ poxe. Jech xtok, xuʼ xavalbe junuk avamigo sventa skoltaot ta yakʼel venta ti kʼu yuʼun chavuchʼ tajek poxe xchiʼuk kʼalal chakʼan xa chavuchʼ yan veltae xuʼ jaʼ xbat akʼanbe koltael.

   Beiltasel ta Vivlia: «Li melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike» (Proverbios 17:17).

 Toj vokol ta iktael li uch’ poxe, li buch’u me’inem yu’un yuch’ele mu x-ik’taj-o yu’un ta jp’elchap’el no’ox mantal o ti ja’ no’ox xi chalilane: «Chkakʼ persa muʼyuk xa ep chkuchʼ». Jech xtok, teuk me ta ajol ti mi mu’yuk xavak’ persa yiktael li uch’ poxe, xu’ me xa-ipaj-o o xu’ xavil avokolik xchi’uk li anup achi’ile.

 Chanbo mas sk’oplal: Li ta mantaletik liʼe xuʼ xavil kʼusi la spasik li buchʼutik meʼinem toʼox ta yoʼontonik yuchʼel poxe:

 «Maʼuk xa simaron vinikun»

 «Muʼyuk xa chikʼexav˗o ti kʼu yelan jkuxlejale»

 «Jaʼ pas ta jnakleb li bebetike»

 Kʼelo xtok li video «La jpʼaj ti kʼu toʼox yelan li jkuxlejale».