«Bikʼtajeso abaik li ta sjuʼel skʼob Diose sventa stoy akʼoplalik mi sta yoraile, jech xtok, akʼbeik me sbain skotol li kʼusi chavul˗o avoʼontonike, yuʼun oyoxuk ta yoʼonton» (1 Pedro 5:6, 7, Xchʼul Kʼop Dios sventa Achʼ Balumil).

 «Jaʼ yuʼun biqʼuit me xavacʼ abaic ta stojol li Dios ti echʼem stsatsale, jech chayacʼoxuc ta ichʼel ta mucʼ ti cʼalal ta sta yoraile. Acʼbeic sventain Dios scotol li sloʼil avoʼntonique, yuʼun oy ta yoʼnton tscʼan ta scoltaoxuc» (1 Pedro 5:6, 7, Xchʼul Cʼop Jtotic Dios, ta skʼop Chenalhó).

 Li ta tekstoetik liʼe, li jtakbol Pedroe laj yalbe yajtsʼaklomtak Kristo ti xuʼ skʼoponik Dios ta sjunul yoʼontonike, ti xalbeik li svokolike xchiʼuk ti kʼusi tsvul˗o yoʼontonike. Li Diose ep sbalil ta xil li buchʼutik bikʼit yakʼoj sbaike xchiʼuk ta xal ti chkoltavane.

 «Bikʼtajeso abaik li ta sjuʼel skʼob Diose». Li ta Vivliae oy bateltik chal skʼob Dios, kʼalal jech chale, ep ta velta jaʼ chalbe skʼoplal ti oy sjuʼel sventa spojutik xchiʼuk skoltautike (Eksodo 3:19; Deuteronomio 26:8; Esdras 8:22). Li jun yajtsʼaklom Kristo ti sbikʼtajesoj sba li ta sjuʼel skʼob Diose, snaʼoj ti oy noʼox spajeb yuʼun li kʼusitik ta spase xchiʼuk ti mu xuʼ stsal yuʼun stuk li prevaetike, jech oxal, spatoj tajek yoʼonton ta stojolal Dios (Proverbios 3:5, 6; Filipenses 4:13). Xchʼunoj lek ti snaʼoj kʼu yelan chkoltaat yuʼun li Diose xchiʼuk ti jaʼo chkoltaat kʼalal chtun yuʼune (Isaias 41:10).

 «Sventa stoy akʼoplalik mi sta yoraile». Li buchʼu oy smalael yuʼun kʼalal tsnuptan junuk prevae, xuʼ xchʼun ti chkʼot yorail chichʼ toybel skʼoplal yuʼun li Diose, jaʼ xkaltik ti ch˗akʼbat bendision o smotone. Li Diose muʼyuk chakʼ ti xkil-o jvokoltike xchiʼuk xil ti bu kʼalal xkuch kuʼuntike (1 Korintios 10:13). Pe mi jech-o ta jpastik li kʼusi lek chil Diose tsta skʼakʼalil ti tstoy jkʼoplaltike (Galatas 6:9).

 «Akʼbeik me sbain skotol li kʼusi chavul˗o avoʼontonike, yuʼun oyoxuk ta yoʼonton». Li jun yajtsʼaklom Kristoe skʼan bikʼit xakʼ sba kʼalal ta skʼopon li Diose, yuʼun jaʼ jech ta xakʼbe sbain Dios li kʼusi tsvul˗o yoʼontone. Xi chal jlik livroe: «Kʼalal akʼbo sbain xie, jaʼ la skʼoplal kʼalal chkakʼtik persa ti oy kʼusi nom ta jiptik batele, ti yolbaj ta jpastike». Kʼalal chakʼbe sbain Dios skotol kʼusi tsvul˗o yoʼonton li jun yajtsʼaklom Kristoe, mu xa bu xvulvun yoʼonton, vaʼun tsta ‹li jun oʼontonal yuʼun Diose› (Filipenses 4:6, 7). Jech, yuʼun jchʼunojtik ti oyutik ta yoʼontone xchiʼuk ti tstunes svuʼel sventa skoltautike (Salmo 37:5; 55:22).

 Li ta kapitulo 5 jaʼ te tstsuts li baʼyel karta la stsʼibabe batel yajtsʼaklomtak Kristo li jtakbol Pedroe (1 Pedro 1:1). Jech kʼuchaʼal li avie, li yajtsʼaklomtak Kristo ta baʼyel sigloe oy kʼusitik la snuptanik ti jaʼ akʼbat ta preva li xchʼunel yoʼontonike xchiʼuk ti laj van svul˗o yoʼontonike (1 Pedro 1:6, 7). Li Pedroe snaʼoj ti yakal tsots ta xil svokolik li yajtsʼaklomtak Kristoe, jaʼ yuʼun la stsʼiba batel jlik karta sventa spatbe yoʼonton li yajtsʼaklomtak Kristoe. Li karta taje te van laj yichʼ tsʼibael ta sjabilaltik 62 kʼalal ta 64 kʼalal talem xa ox li Jesuse (1 Pedro 5:12).

 Li Pedroe la spatbe yoʼonton li yajtsʼaklomtak Kristo ti la snuptanik preva ta skoj xchʼunel yoʼontonike. Jaʼ yuʼun, oy kʼusitik la svulesbe ta sjol li ta stsutseb skartae. Jech xtok, sventa xkoltaatik˗o yuʼun li Diose skʼan bikʼit xakʼ sbaik xchiʼuk spat yoʼontonik ta stojolal (1 Pedro 5:5-10). Li kʼusi laj yal Pedroe xuʼ xpatbat yoʼontonik ek li yajtsʼaklomtak Kristo ti chichʼik kontrainel li avie.

 Sventa xavaʼibe smelolal kʼusi chal li Baʼyel Skarta Pedroe, kʼelo li video liʼe: