«Mu me kʼusi xavul-o avoʼontonik jsetʼuk, jaʼ lek albeik Dios ta orasion li kʼusi chavul-o avoʼontonike, ta sjunul avoʼontonik xakʼanik vokol xchiʼuk tojik ta vokol kʼalal chapasik orasione; vaʼun li jun oʼontonal yuʼun Dios ti toj echʼ xa noʼox lek ti jaʼ mu sta li snopben krixchanoetike chchabi avoʼontonik xchiʼuk anopbenik ta stojolal li Kristo Jesuse» (Filipenses 4:6, 7, Xchʼul Kʼop Dios sventa Achʼ Balumil).

 «Mu me cʼusi xloʼilaj avoʼntonic yuʼun. Me oy cʼusi scʼan avuʼun chavaʼyique, cʼanbeic Dios, vocoletanic ta stojol, xchiʼuc tojbeic ta vocol. Jech chaspasboxuc o ta jun avoʼntonic li Diose. Li jun oʼntonal chacʼ Diose echʼem to xjelov jech chac cʼu chaʼal ta jnop ta jcʼantic li vuʼutique, jaʼ chaxchabiboxuc avoʼntonic xchiʼuc cʼusitic chanopic ta sventa ti avichʼojic ta mucʼ li Cristo Jesuse» (Filipenses 4:6, 7, Xchʼul Cʼop Jtotic Dios, ta skʼop Chenalhó).

 Li krixchanoetik ti xchʼunojik ti oy Diose xuʼ skʼoponik sventa xalbeik li kʼusi tsvul-o yoʼontonike sventa sta xkuxetel yoʼontonik. Li Diose jamal yaloj ti ch-akʼbatik li jun oʼontonale ti jaʼ chkoltaatik-o sventa stsal yuʼunik li vul oʼontone, ti chchabibat li snopben xchiʼuk yoʼontonike, jaʼ xkaltik li kʼusi tsnopik xchiʼuk ti kʼu yelan chaʼi sbaike. Li ta versikulo 6 te chal junantik li kʼusi xuʼ xkal ta j-orasiontik sventa jtatik li jun oʼontonale.

 Kʼalal kʼanik vokol xie, jaʼo kʼalal xijvokolet xchiʼuk ti ta sjunul koʼontontik ta jkʼanbetik koltael Dios ti akʼo skoltautike. Jech kʼuchaʼal liʼe, xuʼ jkʼanbetik vokol Dios ti akʼo skoltautik kʼalal sujomutik xchiʼuk ti mu xa jnaʼ kʼusi ta jpastike o kʼalal oy kʼusi xibal sba ta jnuptantike, jech kʼuchaʼal xvokolet la spas orasion li Jesuse (Ebreos 5:7). Pe skʼan me jech-o xijvokolet ta stojolal Dios, mu jkojuk noʼox.

 Kʼalal albeik Dios ta orasion li kʼusi chavul-o avoʼontonik xie, jaʼo kʼalal oy kʼusi ta jkʼanbetik li Diose. Mu ventauk kʼusi jnuptantik, xuʼ jkʼopontik «skotol ora», pe teuk ta joltik ti jaʼ jech skʼan jpastik kʼuchaʼal tskʼan yoʼonton li Diose, jaʼ xkaltik, ti kʼu yelan chchanubtasvan li Vivliae (1 Juan 5:14).

 Kʼalal ta jtojtik ta vokol xie, jaʼo kʼalal chkalbetik Dios ti ta jtojbetik ta vokol skotol li kʼusi spasoj o tspas ta jtojolaltike. Kʼalal chkakʼ ta koʼontontik stojel ta vokole, mas lek kʼusitik ta jnoptik xchiʼuk xijmuyubaj noʼox (1 Tesalonisenses 5:16-18).

 ¿Kʼuxi tstakʼ j-orasiontik li Diose? Jaʼ kʼalal chakʼbutik jun oʼontonale. «Li jun oʼontonal yuʼun Diose» jaʼ skʼan xal ti lek chkil jbatik xchiʼuke, vaʼun jun noʼox koʼonton chkaʼi jbatik (Romanos 15:13; Filipenses 4:9). Li jun oʼontonal taje, «toj echʼ xa noʼox lek ti jaʼ mu sta li snopben krixchanoetike», yuʼun likem tal ta stojolal Dios xchiʼuk xuʼ skoltautik ti muʼyuk bu jech jnopojtik tskoltautike.

 Li ta teksto liʼe, chal ti xuʼ xchabi koʼontontik li jun oʼontonal yuʼun Diose. Li ta griego kʼope xi jelubtasbile «chchabi» o «tskʼel», taje te nitil skʼoplal xchiʼuk li kʼusi tspas li soltaroetik kʼalal chabiik li jun jteklum ti joyol ta muroe. Jaʼ jech li jun oʼontonal yuʼun Dios eke ta xchabi li jnopbentik xchiʼuk li koʼontontike, jaʼ xkaltik, li kʼusi ta jnoptik xchiʼuk ti kʼu yelan chkaʼi jbatike xchiʼuk tskoltautik sventa mu stsalutik li vul oʼonton xchiʼuk li vokoliletike.

 Li jun oʼontonal yuʼun Diose ta xchabiutik ta «stojolal li Kristo Jesuse», yuʼun jaʼ ta stojolal xuʼ xijkʼot ta yamigo li Diose. Li Jesuse laj yakʼ xkuxlejal sventa spojutik lokʼel li ta mulile, jaʼ yuʼun mi oy xchʼunel koʼontontik ta stojolale xuʼ jkʼupintik li bendisionetik chakʼ Diose (Ebreos 11:6). Jech xtok, li Jesuse jaʼ xuʼ sbeiltasutik sventa xuʼ xijnopaj xchiʼuk jkʼopontik li Jeovae. Li Jesuse xi laj yale: «Muʼyuk buchʼu xuʼ xtal ta stojolal li totile jaʼ noʼox ta jventa» (Juan 14:6; 16:23).

 Li slivroal Filipensese jaʼ la stsʼiba jtakbol Pablo sventa li yajtsʼaklomtak Kristo ti te toʼox nakalik ta jteklum Filipose. a Li ta kapitulo 4, laj yal Pablo ti akʼo muyubajikuk noʼoxe, jech xtok la stoj ta vokol li slekil yoʼontonike xchiʼuk laj yalanbe ti jaʼ xmuyubaj-o ti oy slekil yoʼontonike (Filipenses 4:4, 10, 18). Te la xchapbe smelolal ti jaʼ noʼox xuʼ jtatik jun oʼontonal yuʼun Dios mi la jpastik orasione xchiʼuk te laj yal kʼusi skʼan jnoptik xchiʼuk kʼusi skʼan jpastik sventa jtatik li jun oʼontonal ti jaʼ tskoltautike (Filipenses 4:8, 9).