«Chavichʼ atsatsalik kʼalal mi vul ta atojolalik li chʼul espiritue, vaʼun chavalik batel jkʼoplal ta Jerusalen, ta sjunul Judea, ta Samaria xchiʼuk kʼalal to ta namal balumil» (Echos 1:8, Xchʼul kʼop Dios sventa Achʼ Balumil).

 «Cʼalal me laj avichʼic li Chʼul Espiritue, chavichʼic avuʼel atsatsalic. Jech voʼoxuk chavalic batel liʼ ta lum Jerusalen, xchiʼuc ta yosilal Judea, xchʼiuc ta Samaria banamil, xchiʼuc ta sbejel banamil li cʼusi laj avilic ta jventae» (Hechos 1:8, Xchʼul cʼop Jtotic Dios).

 Li Jesuse laj yalbe yajchankʼoptak ti ch˗akʼbat stsatsalik o sjuʼelik yuʼun li s˗espiritu Dios yoʼ xcholik mantal kʼalal to ta namal balumile.

 «Chavichʼ atsatsalik kʼalal mi vul ta atojolalik li chʼul espiritue». Li Jesuse laj yalbe komel yajchankʼoptak ti mi bat ta vinajele, ch˗akʼbatik tal chʼul espiritu a yuʼun Dios sventa xkoltaatik (Juan 14:16, 26). Li ta sjabilal 33 kʼalal jelavem xa ox lajuneb kʼakʼal smuyel ta vinajel li Jesuse, li yajchankʼoptake akʼbatik li xchʼul espiritu Diose (Echos 2:1˗4). Li chʼul espiritue koltaatik sventa xkʼopojik ta yantik kʼopetik xchiʼuk ti spasik skʼelobil juʼelale. Pe maʼuk noʼox, yuʼun akʼbat stsatsal yoʼontonik sventa xalik li kʼusi xchʼunojik ta stojolal li Jesuse (Echos 3:1˗8; 4:33; 6:8˗10; 14:3, 8˗10)

 «Chavalik batel jkʼoplal». Ti jech chichʼ alel taje, jaʼ skʼan xal ti «yiloj ta sat stukik o ti xkuxlebinojik li kʼusitik kʼotem ta pasele». Li jtakboletike laj yil ta sat stukik li kʼusi la spas li Jesuse, laj yilik li kʼusitik la spas ta cholmantale, ti kʼu yelan laj yichʼ milele xchiʼuk ti chaʼkuxie (Echos 2:32; 3:15; 5:32; 10:39). Li kʼusi laj yal li jtakboletike jaʼ tijbat˗o yoʼontonik li yan krixchanoetik yoʼ xchʼunik ti jaʼ Kristo li Jesuse, ti jaʼ li Mesias ti albil onoʼox skʼoplal chtale (Echos 2:32˗36, 41). Li buchʼutik la xchʼunike kʼotik ta yajtsʼaklomtak Jesus. Vaʼun, lik yalbeik batel skʼoplal kʼu yelan echʼ xkuxlejal Jesus, ti kʼuxi cham xchiʼuk ti kʼuxi chaʼkuxie (Echos 17:2,3; 18:5).

 «Kʼalal to ta namal balumil». Kʼalal chal «kʼalal to ta namal balumil» xie, xuʼ xichʼ jelubtasel xtok kʼuchaʼal «ta yantik mukʼtik lumetik». Ti jech laj yal li Jesus taje, jaʼ skʼan xal ti nom to bu chbat xcholik mantale. Maʼuk noʼox te chcholik mantal ta Judea xchiʼuk ta Samaria. Yuʼun mas to nom xchiʼuk mas to ep buchʼutik chcholbeik mantal kʼuchaʼal li Jesuse (Mateo 28:19; Juan 14:12). Kʼalal mu toʼox sta 30 jabil ti jech laj yal li Jesuse, li jtakbol Pabloe laj yal ti lekil aʼyejetike «laj xa yichʼ cholbel skotol li kʼusitik pasbil ti oy ta yolon vinajele». Yuʼun yichʼoj xa ox cholel mantal ta namal lumetik jech kʼuchaʼal ta Roma, Partia xchiʼuk ta snorteal África (Kolosenses 1:23; Echos 2:5, 9˗11).

 Li Echose snitojbe sba skʼoplal xchiʼuk li evanjelio yuʼun Lukase (Lukas 24:44˗49; Echos 1:4, 5). Li buchʼu la stsʼiba li slivroal Echose jaʼ li Lukase. Li ta slikebaltik Echose te chal li chaʼkuxi li Jesuse xchiʼuk ti laj yakʼ sba ta ilel ta stojolal li yajchankʼoptake (Echos 1:1˗3). Ta mas jelavele, te laj yal kʼuxi chʼi talel li stsobobbail yajtsʼaklom Kristoe xchiʼuk ti kʼuxi epaj ta sjabilal 33 kʼalal to ta sjabilal 61 (Echos 11:26).

 Li yajchankʼoptake baʼyel xa onoʼox la sjakʼbeik Jesus mi ch˗och ta Ajvalil li ta Ajvalilal yuʼun Dios li vaʼ orae (Echos 1:6). Albatik ti mu xat˗o yoʼontonik taje (Echos 1:7). Jech xtok, albatik ti jaʼuk xakʼ ta yoʼontonik spukbeik batel skʼoplal kʼalal to ta namal balumile (Echos 1:8). Li yajtsʼaklomtak Kristo avi kʼakʼale jaʼ jech tspasik ek, yuʼun baxbolik ta cholel li lekil aʼyejetik sventa li Ajvalilal yuʼun Diose (Mateo 24:14).

 Sventa xavaʼibe smelolal kʼusi chal li slivroal Echose, kʼelo li video liʼe.