TEKSTOETIK TI CHAPBIL SMELOLALE
Josue 1:9 | «Skʼan tsotsuk avoʼonton xchiʼuk ti mu xachibaje»
«¿Mi mu lajuk kalbot mantal ti skʼan tsotsuk avoʼonton xchiʼuk ti mu xachibaje? Mu me xnik avoʼonton xchiʼuk mu me xaxiʼ, yuʼun li Jeova Dios avuʼune te chchiʼinot ti buyuk noʼox chabate» (Josue 1:9 Xchʼul Kʼop Dios sventa Achʼ Balumil).
«‹Qʼuelavil, vuʼun jtuc chacalbot. Tsotsan me; oyuc me lec stsatsal avoʼnton. Mu me xaxiʼ; mu me xchibaj avoʼnton. Vuʼun chajchiʼinot scotol cʼacʼal buyuc noʼox chabat, vuʼun li Muc’ul Diosun avuʼune›, xut» (Josue 1:9 Xchʼul Cʼop Jtotic Dios).
Li kʼusi skʼan xal Josue 1:9
Li kʼusi laj yal Jeovae a laj yakʼbe snaʼ Josue ti xuʼ tsotsuk yoʼonton xchiʼuk ti mu xchibaj akʼo mi snuptan tsots vokol xchiʼuk prevaetik. Mi la xchʼunbe smantal Dios li Josuee chʼabal srasonal sventa xiʼ ta sventa li kʼusi chtal ta tsʼakale. Xkoʼolaj ti te xchiʼuk Jeova sventa xkoltaate. Kʼalal te chiʼinbil yuʼun Jeova li Josue xkaltike, jaʼo kʼalaluk jamal lek i-albat kʼusi stakʼ spas sventa stsal li yajkontratake.
Li Josue, ¿bu la sta yip xchiʼuk stsatsal yoʼonton? Li vaʼ kʼakʼale li Jeovae yakʼoj xa ox ta tsʼibael li Vivliae, jaʼ van koltaat-o tajek li Josuee. Tey skʼoplal li mantaletik akʼbat stsʼiba Moises sventa xakʼbe li Josuee b (Josue 1:7). Xi albat Josue sventa li mantaletik taje: «Aptao xchiʼuk nopbo skʼoplal ta kʼakʼal akʼobal» (Josue 1:8). Li kʼusi baʼyel skʼan spas li Josuee jaʼ ti xapta xchiʼuk ti snopbe skʼoplal li kʼusitik chchane, mi jech la spase jaʼ chkoltaat-o sventa xchapan snopben xchiʼuk yoʼonton yoʼ tspas li kʼusi tskʼan Jeovae. Mi laje, skʼan xakʼ ta xkuxlejal «skotol li kʼusi te tsʼibabile», mi jech la spase lek kʼusi chkʼot ta nopel yuʼun xchiʼuk lek chbat xkuxlejal. Jech onoʼox kʼot ta pasel, akʼo mi ep kʼusi vokol la snuptan ta xkuxlejal li Josuee. Pe jun yoʼonton xchiʼuk xmuyubaj tun ta stojolal Jeova (Josue 23:14; 24:15).
Li avie tspat koʼontontik li kʼusi albat yuʼun Jeova li Josuee. Taje chakʼ ta ilel ti oy ta yoʼonton skotol yajtuneltak li Jeovae mas to li buchʼu chil svokolike. Tskʼan ti lek xbat jkuxlejaltik kʼuchaʼal li Josuee. Jech kʼuchaʼal li Josuee xuʼ tsots koʼontontik xchiʼuk mu xijchibaj mi la jchantik li Vivliae, mi la jnopbetik skʼoplal xchiʼuk mi la jpastik li kʼusi chale.
Stsʼak loʼil ta Josue 1:9
Kʼalal cham li Moisese, li Jeovae laj yal ti jaʼ xa chkom ta jnitvanej ta Israel li Josuee (Josue 1:1, 2). Li j-israeletike jutuk xa ox skʼan x-ochik ta Kanaan, li ta Albil Balumile. Pe skʼan stsakik ta kʼop li yajkontraik ti toj tsots yipike ti jaʼ li jkanaanetike, yuʼun chopol krixchanoetik xchiʼuk muʼyuk xkʼuxul yoʼontonik (Deuteronomio 9:5; 20:17, 18). c Jutuk li j-israeletike, mas ep li jkanaanetike xchiʼuk lek chapalik ta paskʼop (Josue 9:1, 2; 17:18). Pe tsots yoʼonton li Josuee xchiʼuk la spas skotol li kʼusi albat yuʼun li Jeovae. Tey chiʼinbil yuʼun Jeova, yuʼun ta vakib noʼox jabil li j-israeletike la stsal jutuk mu skotol li yajkontraike (Josue 21:43, 44).
a Jeova la sjelubtasik ta español li letraetik ta ebreo יהוה (YHWH). Li chanib letraetik ta ebreo taje ojtikinbil kʼuchaʼal Tetragrámaton. Li teksto liʼe li ta Xchʼul Jtotic Diose «Mucʼul Dios» xi jelubtasbil. Mi chakʼan chanaʼ mas ta sventa li Jeovae xchiʼuk ti kʼu yuʼun muʼyuk stikʼojbeik sbi ta junantik Vivliae, kʼelo li mantal ti xi sbie: «¿Quién es Jehová?»
b Li chʼul tsʼibetik ti oy xa ox ta skʼakʼalil Josuee xchiʼuk ti xuʼ xa te jtatik ta Jvivliatik voʼotik eke. Yikʼaluk van jaʼ li voʼob livro la stsʼiba Moisese (Jenesis, Eksodo, Levitiko, Numeros xchiʼuk Deuteronomio), li slivroal Jobe xchiʼuk jun chib slivroal Salmo.
c Sventa xanaʼ kʼu yuʼun persa skʼan stsakik ta kʼop li jkanaanetike kʼelo li mantal: «¿Por qué mandó Dios exterminar a los cananeos?», li ta revista La Atalaya 1 yuʼun enero ta 2010.