«Tskusbat skotol yaʼlel satik yuʼun li Diose, muʼyuk xa lajelal, muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik. Jelav xa skʼoplal skotol li kʼusitik oy toʼoxe» (Apokalipsis 21:4, Xchʼul Kʼop Dios sventa Achʼ Balumil).

 «Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque» (Apokalipsis 21:4, Xch’ul C’op Jtotic Dios, ta skʼop Chenalhó).

 Li Diose maʼuk noʼox tslajesbe skʼoplal li vokolile xchiʼuk li kʼusi kʼux chkaʼitike, yuʼun tslajesbe skʼoplal xtok li kʼusi chakʼ jvokoltike.

 «Tskusbat skotol yaʼlel satik». Taje chakʼ ta ilel ti ta onoʼox xkʼot ta pasel yuʼun Jeova a li kʼusi xi la stsʼiba j˗alkʼop Isaiase: «Ta skus lokʼel skotol yaʼlel satil» (Isaias 25:8; Apokalipsis 7:17). Li kʼusi chale jamal chakʼ ta ilel ti oy ta yoʼonton Dios li buchʼutik x˗okʼoletik ta skoj ti oy buchʼu chamem yuʼunike o ta skoj yan vokolil.

 «Muʼyuk xa lajelal». Taje xuʼ xi xichʼ jelubtasel xtoke: «Chchʼay skʼoplal li lajelale» o «Muʼyuk xa buchʼu chcham». Li Diose yaloj ti chchʼaybe skʼoplal li lajelale xchiʼuk li vokolil chakʼe. Yaloj xtok chchaʼkuxi li animaetike (1 Korintios 15:21, 22). Jaʼ yuʼun, chichʼ lajesel li lajelale (1 Korintios 15:26).

 «Muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik». Taje jaʼ skʼan xal ti chchʼay skʼoplal li kʼusi chakʼ jvokoltik ta jnopbentik, ta koʼontontik xchiʼuk li kʼusi kʼux˗ip chkaʼitik ta skoj li mulile b (Romanos 8:21, 22). Maʼuk me skʼoplal ti muʼyuk xa kʼusi kʼux chkaʼitike, jaʼ xkaltik, ti muʼyuk kʼusi kʼux chkaʼitik o kʼalal oy bu ta jyayijes jbatike.

 «Jelav xa skʼoplal skotol li kʼusitik oy toʼoxe». Taje chakʼ ta ilel ti ep tajek kʼusi chjel ta tsʼakal ta stojolal li krixchanoetike. Xi chal jlik livroe: «Ta voʼnee nopem toʼox xkaʼi ta jkuxlejaltik ti oy lajelal, at˗oʼonton, okʼel xchiʼuk kʼusi kʼux˗ipe, pe chichʼ achʼubtasel skotol». Vaʼun, li krixchanoetike jaʼ to me tskʼupin xkuxlejalik sbatel osil liʼ ta balumil jech kʼuchaʼal snopoj onoʼox Dios ta slikebale (Jenesis 1:27, 28).

 Li ta slikebal kapitulo 21, te laj yal jtakbol Juan li kʼusi la sta ta ilele: «Laj kil jun achʼ vinajel xchiʼuk jun achʼ balumil» (Apokalipsis 21:1). Sventa xakʼ ta aʼiel ti ep tajek kʼusi chjele, laj yal ti ch˗achʼub li vinajel xchiʼuk balumile, ti oy xa onoʼox jech yaloj li Vivliae (Isaias 65:17; 66:22; 2 Pedro 3:13). Li achʼ vinajele jaʼ skʼoplal li Ajvalilal yuʼun Dios te ta vinajele, ti jaʼ ch˗och ta xkʼexol li ajvaliletik liʼ ta balumile. Li achʼ balumile jaʼik li buchʼutik chkuxiik liʼ ta balumile, ti jaʼ chventainatik yuʼun li Ajvalilal yuʼun Dios (Isaias 65:21-23).

 ¿Kʼuxi jnaʼtik ti jaʼ chkʼot ta pasel liʼ ta balumile? Baʼyel, xi chlik yal Dios li kʼusi tspase: «Te oy ta stojolal krixchanoetik li skarpana Diose» (Apokalipsis 21:3). Taje maʼuk chkʼot ta pasel ta stojolal li anjeletik te ta vinajele, jaʼ chkʼot ta pasel ta stojolalik li buchʼutik liʼ nakalik ta balumile. Xchibal, laj yichʼ alel ti ‹muʼyuk xa lajelale› (Apokalipsis 21:4). Li ta vinajele muʼyuk onoʼox lajelal, jaʼ noʼox kiloj jvokoltik ta skoj lajelal liʼ ta balumile (Romanos 5:14). Jaʼ yuʼun, sta˗o ti chkaltik ti jaʼ chkʼot ta pasel liʼ ta balumile.

 Sventa xavaʼibe smelolal li kʼusi chal li slivroal Apokalipsise, kʼelo li video liʼe.