«Jaʼ yuʼun, chkalboxuk avaʼiik ti skotol li kʼusitik chakʼanik ta orasione, oyuk xchʼunel avoʼonton xakʼanik xchiʼuk ataojikuk xa yaʼel, yuʼun ta onoʼox xa˗akʼbatik» (Markos 11:24, Xchʼul Kʼop Dios sventa Achʼ Balumil).

 «Jaʼ yuʼun chacalboxuc, scotol li cʼusi chacʼanic cʼalal chacʼopanic Diose, chʼunic ti chaʼacʼbatique, jech ta onoʼox xavichʼic» (Marcos 11:24, Xchʼul Cʼop Jtotic Dios, ta skʼop Chenalhó).

 Li kʼusi laj yakʼbe xchan yajtakboltak li Jesuse, jaʼ ti skʼan oyuk lek xchʼunel yoʼontonik kʼalal oy kʼusi tskʼanik ta orasione. Jamal laj yal ti maʼuk noʼox chaʼi li orasione, yuʼun ta stakʼ xtok li Diose. Jun krixchano ti tspas orasion jech kʼuchaʼal tskʼan yoʼonton Diose, xuʼ xchʼun ta melel ti ta onoʼox xtakʼbat li kʼusi tskʼan ta s-orasione. Xkoʼolaj ti takʼbil xa yuʼun Dios li kʼusi la skʼane.

 Li Jesuse laj yakʼ ta ilel ti tsots skʼoplal ti skʼan oyuk xchʼunel koʼontontik kʼalal ta jpastik orasione. Laj yalbe skʼoplal ti buchʼu tspas orasione mu stakʼ ti xchibet yoʼontone, yuʼun chal ti skʼan oyuk «lek xchʼunel yoʼonton» sventa xkʼot ta pasel li kʼusi tskʼane (Markos 11:23). ¿Kʼu yuʼun? Yuʼun li buchʼu xchibete «muʼyuk kʼusi tsmala ch-akʼbat jsetʼuk yuʼun Jeova» a (Santiago 1:5-8).

 Li buchʼu oy lek xchʼunel yoʼontone nopajtik noʼox tspas orasion (Lukas 11:9, 10; Romanos 12:12). Jaʼ jech chakʼ ta ilel ti chtun yuʼun ta melel li kʼusi tskʼane xchiʼuk ti xchʼunoj lek ti chtakʼbat yuʼun li Diose. Jech xtok, snaʼoj ti xuʼ van mu xtakʼbat ta yorail noʼox li s-orasione o ti mu jechuk xtakʼbat kʼu yelan snopoje (Efesios 3:20; Ebreos 11:6).

 Pe li kʼusi laj yal Jesuse maʼuk skʼan xal ti buchʼuuk noʼox krixchanoal oy kʼusi xuʼ skʼanbe li Diose xchiʼuk ti xtakʼbate. Li Jesuse yakal chchiʼin ta loʼil yajchankʼoptak ti oy lek xchʼunel yoʼontonike xchiʼuk ti chichʼik ta mukʼ Jeova jech kʼuchaʼal tskʼan yoʼontone. Li Vivliae ta xalbutik ti ta onoʼox xaʼi j-orasiontik Jeova mi jech ta jkʼantik jech kʼuchaʼal tskʼan yoʼontone (1 Juan 5:14). Pe chal xtok, ti muʼyuk chchikintabe s-orasion li buchʼutik yolbaj mu xchʼunbeik smantale xchiʼuk ti chopol kʼusitik tspasik ti muʼyuk tsutes yoʼontonike (Isaias 1:15; Mikeas 3:4; Juan 9:31). Mi chakʼan to chanabe mas yaʼyejal mi chchikinta skotol orasionetik li Diose, kʼelo li video liʼe.

 Kʼalal mu xa ox jaluk liʼ oy ta balumil sventa tspasbe yabtel Stot li Jesuse. La xchiʼin ta loʼil li yajchankʼoptak sventa xakʼbe yil ti toj tsots skʼoplal ti tsotsuk li xchʼunel yoʼontonik ta stojolal Diose. Xchiʼuk laj yakʼbe jun skʼelobil sventa xaʼibeik smelolal. Kʼalal jaʼo chbatik ta Jerusalene te la sta ta ilel jun steʼel igo ti oy xa ox lek yanale, pe ti chʼabal chakʼ sate. Ta skoj ti muʼyuk chakʼ sate, li Jesuse la xchopol kʼopta (Markos 11:12-14). Ti kʼu yelan lek yox xvinaj li teʼe, jaʼ jech xkoʼolaj kʼuchaʼal li voʼneal jteklum Israele. Yuʼun li jteklume chichʼ ta mukʼ Dios yilel, pe ta melel muʼyuk xchʼunel yoʼontonik (Mateo 21:43). Mu sjaliluke takij li steʼel igo ti la xchopol kʼopta Jesuse, taje jaʼ jech laj yakʼ ta ilel li kʼusi tsnuptan li jteklum Israel ta skoj ti muʼyuk xchʼunel yoʼontonike (Markos 11:19-21).

 Li Jesuse xchʼunoj ti xuʼ x-ayan lek xchʼunel yoʼontonik li yajtsʼaklomtake sventa stsal yuʼunik li vokoliletik tsnuptanike xchiʼuk ti oyuk kʼusitik labal sba spasike (Markos 11:22, 23). Li tojobtasel laj yakʼbe yajtsʼaklomtak Jesus ta sventa li orasione tun tajek yuʼunik, yuʼun poʼot xa ox tsots kʼusi tsnuptanik. Yuʼun jutuk xa ox skʼan xichʼ milel li Jesuse xchiʼuk ti xichʼik kontrainel ta skoj ti tspasbeik yabtel Diose (Lukas 24:17-20; Echos 5:17, 18, 40). Li yajtsʼaklomtak Kristo avie, xuʼ me stsal yuʼunik li kʼusitik tsnuptanik mi oy lek xchʼunel yoʼontonik ta stojolal li Diose xchiʼuk mi tspasilanik orasione (Santiago 2:26).

 Sventa xavaʼibe smelolal kʼusi chal li slivroal Markose, kʼelo li video liʼe.