«Ta sjunul avoʼonton pato avoʼonton ta stojolal Jeova xchiʼuk mu xapat-o avoʼonton ti oy kʼusi xavaʼibe smelolale. Tsako ta venta ta skotol li kʼusitik chapase, vaʼun jaʼ tstukʼibtas batel li abe bu chabate» (Proverbios 3:5, 6, Xchʼul Kʼop Dios sventa Achʼ Balumil).

 «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque. Acʼo sventain Mucʼul Dios scotol li cʼusi chapase, yuʼun jaʼ xuʼ chayicʼot batel ta tuqʼuil be» (Proverbios 3:5, 6, Xchʼul Cʼop Jtotic Dios, ta skʼop Chenalhó).

 Kʼalal oy kʼusi tsots skʼoplal ta jkʼan ta jnop ta jpas ta jkuxlejaltike, skʼan jsaʼtik beiltasel ta stojolal Jeova, a maʼuk jpastik li kʼusi lek noʼox chkil jtuktike.

 «Ta sjunul avoʼonton pato avoʼonton ta stojolal Jeova». Chkakʼtik ta ilel ti ta jpat koʼontontik ta stojolal Dios kʼalal jaʼ jech ta jpastik kʼuchaʼal tskʼan yoʼontone. Ta sjunul koʼontontik skʼan jpat koʼontontik ta stojolal. Kʼalal koʼontontik xi li Vivliae, jaʼ chalbe skʼoplal kʼu yelan li jun krixchanoe, jaʼ xkaltik, ti kʼu yelan chaʼi sbae, li kʼusi tspase, ti kʼu yelan tsnope xchiʼuk ti kʼu yelan stalelale. Jaʼ yuʼun, ti ta sjunul koʼonton ta jpat koʼontontik ta stojolal Diose, maʼuk noʼox ti kʼu yelan chkaʼi jbatike, jaʼ skʼan xal ti jchʼunojtik lek ti li Jpasvanej kuʼuntike snaʼoj li kʼusi mas lek ta jtojolaltike (Romanos 12:1).

 «Mu xapat-o avoʼonton ti oy kʼusi xavaʼibe smelolale». Ta skoj ti jpasmulilutike mu stakʼ ti jpat koʼonton li ta jpʼijil noʼox jtuktike. Jaʼ yuʼun, toj tsots skʼoplal ti jpat koʼontontik ta stojolal Diose. Mi jaʼ noʼox ta jpastik li kʼusi ta jkʼan jtuktike, ta slikebale lek noʼox yilel, pe ta tsʼakale chakʼ jvokoltik (Proverbios 14:12; Jeremias 17:9). Li Diose stuk xa noʼox toj echʼ spʼijil (Isaias 55:8, 9). Mi chkakʼtik akʼo sbeiltasutike, lek me chbat li jkuxlejaltike (Salmo 1:1-3; Proverbios 2:6-9; 16:20).

 «Tsako ta venta ta skotol li kʼusitik chapase». Kʼalal oy kʼusi tsots skʼoplal ta jkʼan ta jpas ta jkuxlejaltike, skʼan jtsaktik ta venta li kʼusi tsnop Diose. ¿Kʼuxi ta pasel? Jaʼo kʼalal ta jkʼanbetik Dios ti akʼo sbeiltasutike xchiʼuk kʼalal ta jchʼuntik li beiltaseletik chakʼbutik ta Vivliae (Salmo 25:4; 2 Timoteo 3:16, 17).

 «Jaʼ tstukʼibtas batel li abe bu chabate». Li Diose tskoltautik sventa jkuxlebintik li stukʼil mantaltake, vaʼun jaʼ jech tstukʼibtas batel li jbetike (Proverbios 11:5). Kʼalal jech ta jpastike, mu masuk chkil jvokoltik xchiʼuk xijmuyubaj noʼox (Salmo 19:7, 8; Isaias 48:17, 18).

 Li ta slivroal Proverbiose yichʼoj tal ep beiltaseletik ti tskoltautik sventa xijmuyubaj noʼoxe xchiʼuk ti jpastik li kʼusi lek chil Diose. Li ta kapitulo 1 kʼalal ta 9, ti kʼu yelan tsʼibabile xkoʼolaj kʼuchaʼal chakʼbe tojobtasel skerem jun totil. Li ta kapitulo 3, jaʼ mas chalbe skʼoplal ti lek chbat xkuxlejal li krixchanoetik ti ep sbalil ta xilik xchiʼuk ti chakʼ ta xkuxlejalik li pʼijil tojobtaseletik chakʼ li Jpasvanej kuʼuntike (Proverbios 3:13-26).