TEKSTOETIK TI CHAPBIL SMELOLALE

 Romanos 15:13 | «Akʼo yakʼboxuk xkuxetel oʼontonal xchiʼuk jun oʼontonal li Diose»

«Akʼo yakʼboxuk xkuxetel oʼontonal xchiʼuk jun oʼontonal li Dios ti jaʼ chakʼ spatobil oʼontonal ta skoj ti apatoj avoʼontonik ta stojolale sventa x-epaj li spatobil avoʼontonik ta sjuʼel li chʼul espiritue» (Romanos 15:13, Xchʼul Kʼop Dios sventa Achʼ Balumil).

«Li Dios ti jpatoj coʼntontic ta stojole acʼo yacʼboxuc ep xcuxetel avoʼntonic, xchiʼuc acʼo spas ta jun avoʼntonic ta sventa ti achʼunojique, yuʼun jech ta sventa stsatsal Chʼul Espíritu chcʼot lec ta avoʼntonic chamalaic li cʼusi chaʼacʼbatique» (Romanos 15:13, Xchʼul Cʼop Jtotic Dios, ta skʼop Chenalhó).

Li kʼusi skʼan xal Romanos 15:13

Li jtakbol Pabloe jaʼ jech laj yalbe li xchiʼiltak ta chʼunolajel ti x-akʼbatik xkuxetel yoʼontonik yuʼun Diose xchiʼuk ti x-akʼbatik jun oʼontonale. Li lekil talelaletik taje tskoltautik sventa oyuk spatobil koʼontontik xchiʼuk sventa xakʼbutik li xchʼul espiritu Diose.

Li spatobil oʼontonal chakʼ Diose te ta jtatik ta Vivlia, xi chal Romanos 15:4: «Skotol li kʼusitik laj yichʼ tsʼibael ta voʼnee [li ta Vivliae] laj yichʼ tsʼibael sventa jchanubtaseltik, sventa oyuk spatobil koʼontontik ta skoj ti chkuch kuʼuntik xchiʼuk ti tspat koʼontontik li Tsʼibetike». Ta skoj li vokoliletike, oy junantik krixchanoetike ta xchʼay li spatobil yoʼontonike. Pe li Diose jamal yaloj ti ta slajes skotol li vokoliletik taje, jech kʼuchaʼal li povreale, li kʼusitik muʼyuk tukʼ chkichʼtik pasbele, li chameletike xchiʼuk li lajelale (Apokalipsis 21:4). Li Diose jaʼ yakʼojbe sbain Jesus sventa xkʼot ta pasel yuʼun skotol taje. Jaʼ yuʼun, skʼan mu xchʼay li spatobil koʼontontik ti oy kʼusi lek chtale (Romanos 15:12).

Mi la jchʼuntik lek ta stojolal li Diose, ta me xakʼ li spatobil koʼontontike. Mi jech la jpastike, mas to tstsatsub batel. Mi mas to laj kojtikintik li Diose, mas to ta jpat koʼontontik ta stojolal (Isaias 46:10; Tito 1:2). Li buchʼutik tspat yoʼontonik li ta kʼusitik yaloj Diose xuʼ me jun noʼox yoʼontonik xchiʼuk xmuyubajik noʼox manchuk mi oy vokoliletik (Romanos 12:12).

Li jun oʼontonal, muyubajel xchiʼuk li spatobil oʼontonale snitojbe sba skʼoplal xchiʼuk li chʼul espiritue ti jaʼ sjuʼel tstunes li Diose. a Li Diose tstunes xchʼul espiritu sventa xkʼot ta pasel skotol li kʼusi yaloje. Taje, tstsatsub-o li spatobil koʼontontike. Jech xtok, li chʼul espiritue tskoltautik ta stsʼitesel lekil talelal, jech kʼuchaʼal muyubajel xchiʼuk jun oʼontonal (Galatas 5:22).

Stsʼak loʼil ta Romanos 15:13

Li slivroal Romanose jaʼ jlik karta ti laj yichʼik tsʼibabel batel li yajtsʼaklomtak Kristo ti te nakalik ta Romae. Junantike jaʼik snitilulal Juda, pe li yantike, maʼuk. Li jtakbol Pabloe la stijbe yoʼonton sventa jmojuk tsobolik, jmojuk kʼusi tsnopik xchiʼuk tspasik manchuk mi jelel bu likemik talel xchiʼuk jelel li kʼusitik nopem xaʼiik spasele (Romanos 15:6).

Li jtakbol Pabloe la svulesbe ta sjol yajtsʼaklomtak Kristo ta Roma ti voʼne xa onoʼox albil ti chkʼot yorail ti jmoj chichʼik ta mukʼ Jeova li krixchanoetik ti jelajtik slumalike. Sventa xakʼ ta ilel ti melel li kʼusi chale, chankoj to la stʼabbe skʼoplal li ta tsʼibetik ta Ebreo Kʼope b (Romanos 15:9-12). Li kʼusi jamal chakʼ ta aʼiele jaʼ liʼe: ti maʼuk noʼox Judaetik tstabeik sbalil li kʼusi laj yakʼ ta chanel Kristoe. Yuʼun li Diose chakʼbe spatobil yoʼonton skotol li krixchanoetike. Jaʼ yuʼun, skʼan lekuk xchʼam sbaik ta jujuntal li yajtsʼaklomtak Kristo ta Romae, jaʼ xkaltik, ti xakʼ ta ilel slekil yoʼontonike xchiʼuk ti muuk xtʼujvanike (Romanos 15:7).

[Tsʼib ta yok vun]

[Lokʼol]

Kʼelo li kapitulo 15 ta Romanose xchiʼuk li tsʼibetik ta yok vun yichʼoj tale xchiʼuk li tekstoetik ti bu chtakvan batel li chʼin letraetike.