TEKSTOETIK TI CHAPBIL SMELOLALE

Mateo 6:33 | «Scʼan baʼyuc chavacʼ abaic ta ventainel yuʼun li Diose»

CHICHʼ TIJEL TA

«Saʼilanik me baʼyel li Ajvalilal yuʼun Diose xchiʼuk li stukʼilale, vaʼun ta me xakʼboxuk skotol li yan kʼusitik taje» (Mateo 6:33, Xchʼul Kʼop Dios sventa Achʼ Balumil).

«Scʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane, jech chayacʼboxuc scotol li cʼusitic ta xtun avuʼunique» (Mateo 6:33, Xchʼul Cʼop Jtotic Dios, ta skʼop Chenalhó).

Li kʼusi skʼan xal Mateo 6:33

Li Ajvalilal yuʼun Diose jaʼ jun ajvalil te ta vinajel ti jaʼ chakʼ kʼotuk ta pasel li kʼusi oy ta yoʼonton Dios liʼ ta balumile (Mateo 6:9, 10). ¿Kʼuxi xuʼ baʼyel jsaʼilantik li Ajvalilal yuʼun Diose? Jaʼ ti jaʼuk mas tsots skʼoplal xkil ta jkuxlejaltik li Ajvalilale. a Taje te smakojbe skʼoplal ti ta jkʼan ta jnaʼtik mas ta sventa li ajvalilal yuʼun Diose xchiʼuk ti chkalbetik yantik kʼusi tspas li Ajvalilal taje (Lukas 11:2).

Kʼalal chal stukʼilal Diose, te tsakal skʼoplal li smantaltak ta sventa li kʼusi leke xchiʼuk li kʼusi chopole (Salmo 119:172). Jaʼ yuʼun, li buchʼu tsaʼ li tukʼilal yuʼun Diose ta xakʼ ta xkuxlejal li mantaletik yakʼoj ta sventa talelal ti jaʼ sventa jlekilaltike (Isaias 48:17).

Kʼalal chal ta me xakʼboxuk skotol li yan kʼusitik taje, jaʼ skʼoplal li kʼusi jamal yalojbe Dios chakʼbe li buchʼutik jaʼ baʼyel ta xakʼ ta xkuxlejalik li Ajvalilal yuʼune xchiʼuk ti chchʼunbeik li smantaltake (Mateo 6:31, 32).

Stsʼak loʼil ta Mateo 6:33

Li kʼusi laj yal Jesus ta Mateo 6:33 jaʼo laj yal li ta Mantaletik a Vits ti te ta jtatik ta kapitulo 5 kʼalal ta 7 li ta Evanjelio yuʼun Mateoe. Jutuk mu skotoluk li buchʼutik la xchikintaik li kʼusi laj yal Jesuse povreik, jaʼ yuʼun xuʼ van jaʼ mas tsots skʼoplal chilik ti saʼik li kʼusitik jtunel yuʼunik jujun kʼakʼale, jech kʼuchaʼal li sveʼelike. Jaʼ yuʼun, jutuk xa van yorail yuʼunik sventa saʼik li Ajvalil yuʼun Diose. Pe li Jesuse laj yal ti akʼo skʼelik kʼuxi chchabi Dios li mutetike xchiʼuk li nichimetike, yuʼun jamal yaloj ti jaʼ jech chchabi li buchʼutik baʼyel tsaʼik li Ajvalilal yuʼune (Mateo 6:25-30).

Li kʼusi mu jechuk chalik ta sventa Mateo 6:33

Li kʼusi xchʼunoj yantike: Li buchʼutik baʼyel tsaʼik li Ajvalilal yuʼun Diose, ta spasik ta jkʼulej.

Li kʼusi melele: Li Jesuse laj yal ti buchʼu baʼyel chakʼ ta xkuxlejalik li Ajvalilal yuʼun Diose, oy noʼox yuʼunik li kʼusi jtunel yuʼunike, jech kʼuchaʼal li sveʼelike xchiʼuk li skʼuʼ spokʼike (Mateo 6:25, 31, 32). Pe muʼyuk x˗albatik ti tspasik ta jkʼulej o ti ch˗akʼbatik yuʼun Dios skotol li kʼusitik x˗ayan ta skoj ti baʼyel chakʼ ta xkuxlejalik li Ajvalilale. Maʼuk noʼox, li Jesuse laj yal ti xibal sba mi oy ta koʼontontik chijpas ta jkʼuleje, yuʼun jaʼ xa mas vokol chkaʼitik ti baʼyel chkakʼ ta jkuxlejaltik li Ajvalilal yuʼun Diose (Mateo 6:19, 20, 24). Li jtakbol Pabloe tsots abtej ta sventa li Ajvalilal yuʼun Diose, akʼo mi jech, bateltike jaʼ noʼox oy yuʼun li kʼusi chtun yuʼun sventa chkuxi˗oe. Li Pablo eke laj yal ti toj xibal sba mi ta jkʼan chijpas ta jkʼuleje (Filipenses 4:11, 12; 1 Timoteo 6:6-10).

Li kʼusi xchʼunoj yantike: Li yajtsʼaklomtak Kristoe mu persauk x˗abtejik sventa sta li kʼusi jtunel yuʼunike.

Li kʼusi melele: Li Vivliae chal ti yajtsʼaklomtak Kristoe skʼan x˗abtejik sventa sta li kʼusi chtun yuʼun xchiʼuk yutsʼ yalale (1 Tesalonisenses 4:11, 12; 2 Tesalonisenses 3:10; 1 Timoteo 5:8). Li Jesuse muʼyuk laj yalbe yajchankʼoptak ti jaʼ noʼox ta saʼik li Ajvalilal yuʼun Diose; laj yal ti jaʼ baʼyel skʼan saʼike.

Li buchʼutik baʼyel tsaʼik li Ajvalilal yuʼun Diose xchiʼuk ti ch˗abtejik sventa saʼik li kʼusitik chtun yuʼunike, xuʼ me jpʼel ta yoʼontonik ti chkoltaatik yuʼun Dios sventa staik li kʼusi jtunel yuʼunike (1 Timoteo 6:17-19).

a Kʼalal «saʼilanik me» xie, jelubtasbil tal ta griego kʼop xchiʼuk jaʼ skʼan xal ti jechuk˗o xichʼ pasele. Xuʼ xi chichʼ jelubtasel xtoke: «Jechuk˗o me xasaʼilanik». Jaʼ yuʼun chaʼa, saʼel li Ajvalilal yuʼun Diose skʼan jaʼ mas tsots skʼoplal xkil ta jkuxlejaltik, ti maʼuk noʼox uni jlikele.