«Yuʼun muʼyuk kʼusi albil ti mu spas yuʼun li Diose» (Lukas 1:37, Xchʼul Kʼop Dios sventa Achʼ Balumil).

 «Li Diose scotol xuʼ yuʼun» (Lukas 1:37, Achʼ Testamento, ta skʼop San Andrés).

 Li Dios ti skotol xuʼ yuʼune spas yuʼun skotol, akʼo mi ta sat li krixchanoetike mu xuʼ yuʼun chilik. Muʼyuk kʼusi xuʼ spajesat˗o sventa xkʼot ta pasel li kʼusi chale o li kʼusi tspas ta jelavele.

 Li kʼusi yaloj Jeovae a ta onoʼox xkʼot ta pasel. Ti kʼu toʼox yelan tsʼibabil ta griego li Lukas 1:37 xuʼ xi chichʼ jelubtasel xtoke: «Li kʼusi yaloj tspas Diose muʼyuk chchʼay ta be» o «muʼyuk kʼusi ti mu spas yuʼun li Diose», taje koʼol li kʼusi skʼan xale. Li kʼusi yaloj Diose ta onoʼox xkʼot ta pasel, yuʼun muʼyuk kʼusi ti mu spas yuʼune (Isaias 55:10, 11).

 Li ta Vivliae te ta jtatik skʼelobiltak ta sventa li kʼusitik yaloj onoʼox tspas Diose. Jech kʼuchaʼal liʼe: li Jeovae la stunes jun anjel sventa xal ti chchiʼin yol li yajnil Abraan ti Sara sbie. Li Sarae mu snaʼ x˗alaj xchiʼuk oy xa sjabilal, akʼo mi jech, xi to albat yuʼun li anjele: «¿Mi oy kʼusi ti mu spas yuʼun li Jeovae?» (Jenesis 18:13, 14). Xi laj yal Job kʼalal laj xa ox skʼel li spasbentak Diose: «Li kʼusi anopoj chapase muʼyuk kʼusi xuʼ smak ta be» (Job 42:2). Jech xtok, li yajchankʼoptak Jesuse tsvul yoʼontonik mi spas yuʼunik li kʼusitik tskʼan Dios sventa sta xkuxlejalike; jaʼ yuʼun, vulesbat ta sjolik yuʼun Jesus ti «Diose xuʼ yuʼun spasel skotol» (Mateo 19:25, 26). b

 Li anjel Gabriele oy kʼusi laj yalbe li tojol tseb Mariae, ti jaʼ li kʼusi te tsʼibabil kom ta Lukas 1:37. Li Gabriele laj yalbe Maria ti tsvokʼes jun olol ti jaʼ «Xnichʼon li Buchʼu toj toyol oye» xchiʼuk ti Jesus chakʼbe sbie. Jaʼ chkʼot ta ajvalil li ta Ajvalilal yuʼun Diose xchiʼuk ch˗ajvalilaj ta sbatel osil (Lukas 1: 26-33; Apokalipsis 11:15).

 Li Mariae la to sjakʼ kʼuxi xa noʼox chkʼot ta pasel taje, yuʼun muʼyuk nupunem xchiʼuk ‹muʼyuk bu chchiʼin ta vayel junuk vinik› (Lukas 1:34, 35). Li Gabriele laj yal ti Diose tstunes li xchʼul espiritue o li sjuʼele. Li Jesuse jaʼ toʼox jun kuxlejal ta vinajel ti mu xvinaj ta kʼelele. Jaʼ yuʼun, li Jeovae la stunes xchʼul espiritu sventa sjelubtasbe ta yalajeb Maria li xkuxlej xnichʼone (Juan 1:14; Filipenses 2:5-7). Jaʼ jech, ta skʼelobil juʼelal ta xchiʼin yol li Mariae. Sventa masuk to xchʼun ti xuʼ yuʼun li Diose li anjele laj yalbe ti la xchiʼin yol ek jun yutsʼ yalal ti Elisabet sbi akʼo mi oy xa sjabilal. Li Elisabet xchiʼuk li smalal ti Sakarias sbie muʼyuk yiloj yalab xnichʼnabik yuʼun mu snaʼ x-alaj li Elisabete (Lukas 1:36). Li skeremike jaʼ li Juan J˗akʼ˗ichʼvoʼe ti laj xa onoʼox yal Jeova kʼusi abtelal tspase (Lukas 1:10-16; 3:1-6).

 Laje, li anjel Gabriele laj yal li kʼusi chal Lukas 1:37, kʼalal laj yale te van ta sjol li Maria xchiʼuk Elisabete. Li avi eke, ta xpatbat yoʼontonik li buchʼutik chichʼik ta mukʼ Jeovae, yuʼun ta onoʼox xkʼot ta pasel li kʼusi yaloj tspase. Taje te skʼoplal ti tslajesbe skʼoplal li ajvaliletik ta balumile ti jaʼ xa xkom ta ajvalil li Jesukristoe (Daniel 2:44; 7:13, 14).

 Sventa xavaʼibe smelolal kʼusi chal li slivroal Lukase, kʼelo li video liʼe.