«Mu xa me jechuk xapasik kʼuchaʼal tspas skotol li kʼusitik oy ta balumile; jaʼ lek jelo anopbenik sventa xjel atalelalik, sventa xavakʼ venta atukik li kʼusi leke, li kʼusi chʼambile xchiʼuk li kʼusi tukʼ tskʼan yoʼonton Diose» (Romanos 12:2, Xchʼul Kʼop Dios sventa Achʼ Balumil).

 «Mu xa jechuc xanopic jech cʼu chaʼal ta spasic ti jnaclejetic ta banomil ti yan sjol yoʼntonique. Jeluc ti snopbenal avuʼunique yoʼ jech ta xʼachʼub ti acuxlejalique. Jech ta xlic avaʼibeic yoʼnton ti Diose, jaʼ ti cʼusi lec ta pasele, ti cʼusi xmuyubaj yoʼnton yuʼune, ti cʼusi lec tucʼ ta xile» (Romanos 12:2, Xchʼul Cʼop ti Jtotic Diose, ta skʼop Chamula).

 Mi oy buchʼu tskʼan tspas li kʼusi lek chil Diose, skʼan spʼaj li xchopol talelal yantike xchiʼuk sjel li stalelale. Melel onoʼox, li Diose chʼabal buchʼu tsuj sventa sjel li stalelale. Li buchʼu jech tspase jaʼ ta skoj ti skʼanoj li Diose xchiʼuk ti chakʼ venta ti tstabe sbalil li smantaltake, ti mu tsotsuk ta chʼunele xchiʼuk chakʼ ta ilel ti skʼanojutik li Diose (Isaias 48:17).

 «Mu xa me jechuk xapasik kʼuchaʼal tspas skotol li kʼusitik oy ta balumile». «Li kʼusitik oy ta balumile», jaʼ xkaltik, ti kʼu yelan xkuxlejalik li krixchanoetike, li stalelalike xchiʼuk li kʼusi nopem xaʼiik spasele, maʼuk jech tspasik kʼuchaʼal tskʼan yoʼonton Diose (1 Juan 2:15-17). Taje jaʼ chtijbat˗o yoʼonton yan krixchanoetik sventa jechuk xkuxlejalik o stalelalik. Mi oy buchʼu tskʼan chichʼ ta mukʼ li Diose, skʼan me stsʼik yuʼun sventa mu xchanbe stalelal li yantike. Mi muʼyuk jech la spase, chlik me sokuk li stalelale xchiʼuk muʼyuk me lek chil li Diose (Efesios 2:1-3; 4:17-19).

 «Jelo anopbenik». Li jun krixchanoe skʼan xakʼ persa ti sjel li yut yoʼontone, li stalelaltake, li snopbene xchiʼuk ti kʼu yelan chaʼi sbae. Li jpʼel kʼop ta griego ti «jelo» xie, jaʼ chakʼ ta aʼiel ti oy kʼusi chjel ta j˗echʼele, jech kʼuchaʼal kʼalal chkʼataj ta jkot pepen li jkot tsukume. Sventa xkichʼtik ta mukʼ li Diose, li Vivliae chal ti skʼan jlaptik li achʼ talelale (Efesios 4:23, 24; Kolosenses 3:9, 10).

 «Sventa xavakʼ venta atukik li kʼusi leke, li kʼusi chʼambile xchiʼuk li kʼusi tukʼ tskʼan yoʼonton Diose». Li Diose oy ta yoʼonton ti buchʼutik ch˗ichʼat ta mukʼe skʼan jpʼeluk ta yoʼontonik li kʼusi xchʼunojike. ¿Kʼusi xuʼ spasik sventa jpʼel ta yoʼonton xchʼunike? Jaʼ kʼalal chchan Svivliaike, kʼalal chakʼ ta xkuxlejalik li kʼusi chale xchiʼuk kʼalal chakʼ venta stukik ti ep sbalil tstabeik kʼalal ta xakʼ ta xkuxlejalik li smantaltak Diose. Jaʼ jech chakʼik venta ti jaʼ mas lek kʼusi chkʼot ta pasel kʼalal jaʼ tspasik li kʼusi tskʼan Diose (Salmo 34:8).

 Li ta kapitulo 12 ta Romanose te chalbe smelolal kʼusi skʼan xal ta melel ti chkichʼtik ta mukʼ Dios kʼuchaʼal tskʼane. Ti vaʼ yelan chkichʼtik ta mukʼ li Diose, te smakojbe skʼoplal ti kʼu yelan li jkuxlejaltike xchiʼuk ti jnoptik leke, maʼuk noʼox ta skoj ti lek noʼox chkaʼi jbatike o ti jecheʼ noʼox ta jvontol chʼuntik li kʼusitike (Romanos 12:1, 3). Li ta kapitulo liʼe, oy lekil tojobtaseletik ta sventa ti kʼu yelan skʼan stalelal li jun yajtsʼaklom Kristoe, ti kʼuxi xuʼ lek xil sba xchiʼuk yantike xchiʼuk ti kʼusi skʼan spas mi oy kʼusi chopol pasbat yuʼun yantike (Romanos 12:9-21).