«Muʼyuk yan akʼel ta preva chavilik, jaʼ noʼox jech chavilik jech kʼuchaʼal chil li yantike. Pe tukʼ li Diose, muʼyuk chakʼ ti akʼo xavichʼik akʼel ta preva mi mu stsʼik avuʼunike, akʼo mi yakal chavichʼik akʼel ta preva, li Diose chakʼ avilik xtok kʼuxi xuʼ xakolik sventa xkuch avuʼunik» (1 Korintios 10:13, Xchʼul Kʼop Dios sventa Achʼ Balumil).

 «Li voʼoxuque muʼyuc to bu chtal ta atojolic tsots preva ti muʼyuc bochʼo cʼotem ta stojol jeche. Yuʼun li Diose mu snaʼ sjel yoʼnton o, jech mu xacʼ taluc ta atojolic tsots preva ti me mu xa stsʼic avuʼunic chile. Jech noxtoc cʼalal oyoxuc ta prevae, jaʼ chacʼ avilic cʼu xʼelan xuʼ chacolic loqʼuel, yuʼun jech chcuch avuʼunic» (1  Korintios 10:13, Xchʼul Cʼop Jtotic Dios, ta skʼop Chenalhó).

 Chakʼ ta ilel jtos stalelal Dios ti kʼupil sba tajeke, jaʼ ti tukʼ yoʼontone. Li yajtuneltake xuʼ spat yoʼontonik ti chkoltaatike, mas to kʼalaluk tsnuptanik tsatsal prevaetik o lajeltsaele.

 «Muʼyuk yan akʼel ta preva chavilik, jaʼ noʼox jech chavilik jech kʼuchaʼal chil li yantike». Bateltike, li yajtuneltak Diose oy kʼusi chtijbat yoʼontonik ta spasel ti chʼabal lek chil li Diose. Li prevaetik taje xuʼ van toj tsotsik tajek, pe jaʼ jech snuptanojik epal krixchanoetik. a Jech oxal, li yajtuneltak Diose xuʼ spat yoʼontonik ti xuʼ stsal yuʼunik kʼusuk noʼox prevail ti snuptanike.

 «Tukʼ li Diose». Xuʼ jpat lek koʼontontik ta stojolal li Jeovae. b Li buchʼutik yakʼojik ta ilel ti skʼanojik li Diose, ti tukʼ yoʼontonik ta stojolale xchiʼuk ti ta xchʼunbeik li smantale, jamal yaloj ti muʼyuk ta xikta komele (Deuteronomio 7:9; Salmo 9:10; 37:28). Jaʼ yuʼun, li yajtuneltak Diose xuʼ spat yoʼontonik ti chkʼot ta pasel li kʼusi chaʼtos chal to batel li ta versikuloe.

 «Muʼyuk chakʼ ti akʼo xavichʼik akʼel ta preva mi mu stsʼik avuʼunike». Li Diose chakʼ ta ilel ti tukʼe ¿kʼuxi? Yuʼun muʼyuk chakʼ ti xil junuk tsatsal preva li yajtunel mi mu xa xkuch yuʼun chile. Xojtikin ti bu kʼalal xkuch yuʼun li jujun yajtunele (Salmo 94:14).

 «Akʼo mi yakal chavichʼik akʼel ta preva, li Diose chakʼ avilik xtok kʼuxi xuʼ xakolik sventa xkuch avuʼunik». Li Diose xuʼ slajesbe skʼoplal li preva o lajeltsael ti tsnuptan li jun yajtunele o moʼoje, xuʼ xakʼbe li koltael chtun yuʼun sventa stsal li kʼusi yakal ta snuptane. Sventa spas yuʼune xuʼ xbeiltasvan ta xchʼul espiritu, xuʼ stunes Vivlia sventa spat oʼontonal o xuʼ stunes yan yajtsʼaklom Kristo sventa xakʼbe li koltael chtun yuʼun li buchʼu yakal chil tsatsal prevae (Juan 14:26; 2 Korintios 1:3, 4; Kolosenses 4:11).

 Li kʼusi chal li teksto liʼe, la stsʼiba jtakbol Pablo sventa li tsobobbail yuʼun yajtsʼaklom Kristo ta Korintoe. Tskʼan ta spʼijubtas li yajtsʼaklomtak Kristo tee. Jech oxal, laj yalbe skʼoplal li voʼneal Israele (1 Korintios 10:11). Li Pabloe chalbe skʼoplal prevaetik xchiʼuk lajeltsael ti la snuptan li j˗israeletike. Jech kʼuchaʼal li yichʼel ta mukʼ lokʼoletike xchiʼuk li mulivajele (1 Korintios 10:6-10). Jlom j˗israeletike pʼajik li ta muliletik taje, jech oxal li jtakbol Pabloe yakal tsvulesbe ta sjol li yajtsʼaklomtak Kristo ti akʼo mu spat yoʼonton ta stukike, yuʼun xuʼ me snuptanik ek li prevaetik taje (1 Korintios 10:12). Li kʼusi chal li 1 Korintios 10:13 tspat oʼontonal, yuʼun chalbe yajtsʼaklomtak Kristo ti xuʼ stsal yuʼunik kʼusuk noʼox prevaile.

 Sventa xavaʼibe smelolal kʼusi chal li Baʼyel sventa Korintiose, kʼelo li video liʼe.