«Pe laj yakʼ ta ilel ti skʼanojutik li Diose, yuʼun cham ta jtojolaltik Kristo kʼalal jpasmulilutik toʼoxe» (Romanos 5:8, Xchʼul Kʼop Dios sventa Achʼ Balumil).

 «Pero li Diose laj yacʼ ta ilel ti ta melel scʼanojutique, acʼo me solel yuxub jpasmulilutic, pero icham ta jcojtic li Cristoe» (Romanos 5:8, Xch’ul Cʼop Jtotic Dios, ta skʼop Chenalhó).

 Li Jeovae a laj yakʼ ta ilel kʼanelal kʼalal la stak talel li Xnichʼon sventa xcham ta stojolal li jpasmuliletike (Juan 3:16). Ta skoj ti jpasmulilutike, oy kʼusitik muʼyuk lek ta jnoptik xchiʼuk oy kʼusitik ta jpastik ti skontrainoj li smantaltak Diose (Kolosenses 1:21, 22). «Ta skoj ti cham li Xnichʼone», xuʼ xchaʼta yav ti kʼu yelan lek xkil jbatik xchiʼuk li Diose (Romanos 5:10). Koliyal taje, xuʼ lek xkil jbatik xchiʼuk li Dios avie xchiʼuk oy spatobil koʼontontik ti xuʼ xijkuxi sbatel osile (Romanos 5:11; 1 Juan 4:9, 10).

 Li kʼusi la stsʼiba li jtakbol Pabloe jaʼ la stakbe batel li yajtsʼaklomtak Kristo ta Romae. Taje te ta jtatik ta Romanos kapitulo 5. Li Pabloe laj yalbe yajtsʼaklomtak Kristo ti kʼu yuʼun xuʼ xmuyubajike xchiʼuk ti kʼu yuʼun xuʼ xchʼunik lek ti oy li spatobil yoʼontonike (Romanos 5:1, 2). Xi laj yal li Pabloe: «Muʼyuk tsloʼlautik li spatobil koʼontontike». Li spatobil oʼontonal taje, likem talel ta stojolal Dios ta skoj ti skʼanojutik tajeke xchiʼuk laj yakʼ ta ilel kʼalal la stak talel li Xnichʼon sventa xcham ta jtojolaltike (Romanos 5:5, 6). Li baʼyel vinik ti jaʼ Adane jelel xchiʼuk li Jesuse, yuʼun li Jesuse la xchʼunbe skotol smantal li Diose (Romanos 5:19). Ta skoj ti muʼyuk xchʼun mantal li Adane, la jkuchintik mulil xchiʼuk lajelal (Romanos 5:12). Pe koliyal ti skotol velta la xchʼun mantal li Jesuse xchiʼuk ti laj yakʼ li xkuxlejal ta matanale, li buchʼutik chchʼunik mantale xuʼ sta spatobil yoʼontonik ti chkuxiik ta sbatel osile (Romanos 5:21).