TEKSTOETIK TI CHAPBIL SMELOLALE
Jeremias 11:11 | «Ta jtacbe tal tsots vocol ta stojolic»
«Jaʼ yuʼun, xi chal li Jeovae: ‹Kʼelavil, ta xkakʼ talel vokolil ta stojolalik ti mu xuʼ spoj sbaik lokʼele. Kʼalal xvokoletik tskʼanbeikun koltaele, muʼyuk ta jchikintabeik›» (Jeremias 11:11, Xchʼul Kʼop Dios sventa Achʼ Balumil).
«Jaʼ yuʼun ta jtacbe tal tsots vocol ta stojolic; mu cʼu xut tspoj sbaicʼo loqʼuel. Acʼo me ta scʼanbicun to vocol, pero muʼyuc chcaʼibe scʼopic» (Jeremias 11:11, Xchʼul Cʼop Jtotic Dios, ta skʼop Chenalhó).
Li kʼusi skʼan xal Jeremias 11:11
Li kʼusi chal li teksto liʼe jaʼ jech laj yalbe Jeova a li j˗israeletik ta skʼakʼalil li j˗alkʼop Jeremiase. Ta skoj ti muʼyuk xchʼunbeik smantal Jeova xchiʼuk ti la spʼajik li kʼusi albatik yuʼun j˗alkʼopetike, li Diose laj yal ta jamal ti muʼyuk xa chchabian ta skoj ti pimik ta mantale (Proverbios 1:24-32).
«Jaʼ yuʼun, xi chal li Jeovae». Kʼalal «jaʼ yuʼun» xie, chakʼ ta aʼiel ti koʼol snitojbe sba skʼoplal li loʼil xchiʼuk li Jeremias 11:1 kʼalal ta 10. Li Jeovae te laj yalbe ti la sokesik li trato spasoj ox xchiʼuk li smoltotakike (Eksodo 24:7). Yuʼun maʼuk xa laj yichʼik ta mukʼ li Jpasvanej yuʼunike, jaʼ xa lik yichʼik ta mukʼ li lokʼoletike. Ta skoj taje, toj chopolik li kʼusitik la spasike, jech kʼuchaʼal ti la xchikʼik ta kʼokʼ li xnichʼnabike (Jeremias 7:31).
«Ta xkakʼ talel vokolil ta stojolalik». Taje ep ta velta jech chal li Vivliae, pe maʼuk skʼan xal ti yuʼun jaʼ chakʼ talel ta melele, naka noʼox ti muʼyuk tsmak ta bee. Jaʼ jech kʼot ta stojolal li judaetike. Yuʼun lokʼ ta saʼel yuʼun li svokolike ta skoj ti la stoy sbaik ta stojolal Dios xchiʼuk ti laj yichʼik ta mukʼ jecheʼ diosetike. Ta skoj taje, muʼyuk xa chabiatik yuʼun li Jeovae. Jaʼ yuʼun, kʼalal kʼot li jbabiloniaetike, tsalatik yuʼun xchiʼuk chukatik batel. Muʼyuk xpojatik yuʼun li sdiosik ta alele (Jeremias 11:12; 25:8, 9).
«Kʼalal xvokoletik tskʼanbeikun koltaele, muʼyuk ta jchikintabeik». Li Jeovae muʼyuk chchikintabe s˗orasion li buchʼutik «solel balom chʼichʼ» skʼobike xchiʼuk li buchʼutik tspat yoʼontonik ta stojolal jecheʼ diosetike (Isaias 1:15; 42:17). Pe taje maʼuk skʼan xal ti muʼyuk chchikinta orasionetik li Diose, yuʼun jaʼ chchikintabe li buchʼutik tsutes yoʼontonik ta melele xchiʼuk ti tsjel xkuxlejalike (Isaias 1:16-19; 55:6, 7).
Stsʼak loʼil ta Jeremias 11:11
Li Jeovae la sbiiltas ta yaj˗alkʼop li Jeremias li ta sjabilal 647 kʼalal muʼyuk toʼox talem li Jesuse (m.t.J.). Li Jeremiase 40 jabil jech-o laj yalbe judaetik ti ta onoʼox xchapanatik yuʼun li Diose, pe muʼyuk la xchikintaik. Li vaʼ orae, jaʼo la stsʼiba Jeremias li kʼusi chal ta Jeremias 11:11. Vaʼun, li ta sjabilal 607 m.t.J., kʼot ta pasel li albil kʼope. Yuʼun la slajesik Jerusalen li jbabiloniaetike (Jeremias 6:6-8; 39:1, 2, 8, 9).
Pe li kʼusi chal ta slivroal Jeremiase akʼbat spatobil yoʼontonik xtok li judaetike. Yuʼun xi laj yalbe judaetik li Jeovae: «Kʼalal mi tsʼaki li 70 jabil ti te oyoxuk ta Babiloniae, [...] chkʼot ta pasel kuʼun ti kaloj chkikʼoxuk sutel tal li ta alumalike [jaʼ xkaltik, li ta Jerusalene]» (Jeremias 29:10). Li ta sjabilal 537 m.t.J., li Jeovae laj yakʼ kʼotuk ta pasel taje. Yuʼun li Babiloniae laj ta tsalel yuʼun li jmediaetik xchiʼuk li jpersiaetike. Li Jeovae la stsob sutel li steklumal sventa sutik li ta slumalik xchiʼuk ti jaʼuk xa noʼox x˗ichʼat ta mukʼe (2 Kronikas 36:22, 23; Jeremias 29:14).
Sventa xavaʼibe smelolal kʼusi chal li slivroal Jeremiase, kʼelo li video liʼe:
a Li Jeovae jaʼ jech yichʼoj jelubtasel ta tsotsil li sbi Dios ti chanib letra yichʼoj li ta ebreo kʼop ta orijinale. Sventa xavaʼibe smelolal kʼu yuʼun Kajvaltik xi chalbeik skʼoplal Dios li ta yantik Vivliae, kʼelo li mantal «¿Buchʼu jaʼ li Jeovae?».
Xuʼ van chakʼupin skʼelel xtok liʼe
TEKSTOETIK TI CHAPBIL SMELOLALE
Jeremias 29:11 Smelolal | «Vuʼun jnaʼoj jtuc li cʼusi chapal cuʼun ta aventaique»
¿Mi oy kʼusi xchapanoj Dios ta stojolal jujun krixchano?
LI KʼUSI BAʼYEL SKʼAN JCHANTIK TA VIVLIAE
¿Mi ta xaʼi skotol orasionetik li Diose?
¿Mi lek van ti jaʼ noʼox tskʼan ta s-orasion li kʼusi tskʼan yoʼonton stuk li jun krixchanoe? ¿Mi chchikintabat yuʼun Dios li jun vinik ti chilbajin yajnile?
CHANUBTASELETIK TA VIVLIA TI TSOTS SKʼOPLALE
¿Mi tskʼan Dios ti jtunestik santoetik yoʼ xkichʼtik ta mukʼe?
¿Mi oy kʼusi xuʼ skoltautik sventa xijnopaj ta stojolal Diose?
KʼUSITIK TSJAKʼIK TA SVENTA VIVLIA
¿Mi xuʼ xkoltaatik yuʼun Vivlia li buchʼutik oy smul chaʼiike?
Mi oy-o amul chavaʼie paso li oxtos liʼe.
CHANUBTASELETIK TA VIVLIA
Koltael sventa xachan Vivlia
Ta jtijkutik avoʼonton sventa xakʼupin xchanel li Vivliae xchiʼuk ti xatunes li koltaeletik liʼe.
