«Li Diose skotol kʼupil sba spasoj xchiʼuk ta yorail noʼox spasoj. Jech xtok, yakʼojbe ta yoʼonton krixchanoetik ti xuʼ xkuxiik sbatel osile; akʼo mi jech, muʼyuk onoʼox tstaik ta ojtikinel lek li yabtel skʼob Dios ti la spas ta slikeb kʼalal to ta slajebale» (Eklesiastes 3:11, Xchʼul Kʼop Dios sventa Achʼ Balumil).

 «Toj lec cʼupil sba la spas scotol li Diose; lec oy yorail la yacʼbe. Jech noxtoc laj yacʼbe ta yoʼnton cristianoetic ti muʼyuc spajeb cʼusitic tspas li Diose, [o «yakʼojbe ta yoʼonton krixchanoetik ti xuʼ xkuxiik sbatel osile», (Reina-Valera, 1960)], acʼo me mu xlaj yotquinic scotol li cʼusi spasoj Dios ta sliqueb xchiʼuc cʼalal to ta slajebe» (Eclesiastés 3:11, Xchʼul Cʼop Jtotic Dios, ta skʼop Chenalhó).

 «Li Diose skotol kʼupil sba spasoj xchiʼuk ta yorail noʼox spasoj». Kʼalal kʼupil sba xi jelubtasbile, bateltike li ta ebreoe, maʼuk noʼox skʼan xal ti kʼupil sba li spat xokone. Xuʼ van xi chichʼ jelubtasel xtoke, «lek chapanbil» (Eklesiastes 3:11, tsʼib ta yok vun). Kʼalal chal ti kʼupilik sba li kʼusitik spasoj li Diose, jaʼ skʼoplal li spasbentake, pe maʼuk noʼox taje. Yuʼun te smakojbe skʼoplal li kʼusi tspas sventa xkʼot ta pasel li kʼusi skʼan yoʼontone (Daniel 2:21; 2 Pedro 3:8; Apokalipsis 4:11).

 «Yakʼojbe ta yoʼonton krixchanoetik ti xuʼ xkuxiik ta sbatel osile». Kʼalal la spas krixchanoetik li Diose, jaʼ sventa xkuxiik sbatel osil (Salmo 37:29). Jaʼ jech la stikʼ ta koʼontontik ek ti ta jkʼan chijkuxi sbatel osile. Pe li baʼyel jtot jmeʼtik ti jaʼik li Adan xchiʼuk Evae muʼyuk la xchʼunbeik smantal li Diose, ta skoj taje chamik xchiʼuk chchamik li yalab xnichʼnabike (Jenesis 3:17-19; Romanos 5:12). Akʼo mi jech, li Diose oy ta yoʼonton chakʼbe kʼusi tskʼan yoʼontonik skotol li kʼusitik kuxajtike: jech kʼuchaʼal ti ta jkʼan chijkuxiutik sbatel osile (Salmo 145:16). Li Vivliae chal li kʼusi spasoj Jeova a sventa jtatik li kuxlejal sbatel osile (Romanos 6:23).

 «Muʼyuk onoʼox staik ta ojtikinel lek li yabtel skʼob Dios ti la spas ta slikeb kʼalal to ta slajebale». Li Vivliae chal ti spʼijil Diose mu xlaj ta aʼibel smelolal, yuʼun muʼyuk spajeb (Romanos 11:33). Manchuk mi jech, li Diose oy ta yoʼonton chakʼbe snaʼ kʼusitik snopoj tspas li buchʼutik oy ta yoʼontonik xchʼunbeik smantal Diose (Amos 3:7).

 Li slivroal Eklesiastese jaʼ la stsʼiba jun ajvalil ta voʼneal Israel ti lek ojtikinbil ti oy spʼijil akʼbatem yuʼun Diose, ti jaʼ sbi Salomone. Li livro taje, yichʼoj mantaletik sventa li kʼusitik chtun ta jkuxlejaltike xchiʼuk li kʼusitik muʼyuk chtun kuʼuntike (Eklesiastes 1:2, 3; 2:1, 17; 7:1; 12:1, 13). Li ta kapitulo 3, li Salomone chalbe skʼoplal junantik li kʼusitik tspas ta xkuxlejal li jun krixchanoe xchiʼuk li jeltos abtelaletik tspase (Eklesiastes 3:1-8, 10). Li Diose yakʼojbe snop stuk krixchanoetik kʼusi abtelal skʼan spasik xchiʼuk bakʼin tspasik (Deuteronomio 30:19, 20; Josue 24:15). Li Salomone laj yal xtok kʼuxi xuʼ skʼupinik li yabtel yok skʼobike, chal ti xuʼ la jkʼupintik mi ta jtsaktik ta venta «ti akʼbil yorail skotol yuʼun li Diose» xchiʼuk ti jmoj xij˗abtej xchiʼuke. Mi jech la jpastike, xuʼ jkʼupintik li matanal yuʼun Diose (Eklesiastes 3:1, 12, 13).

 Sventa xavaʼibe smelolal kʼusi chal li slivroal Eklesiastese, kʼelo li video liʼe: