«Muʼyuk buchʼu yan ti toj echʼ noʼox snaʼ xkʼanvane, jaʼ noʼox li buchʼu chakʼ xkuxlejal ta stojolal li yamigotake» (Juan 15:13, Xchʼul Kʼop Dios sventa Achʼ Balumil).

 «Muʼyuc bochʼo jech toj ep cʼanel yuʼun, muʼyuc bochʼo xuʼ ta xacʼ sba ta milel ta scoj li bochʼo lec scʼopan sba xchiʼuque» (Juan 15:13, Xchʼul Cʼop Jtotic Dios, ta skʼop Chenalhó).

 Li Jesuse tskʼan ti toj echʼemuk noʼox snaʼ xkʼanvanik li yajchankʼoptake ti jaʼ chtijbat yoʼontonik yoʼ xakʼ xkuxlejalik ta stojolal li yantike.

 Li Jesuse kak xa onoʼox xi laj yalbe li yajtakboltake: «Jech xakʼan abaik ta jujuntal kʼuchaʼal jkʼanojoxuke» (Juan 15:12). ¿Kʼu yelan li kʼanelal laj yakʼ ta ilele? Jaʼ ti la skʼan li krixchanoetike, muʼyuk tsmala ti oy kʼusi x˗akʼbat sutele. Ti kʼu sjalil la xchol mantale, jaʼ la skʼel li kʼusitik chtun yuʼun xchiʼuk kʼusi tsnopik li yajchankʼoptake xchiʼuk li yan krixchanoetike, maʼuk li kʼusi tskʼan yoʼonton stuke. Jaʼ ti la xpoxta li krixchanoetike xchiʼuk laj yalbe skʼoplal sventa li Ajvalilal yuʼun Diose. a Xchiʼuk bikʼit laj yakʼ sba kʼalal oy kʼusitik la spas ta stojolal li yantike (Mateo 9:35; Lukas 22:27; Juan 13:3-5). Pe li ta Juan 15:13, li Jesuse jaʼ yakal chalbe skʼoplal li kʼanelal ti muʼyuk buchʼu yan jech chakʼ ta ilele. Kʼalal echʼ xa ox junchib orae, laj yakʼ ta ilel kʼanelal kʼalal laj «yakʼ xkuxlejal kʼuchaʼal pojelal sventa tspoj epal krixchanoetik» (Mateo 20:28; 22:39). Jaʼ jech laj yakʼ ta ilel ti jaʼ mas skʼanojan li yantike ti jaʼ mu sta ti kʼu yelan skʼanoj sba stuke.

 Li Jesuse skʼanoj skotol li krixchanoetike, pe mas to skʼanojan li buchʼutik chchʼunbat smantaltake. Jech kʼu chaʼal liʼe, yamigo tajek sbaik xchiʼuk li yajchankʼoptake, yuʼun chchʼunik li kʼusi chalanbee xchiʼuk te xchiʼukik kʼalal la snuptan prevaetike (Lukas 22:28; Juan 15:14, 15). Taje mas to tijbat-o yoʼonton Jesus sventa xakʼ xkuxlejal ta stojolalik.

 Li yajtsʼaklomtak Kristo ta baʼyel sigloe, la stsakik lek ta mukʼ li kʼusi laj yal Jesuse, yuʼun jpʼel ta yoʼonton ta xakʼ xkuxlejalik ta stojolal li yantik eke (1 Juan 3:16). Ta melel, li kʼanelal laj yakʼik ta ilele xchiʼuk ti muʼyuk kʼusi tsmalaik ti ch˗akʼbatik sutel jech kʼuchaʼal laj yakʼ iluk li Jesuse, jaʼ svinajeb ti jaʼik li melel yajtsʼaklomtak Kristoe (Juan 13:34, 35).

 Li ta kapitulo 13 Kʼalal 17 li ta Evanjelio yuʼun Juane, te ta jtatik li mantaletik laj yalbe li 11 ta voʼ tukʼil yajtakboltak kʼalal junchib xa ox ora skʼan xchame xchiʼuk te ta jtatik li slajeb orasion la spas xchiʼuk li yajtakboltake. Li ta kapitulo 15, li Jesuse la stunes jun skʼelobil sventa xchanubtas li yajtsʼaklomtak ti mi tskʼanik ti jmoj oyik xchiʼuke, skʼan xakʼik ta ilel ti jaʼik melel yajtsʼaklomtake. Li Jesuse la skoʼoltas ta «skʼobkʼobtak uva» xchiʼuk ti lek chakʼ sate xchiʼuk laj yalanbe ti tsots skʼoplal ti epuk satinik batele (Juan 15:1-5, 8). Jtos ti kʼuxi xuʼ xkakʼtik ta ilel ti jkʼanojtik li yantike, jaʼ ti xkalbetik «li lekil aʼyejetik ta sventa li Ajvalilal yuʼun Dios» ti jaʼ jech laj yal li Jesus eke (Lukas 4:43; Juan 15:10, 17).

 Sventa xavaʼibe smelolal kʼusi chal li slivroal Juane, kʼelo li video liʼe.