TEKSTOETIK TI CHAPBIL SMELOLALE
Lukas 2:14 | «Yuʼun ti jnaclejetic ti oyic ta banomile, laj xa staic ti lec xʼileic yuʼune, jaʼ ti buchʼutic jun yoʼnton oyic ta stojole»
«Akʼo junuk yutsil slekilal li Dios ti te oy ta toyole xchiʼuk junuk yoʼontonik li krixchanoetik ta sba balumil ti lek ilbilike» (Lukas 2:14, Xchʼul Kʼop Dios sventa Achʼ Balumil).
«Mu albajuc yutsilal slequilal ti Dios oy ta vinajele. Yuʼun ti jnaclejetic ti oyic ta banomile, laj xa staic ti lec xʼileic yuʼune, jaʼ ti buchʼutic jun yoʼnton oyic ta stojole» (Lucas 2:14, Xchʼul Cʼop ti Jtotic Diose, ta skʼop Chamula).
Li kʼusi skʼan xal Lukas 2:14
Li kʼusi chal li teksto liʼe, jaʼ jech laj yal li anjeletik kʼalal vokʼ li Jesuse yuʼun chakʼ ta ilel ti buchʼu chakʼ xchʼunel yoʼonton ta stojolal li Jesuse, xuʼ lek x-ilat yuʼun li Diose xchiʼuk xuʼ sta jun oʼontonal.
«Akʼo junuk yutsil slekilal li Dios ti te oy ta toyole». Kʼalal jech laj yalik li anjeletike laj yakʼik ta aʼiel ti jaʼ noʼox stuk Dios xuʼ xichʼ kʼupil kʼoptaele. Xchiʼuk laj yalik ti jaʼ sventa xichʼ kʼupil kʼoptael Jeova a Dios ti vokʼ li Jesuse xchiʼuk li yabtel la spas ta balumile. Li Jesus eke, jaʼ jech laj yakʼ ta ilel, yuʼun kʼalal chchanubtasvane jaʼ la stoybe skʼoplal li Stote, xi laj yale: «Maʼuk kuʼun li kʼusi chkakʼ ta chanele, jaʼ yuʼun li buchʼu la stakun tale» (Juan 7:16-18). K’alal oy kʼusitik labalik sba tspas li Jesuse, li krixchanoetik ti laj yilike jaʼ la stoybeik skʼoplal li Jeovae (Lukas 5:18, 24-26; Juan 5:19). Maʼuk noʼox taje, yuʼun kʼalal cham li Jesuse laj yichʼ kʼupil kʼoptael li Jeovae. Ta skoj taje xuʼ xkʼot ta pasel li kʼusi tskʼan yoʼonton Dios ti xuʼ xnoj ta tukʼil krixchanoetik li balumile xchiʼuk ti skʼanojik jun oʼontonale (Jenesis 1:28).
«Junuk yoʼontonik [...] ta sba balumil». Liʼe maʼuk noʼox skʼan xal ti muʼyuk paskʼope. Jaʼ skʼan xal xtok ti lek oyutik, ti jun koʼonton chkaʼi jbatik ta skoj ti lek chilutik li Jeovae. Koliyal li Jesuse, xuʼ lek xkil jbatik xchiʼuk li Diose (Santiago 4:8). Ta skoj ti jaʼ Ajvalil li ta Ajvalilal yuʼun Diose, li Jesuse ta xichʼ talel lekilal ta spʼejel balumil xchiʼuk ta sbatel osil (Salmo 37:11; Lukas 1:32, 33).
«Li krixchanoetik [...] ti lek ilbilike». Taje jaʼ chalbe skʼoplal li krixchanoetik ti lek ilbilik yuʼun Dios ta skoj ti oy xchʼunel yoʼontonik ta melel ta stojolale xchiʼuk ta stojolal li Jesus ti la stak talele. Maʼuk yuʼun lek ilbil yuʼun Dios skotol li krixchanoetike, ti mu ventauk kʼu yelan stalelalik xchiʼuk li kʼusitik tspasike. Maʼuk skʼan xal xtok ti lek xa ilbilik yuʼun Dios ta skoj li kʼusitik lek tspasike. Junantik Vivliaetik jech kʼuchaʼal li King James xi tsjelubtasike: « Lek ilbilik li krixchanoetike». Pe jaʼuk li tsʼibetik ta Griego ti mas xa voʼneik pasbile, chakʼik ta aʼiel ti jaʼ mas lek ti kʼu yelan sjelubtasojik li ta Xchʼul Kʼop Dios sventa Achʼ Balumil xchiʼuk ta yan Vivliaetik ti mas achʼik toe. Yuʼun chakʼ ta aʼiel ti jaʼ jun yoʼontonik li krixchanoetik ti lek ilbilik yuʼun Diose. Kʼelo yoʼ bu chal «Lukas 2:14 ta yan Vivliaetik».
Stsʼak loʼil ta Lukas 2:14
Li kapitulo 2 ta Lukase, jaʼ chalbe skʼoplal li baʼyel jabiletik kʼalal kuxi kʼu chaʼal jun krixchano ta balumil li Jesuse. Kʼalal mu toʼox sjaliluk svokʼel li Jesuse, jun anjel laj yakʼ sba ta ilel ta stojolal j˗ilchijetik ti te nakalik ta osiltik «ti chchabi xchijik ta akʼobaltike» (Lukas 2:4-8). b Li anjele laj yal lekil aʼyej ti chmuyubaj˗o tajek skotol li krixchanoetike, xi laj yalbe li j˗ilchijetike: «Vokʼ xa jun jkoltavanej avuʼunik li avie, jaʼ li Kajvaltik Kristoe» (Lukas 2:9-11). Albatik bu xuʼ staik li Jesus ti naka to vokʼe, laje laj yilik epal anjeletik ti tskʼupil kʼoptaik li Diose. Kʼalal kʼotik ta Belen une, li j˗ilchijetike te la staik li Mariae, li Josee xchiʼuk li neneʼ Jesuse (Lukas 2:12-16). Kʼalal laj xa ox sloʼiltaik li kʼusi kʼot ta stojolalik li j˗ilchijetike, sutik batel ti bu oy li xchijike: «Laj yalbeik yutsilal Dios xchiʼuk la skʼupil kʼoptaik» ta skoj li kʼusitik laj yaʼiik xchiʼuk laj yilike (Lukas 2:17-20).
Lukas 2:14 ta yan Vivliaetik
«Jelaven yutsil ti Diose, jaʼ ti te oy ti vinajele. Acʼo tojobuc ti balumile yuʼun yutsil yoʼnton ti Diose xchiʼuc scotol crixchanoetic» (Lucas 2:14, Jaʼ ti Achʼ Testamentoe, ta skʼop Huixtán).
«¡Lec tajmec yoʼon li Riox ta vinajele! Chcʼuxubin li crixchanoetique yoʼ spas o ta jun yoʼonique» (Lucas 2:14, Scʼop Riox, ta skʼop Zinacantán).
«¡Toj echʼem slequilal Dios ta vinajel! Acʼo pasuc ta jun yoʼonic li crixchanoetic ta sventa ti oy slequil yoʼon li Dios ta stojolique» (Lucas 2:14, Achʼ Testamento, ta skʼop San Andrés).
Sventa xavaʼibe smelolal kʼusi chal li slivroal Lukase, kʼelo li video liʼe.
a Jaʼ Jeova sbi li Diose (Salmo 83:18). Kʼelo li mantal: «¿Buchʼu jaʼ li Jeovae?».
b Ta skoj ti te ch˗echʼ yuʼunik akʼobaltik ta osiltik li j˗ilchijetike, chakʼ ta ilel ti maʼuk yorail siktik ti kʼot ta pasel taje. Sventa xavaʼibe mas smelolale, kʼelo li mantal: «¿Mi ta 25 yuʼun disiembre vokʼ li Jesuse?».
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Kʼuxi ta jtatik jun oʼontonal li’ ta balumile?
Chano kʼusi tspas li Ajvalilal yuʼun Dios sventa oyuk jun oʼontonal ta spʼejel balumil.
LI KʼUSI BAʼYEL SKʼAN JCHANTIK TA VIVLIAE
¿Kʼusi jaʼ li Ajvalilal yuʼun Diose?
Kʼalal la xchol mantal li Jesuse, jaʼ mas laj yalbe skʼoplal li Ajvalilal yuʼun Diose. Li krixchanoetike voʼne xa lik skʼanik ti xtal li ajvalilal taje.
¡VIK'ILUK ME JSATIK!
Li Ajvalilal yuʼun Diose chakʼ talel jun oʼontonal
Li Ajvalilal yuʼun Diose jaʼ chakʼ ti junuk noʼox koʼontontik xchiʼuk jmojuk oyutike.
TEKSTOETIK TI CHAPBIL SMELOLALE
Juan 14:27 Smelolal | «Chkakʼboxuk komel li jun oʼontonale»
¿K’u yelan li jun oʼontonal chak’be melel yajtsʼaklom li Jesuse? ¿Kʼuxi xuʼ jtatik li voʼotik eke?
CHANUBTASELETIK TA VIVLIA
Koltael sventa xachan Vivlia
Ta jtijkutik avoʼonton sventa xakʼupin xchanel li Vivliae xchiʼuk ti xatunes li koltaeletik liʼe.
