«Xi albat yuʼun li Jesuse: ‹Voʼon li beune, voʼon li melelune xchiʼuk voʼon li kuxlejalune. Muʼyuk buchʼu xuʼ xtal ta stojolal li Totile, jaʼ noʼox ta jventa›» (Juan 14:6, Xchʼul Kʼop Dios sventa Achʼ Balumil).

 «Li Jesuse jech laj yal: –Vuʼun li beune, vuʼun li melelune, vuʼun li cuxlejalune. Muʼyuc bochʼo xuʼ chbat ta stojol Jtot ti me mu xtal ta jtojole–» (Juan 14:6, Xchʼul Cʼop Jtotic Dios, ta skʼop Chenalhó).

 Sventa xkichʼtik ta muk’ li Totile, ti jaʼ Jeovae, a skʼan jnaʼtik kʼusi tsots yabtel yichʼoj li Jesuse.

 «Voʼon li beune». Li Jesuse jaʼ li bee ti jaʼ tskoltautik sventa xijnopaj ta stojolal li Diose. Jech kʼuchaʼal liʼe, kʼalal ta jpastik orasione, skʼan ta sbi Jesus jpastik (Juan 16:23, 24). Koliyal ti cham li Jesuse, xuʼ xa lek xkil jbatik yan velta xchiʼuk li Diose xchiʼuk ti xkamigointike (Romanos 5:8-11). Jech xtok, li Jesuse laj yakʼ kiltik ti kʼu yelan skʼan jkuxlejaltik mi ta jkʼantik ti lek xilutik li Diose (Juan 13:15).

 «Voʼon li melelune». Li Jesuse jaʼ laj yal-o li kʼusi melele xchiʼuk jaʼ jech laj yakʼ ta ilel ta xkuxlejal (1 Pedro 2:22). Buchʼuuk noʼox ti chchikinta li kʼusi chal Jesuse xuʼ xchan li kʼusi melel ta sventa Diose (Juan 8:31, 32). Jech xtok, li Jesuse jaʼ li melele, ¿kʼu yuʼun? Yuʼun kʼotanuk ta pasel ta stojolal li kʼusitik albil xa onoʼox skʼoplal ta Vivliae xchiʼuk kʼot ta pasel yuʼun li kʼusi jamal yaloj tspas Diose (Juan 1:17; 2 Korintios 1:19, 20; Kolosenses 2:16, 17).

 «Voʼon li kuxlejalune». Li Jesuse laj yakʼ xkuxlejal sventa xuʼ sta xkuxlejalik sbatel osil li buchʼu chakʼ xchʼunel yoʼontonik ta stojole (Juan 3:16, 36). Jech xtok, li Jesuse jaʼ kuxlejal kʼotem ta stojolalik li buchʼutik chamemike, yuʼun jaʼ ta xchaʼkuxesan (Juan 5:28, 29; 11:25).

 «Muʼyuk buchʼu xuʼ xtal ta stojolal li Totile, jaʼ noʼox ta jventa». Li buchʼu tskʼan lek xil sba xchiʼuk li Diose skʼan xchʼam ti tsots skʼoplal xchiʼuk ti stuk xa noʼox jech yichʼoj yabtel li Jesuse. ¿Kʼuxi jech tspas? Kʼalal tspas orasione, ta xal ta sbi Jesus xchiʼuk chakʼ ta ilel kʼusi yabtel yichʼoj li Kristoe (Juan 15:16). Jech xtok, ta xchʼun ti jaʼ noʼox xuʼ xakʼ jkolebaltik li Jesuse (Echos 4:12; Filipenses 2:8-11).

 Li ta kapitulo 13 kʼalal ta 17 li ta slivroal Juane, yichʼoj li slajeb tojobtaseletik laj yalbe yajtakboltak Jesus kʼalal jun xa ox akʼobal skʼan xchame. Li ta kapitulo 14, li Jesuse laj yalbe yajchankʼoptak ti akʼo yakʼik ta ilel xchʼunel yoʼontonik ta stojole xchiʼuk ta stojolal li Stote, ti akʼo skʼanike xchiʼuk ti xchʼunbeik smantale (Juan 14:1, 12, 15-17, 21, 23, 24). Te laj yalbe skʼoplal ti lek tajek xil sbaik xchiʼuk li Stote xchiʼuk ti jech-o li avie (Juan 14:10, 20, 28, 31). Akʼo mi jutuk xa ox skʼan sut batel ta vinajel li Jesuse, laj yalanbe komel yajchankʼoptak ti muʼyuk bu tskomtsane (Juan 14:18). Li Jesus xtoke laj yalbe yajchankʼoptak ti Totile chakʼ talel xchʼul espiritu ti jaʼ chkoltaatike (Juan 14:25-27). Ti jech laj yalbe yajchankʼoptak li Jesuse jaʼ la xchapan ta sventa li kʼusitik tsnuptanik ta jelavele.