«Li Diose maʼuk chakʼbutik chʼul espiritu sventa xiʼel, moʼoj, yuʼun chakʼ juʼelal, kʼanelal xchiʼuk lekil nopbenal» (2 Timoteo 1:7, Xchʼul Kʼop Dios sventa Achʼ Balumil).

«Li Diose maʼuc laj yacʼbutic espíritu sventa xiʼel. Jaʼ laj yacʼbutic Espíritu sventa chacʼ stsatsal coʼntontic, xchiʼuc chacʼ chijcʼanvan, xchiʼuc jnaʼ spajesel jbatic» (2 Timoteo 1:7, Xchʼul Cʼop Jtotic Dios, ta skʼop Chenalhó).

Li Diose xuʼ skolta jun krixchano sventa jaʼuk spas li kʼusi leke. Li Diose mu skʼan ti xijxiʼutike, yuʼun li xiʼele jaʼ tspajesutik sventa mu jpastik li kʼusi lek chile.

Li ta versikulo liʼe chalbe skʼoplal oxtos talelal ti chakʼbutik Dios ti jaʼ tskoltautik sventa jtsaltik li xiʼele. Jkʼeltik batel jujutos.

«Juʼelal». Li yajtsʼaklomtak Kristoe jech-o tunemik ta stojolal Dios akʼo mi snuptanik vokoliletik xchiʼuk tsatsal kontrainel. Tsots-o yoʼontonik xchiʼuk muʼyuk chibajemik (2 Korintios 11:23-27). ¿Kʼuxi xuʼ jech spas yuʼunik taje? Li jtakbol Pabloe xi laj yale: «Oy jtsatsal sventa jpas skotol ta skoj li buchʼu chakʼbun juʼele» (Filipenses 4:13). Li Diose xuʼ xakʼbe yajtuneltak li «juʼelal ti mu kʼusi xkoʼolaj-oe» sventa stsalik kʼusiuk vokolil (2 Korintios 4:7).

«Kʼanelal». Kʼalal skʼanoj tajek Dios li jun yajtsʼaklom Kristoe, chakʼ tajek persa sventa mu kʼusi xmakat-o ta spasel li kʼusi leke. Jech noxtok, kʼalal skʼanoj tajek yantik li jun yajtsʼaklom Kristoe, jaʼ baʼyel ta skʼel li kʼusi chtun yuʼun yantike manchuk mi oy kʼusi xibal sba snuptan o xichʼ kontrainel (Juan 13:34; 15:13).

«Lekil nopbenal». Li ta Vivliae jaʼ chalbe skʼoplal li stalelal jun yajtsʼaklom Kristo ti lek kʼusi chkʼot ta nopel yuʼun ta skoj ti tstsak ta venta li kʼusi chal Vivliae. Lek kʼusi chkʼot ta nopel yuʼun xtok akʼo mi oy kʼusitik vokol tsnuptan. Jech xtok, kʼalal oy kʼusitik tsnop tspase jaʼ tstsak ta venta ti kʼu yelan tsnop li Diose, yuʼun jaʼ mas tsots skʼoplal chaʼi ti lekuk xil sba xchiʼuke.

Li xchibal karta sventa Timoteo ti te oy ta Vivliae, jaʼ jlik karta ti la stsʼiba li jtakbol Pablo sventa stakbe batel Timoteo ti jaʼ yuni amigo xchiʼuk xchiʼil ta abtele. Tee, li jtakbol Pabloe la stijbe yoʼonton li kerem Timoteo sventa xakʼ yipal bu kʼalal xuʼ yuʼun ta spasbel yabtel Diose (2 Timoteo 1:1, 2). Yikʼaluk van stsʼijet noʼox li Timoteoe xchiʼuk xuʼ jaʼ xmakat-o sventa muʼyuk kʼusi mas spas li ta tsobobbaile (1 Timoteo 4:12). Jaʼ yuʼun, li Pabloe la svulesbe ta sjol Timoteo ti akʼbil jun matanale, ti tskolta li tsobobbaile. Jech xtok, la stijbe yoʼonton ti mu xchibaje, ti skʼan spas yabtel kʼuchaʼal mol ta tsobobbaile, ti mu xikta ta yalel li lekil aʼyejetike xchiʼuk ti mu xkʼunib li xchʼunel yoʼonton akʼo mi snuptan vokoliletik (2 Timoteo 1:​6-8).

Akʼo mi jaʼ laj yichʼ tsʼibabel batel Timoteo li kʼusi laj xa yichʼ alele, xuʼ stabeik sbalil skotol li buchʼutik tskʼan chtunik ta stojolal Diose, yuʼun jamal chalbe ti chakʼbe li kʼusitik chtun yuʼunik mu ventauk mi snuptanik vokoliletik.