«Jaʼ jech laj kalboxuk sventa junuk avoʼontonik ta jtojolal. Chavil tsots avokolik liʼ ta balumile. Pe ¡tsotsuk avoʼontonik!, yuʼun jtsaloj xa li balumile» (Juan 16:33, Xchʼul Kʼop Dios sventa Achʼ Balumil).

 «Ti cʼu yepal laj calboxuque, jaʼ sventa ti acʼo junuc o avoʼntonic ta jtojole. Liʼ ta orae oy avocolic liʼ ta banamil, pero pato avoʼntonic ti tsalbil cuʼun li cʼusi sventa banamile» (Juan 16:33, Xchʼul Cʼop Jtotic Dios, ta skʼop Chenalhó).

 Kʼalal jech laj yal li Jesuse, ta slekil yoʼonton laj yalbe yajtsʼaklomtak ti xuʼ lek x˗ilatik yuʼun Dios ek manchuk mi chil svokolik o chichʼik kontrainel.

 «Jaʼ jech laj kalboxuk sventa junuk avoʼontonik ta jtojolal». Li kʼusi to chal li versikuloe chakʼ ta ilel ti xuʼ jun yoʼonton li jun krixchanoe, pe maʼuk skʼan xal ti muʼyuk xa chil svokole. Jaʼ yakal chalbe skʼoplal ti lek noʼox jnopbentik xchiʼuk koʼontontik ta skoj li Jesuse. Li stuke laj yalbe yajchankʼoptak ti ch˗akʼbatik chʼul espiritue. Li jkoltavanej taje, ep tajek sjuʼel ti xuʼ skoltautik yoʼ xkuch kuʼuntik kʼusuk noʼox vokolale (Juan 14:16, 26, 27).

 «Chavil tsots avokolik liʼ ta balumile. Pe ¡tsotsuk avoʼontonik!». Li Jesuse jamal laj yalbe yajchankʼoptak ti ta xil svokolike, jech kʼuchaʼal ti chopol kʼusi chichʼik pasbele xchiʼuk ti chichʼik kontrainele (Mateo 24:9; 2 Timoteo 3:12). Manchuk mi jech, xi laj yalanbee: «Tsotsuk avoʼontonik» o «pato avoʼntonic» (Juan 16:33). Ta melel, oy lek srasonal yuʼunik ti jech la spasike.

 «Jtsaloj xa li balumile». Kʼalal «balumil» xi li ta teksto liʼe, jaʼ chalbe skʼoplal li chopol krixchanoetik ti namajemik ta stojolal Diose. a Li 1 Juan 5:19 chal ti «skotol li krixchanoetike oyik ta sjuʼel li Satanase». Jech oxal, li krixchanoetik taje skontrainojbeik li kʼusi tskʼan yoʼonton Diose (1 Juan 2:15-17).

 Li Satanas xchiʼuk li sbalumile tskʼan ox tspajesik Jesus sventa mu spas li kʼusi akʼbil sbain yuʼun Diose: ti xchanubtas yantik ta sventa li Diose xchiʼuk ti xakʼ xkuxlejal sventa tspojutike (Mateo 20:28; Lukas 4:13; Juan 18:37). Pe li Jesuse muʼyuk laj yakʼ ti sokesbat snopben xchiʼuk ti xnamajesat ta stojolal Diose. Tukʼ laj yakʼ sba manchuk mi laj yichʼ milel. Jech oxal, li Jesuse laj yal ti tsal yuʼun li balumile xchiʼuk laj yal ti manchuk mi jaʼ sventainoj balumil li Satanase, mu xuʼ xventainat yuʼun (Juan 14:30).

 Li Jesuse laj yakʼbe ta ilel yajtsʼaklomtak ti xuʼ tukʼ xakʼ sbaik ta stojolal Dios manchuk mi xichʼik kontrainel yuʼun Satanas xchiʼuk li sbalumile. Xkoʼolajuk ti xi yakal chal li Jesuse: «Mi tsal kuʼun li balumile, xuʼ stsal avuʼunik ek».

 Jun xa ox akʼobal skʼan xcham kʼalal jech laj yal li Jesuse. Ta skoj ti snaʼoj kʼusi chkʼot ta pasele, la spʼijubtas li yajtakboltake. Laj yalanbe ti oy kʼusi tsots skʼoplal skʼan snopike, jech kʼuchaʼal liʼe, ti muʼyuk xa ta xilike xchiʼuk ti ta xichʼik kontrainel o moʼoje ta xichʼik milel (Juan 15:20; 16:2, 10). Ta skoj ti xiʼik van li jtakboletike, li Jesuse laj yal li kʼusi la jkʼeltik ta Juan 16:33 sventa spatbe yoʼonton xchiʼuk ti tsotsuk yoʼontonike.

 Li kʼusi laj yal Jesus xchiʼuk ti kuch yuʼune, xuʼ stsatsubtas li yajtsʼaklomtak avi eke. Skotol li yajtsʼaklomtak Kristoe xuʼ tukʼ xtunik ta stojolal Dios manchuk mi xil tsots svokolik.