«Kuxul li skʼop Diose, oy sjuʼel, jaʼ mas tsʼubtsʼub sniʼ kʼuchaʼal li espada ti chaʼjot yee, tsliʼ ochel jaʼ to mi chʼak yuʼun li jpat jxokontike xchiʼuk li yut koʼontontike, tsliʼ ochel jaʼ to mi chʼak yuʼun li jbakiltik xchiʼuk xchinabile, jech xtok, xuʼ yuʼun chchaj ta kʼelel li jnopbentik xchiʼuk li kʼusi oy ta koʼontontike» (Ebreos 4:12, Xchʼul Skʼop Dios sventa Achʼ Balumil).

 «Li scʼop Diose cuxul, oy stsatsal, echʼem to jech chtuchʼ jelovel yuʼun jech chac cʼu chaʼal espada ti chaʼjot lec yee. Ch-och cʼalal to ta yut jol coʼntontic. Tsliʼ jelovel cʼalal to ta jtsʼacaliltic, cʼalal to ta jchʼuxuviltic. Xchiʼuc snaʼ cʼusi oy ta coʼntontic, xchiʼuc cʼusitic ta jnoptic» (Ebreos 4:12, Xch’ul C’op Jtotic Dios, ta sk’op Chenalhó).

 Li kʼusi tskʼan chalbutik Dios ti te tsakal ta Vivliae, chakʼ ta ilel li kʼusi oy ta koʼontontik ta melele xchiʼuk li kʼusi ta jnoptike.Jech xtok, tskoltautik sventa xlekub jtalelaltik.

 «Kuxul li skʼop Diose». Li skʼop Diose jaʼ skʼan xal li kʼusitik yaloj tspas Dios o li kʼusitik oy ta yoʼonton ti te ta jtatik ta Vivliae. a Jtos li kʼusi oy ta yoʼonton Diose jaʼ ti chkuxiik sbatel osil ta balumil li buchʼutik chchʼunik mantale, ti bu oy jun oʼontonal xchiʼuk ti jmoj xa noʼox oyike (Jenesis 1:28; Salmo 37:29; Apokalipsis 21:3, 4).

 ¿Kʼusi skʼan xal ti «kuxul» li skʼop Diose? Jtose jaʼ ti buchʼutik chchʼamik li kʼusi chale ch˗akʼbat spatobil yoʼontonik xchiʼuk mas xa oy sbalil li xkuxlejalike (Deuteronomio 30:14; 32:47). Jech xtok, kuxul li skʼop Diose ta skoj ti yakal˗o ch˗abtej Dios sventa xkʼot ta pasel skotol li kʼusitik yaloje (Juan 5:17). Li Diose mu xkoʼolaj kʼuchaʼal li krixchanoutike yuʼun mu xchʼay xaʼi li kʼusitik yaloj tspase o ti jaʼ to chakʼ venta ta tsʼakal ti mu tspas yuʼune (Numeros 23:19). Xi onoʼox yaloj stuk li Diose: «Jaʼ jech chkʼot ta pasel ek li kʼusi chlokʼ ta kee. Muʼyuk tsut tal ta jtojolal mi muʼyuk kʼotem ta pasele» (Isaias 55:10, 11).

 «Li skʼop Diose, [...] oy sjuʼel». Kʼalal oy sjuʼel xie, xuʼ xichʼ jelubtasel xtok kʼuchaʼal «oy lek yipal», «ti jtunele» o «ti xkʼot ta pasel yuʼun li kʼusi skʼan pasele». Jaʼ yuʼun, skotol li kʼusi yaloj Jeovae b persa chkʼot ta pasel (Salmo 135:6; Isaias 46:10). Ta melel, li Diose oy kʼusitik tspas ti xuʼ van muʼyuk jech jnopojtik sventa xkʼot ta pasel li kʼusi yaloje (Efesios 3:20). c

 Jech xtok, li skʼop Diose «oy sjuʼel», yuʼun li buchʼutik ep sbalil chilik li kʼusi chale chkoltaatik sventa xlekub stalelalik xchiʼuk xkuxlejalik. Li chanubtaseletik yuʼun Diose ch˗abtej ta xkuxlejalik, jaʼ xkaltik, xjelbat li kʼusi tsnopike,ti kʼu yelan xkuxlejalike xchiʼuk li kʼusi oy ta yoʼontonik spasele (Romanos 12:2; Efesios 4:24). Jech oxal, xuʼ xkaltik ti «skʼop Diose […] yakal ch˗abtej ta stojolalik» li buchʼutik chchʼunik ti likem talel ta stojolal Diose (1 Tesalonisenses 2:13).

 «Li skʼop Diose […] jaʼ mas tsʼubtsʼub sniʼ kʼuchaʼal li espada ti chaʼjot yee». Xkaltik noʼoxe, li skʼop Diose mas to tsʼubtsʼub sniʼ kʼuchaʼal junuk espada, yuʼun chkʼot kʼalal to yutil koʼontontik, jaʼ xkaltik, ti kʼu kelantik ta melele. Mu xpas yuʼun jech jtosuk chanubtasel ti chal li krixchanoetike. Taje jaʼ li kʼusi chalbe onoʼox skʼoplal li Ebreos 4:12 ti ta to jkʼeltik batele.

 «Li skʼop Diose [...] tsliʼ ochel jaʼ to mi chʼak yuʼun li jpat jxokontike xchiʼuk li yut koʼontontike, tsliʼ ochel jaʼ to mi chʼak yuʼun li jbakiltik xchiʼuk xchinabile». Li Skʼop Dios ti xkoʼolaj ta jun espadae ch˗och kʼalal to ta xchinabil koʼontontik, jaʼ xkaltik, li kʼusi ta jnoptike xchiʼuk li kʼusi chkaʼitik ta koʼontontike. Li chanubtaseletik chakʼ Jeovae chakʼ ta ilel ti kʼu kelantik ta melele, vaʼun tstij koʼontontik sventa jlekubtas jtalelaltik. Kʼalal jech ta jpastike, xijmuyubaj noʼox xchiʼuk chmuyubaj li Jpasvanej kuʼuntike.

 «Li skʼop Diose [...] xuʼ yuʼun chchaj ta kʼelel li jnopbentik xchiʼuk li kʼusi oy ta koʼontontike». Ti kʼu yelan chchʼam skʼop Dios li jun krixchanoe jaʼ te chvinaj li kʼusi tsnope xchiʼuk li kʼusi chtijbat˗o yoʼonton kʼalal oy kʼusi tspase. Jech kʼuchaʼal liʼe, kʼalal lek chchʼam skʼop Dios li jun krixchano xchiʼuk ti tsjel xkuxlejale chakʼ ta ilel ti bikʼit yakʼoj sbae xchiʼuk tskʼan ti xmuyubaj yuʼun li Diose. Pe kʼalal oy buchʼu jaʼ noʼox tsaʼ mi oy kʼusi muʼyuk lek chal li skʼop Diose chakʼ ta ilel ti muʼyuk lek stalelale, jech kʼuchaʼal ti jtoybae o ti jaʼ noʼox tsaʼ li kʼusi lek chaʼi stuke. Yikʼaluk van jaʼ noʼox tspak skʼoplal sventa spas li kʼusi chopol chil Diose (Jeremias 17:9; Romanos 1:24-27).

 Jlik vune chal ti skʼop Diose «chkʼot kʼalal to ta yutik koʼontontik». Li Diose xil li kʼusi oy ta yutil koʼontontike, jaʼ yuʼun, muʼyuk kʼusi nakʼal chkom. Xi chal Ebreos 4:13: «Lek chajal ta sat. Xil skotol li buchʼu ta persa ta jchapbetik li kʼusi ta jpastike».

 Li slivroal Ebreose jaʼ jlik karta ti laj yakʼ ta naʼel Diose, jaʼ la stsʼiba li jtakbol Pablo tetik van ta sjabilal 61 xchiʼuk jaʼ la stsʼibabe batel li jchʼunolajeletik ti jaʼik judaetik ti te nakalik ta Jerusalen xchiʼuk ta Judeae.

 Li ta kapitulo 3 xchiʼuk 4, li Pabloe laj yalbe skʼoplal li kʼusi chopol la spasik li j˗israeletik ta voʼnee, laj yal ti jaʼ chtun ta spʼijubtaselik li yajtsʼaklomtak Kristoe (Ebreos 3:8-12; 4:11). Li Jeovae laj yalbe j˗israeletik ti tspojanan lokʼel ta mosoinel xchiʼuk ti chikʼanan batel ta jun balumil ti bu jun xa yoʼontonike (Deuteronomio 12:9, 10). Pe li j˗israeletik ti kolik lokʼel ta Ejiptoe ep ta velta laj yakʼik ta ilel ti muʼyuk xchʼunel yoʼontonike xchiʼuk nop xaʼiik ti tstoy sbaik ta stojolal li Diose. Ta skoj taje, muʼyuk ochik li ta xkuxobil yoʼonton Diose, jaʼ xkaltik, muʼyuk lek laj yil sbaik xchiʼuk, vaʼun te chamik li ta takixokol balumile. Akʼo mi laj onoʼox yuʼuninik Albil Balumil li snitilulal j˗israeletike, ep ta velta la stoy sbaik ta stojolal Jeova ek. Ta mas tsʼakale, tsots laj yil svokolik (Neemias 9:29, 30; Salmo 95:9-11; Lukas 13:34, 35).

 Li Pabloe laj yal ti yajtsʼaklomutik Kristoe skʼan ti mu jechuk jpastik kʼuchaʼal li j˗israeletike. Li voʼotike xuʼ me xij˗och li ta xkuxobil yoʼonton Dios mi ta jchʼuntik li kʼusi chal skʼop Diose xchiʼuk mi jchʼunojtik lek ti chkʼot ta pasel li kʼusi yaloje (Ebreos 4:1-3, 11).

 Sventa xavaʼibe smelolal kʼusi chal li Karta sventa Ebreose, kʼelo li video liʼe: