«Li stojol mulile jaʼ li lajelale, yan li matanal chakʼ Diose jaʼ kuxlejal sbatel osil ta stojolal li Kristo Jesus ti jaʼ Kajvaltike» (Romanos 6:23, Xchʼul Kʼop Dios sventa Achʼ Balumil).

 «Li stojol mulile jaʼ ti chijchamutique; yan li jmotontic chijyacʼbutic Dios ta sventa ti jun oyutic jchiʼuctic li Cajvaltic Cristo Jesuse jaʼ li cuxlejal sventa sbatel osile» (Romanos 6:23, Xchʼul Cʼop Jtotic Dios, ta skʼop Chenalhó).

 Kʼalal jech laj yal li jtakbol Pabloe jaʼ laj yalbe skʼoplal ti chijchamutik ta skoj ti jmulavilutike. Akʼo mi jech, li Diose chalbe li tukʼil yajtuneltak ti xuʼ staik li kuxlejal sbatel osile, yuʼun jaʼ jun matanal chakʼ.

 «Li stojol mulile jaʼ li lajelale». Kʼalal chijvokʼutike maʼuk tukʼil krixchanoutik, jaʼ yuʼun jkotoltik ta jpas jmultik a (Salmo 51:5; Eklesiastes 7:20). Ta skoj taje chijmalubutik xchiʼuk chijchamutik manchuk mi mu jkʼantik (Romanos 5:12).

 Sventa xchapbe smelolal li Pablo taje, laj yakʼbe jun skoʼoltasobil. Laj yal ti mulile xkoʼolaj kʼuchaʼal jun yajval abtel ti tstoj li jun yaj˗abtele. Jech kʼuchaʼal li jun j˗abtel ti smaloj ti xichʼ tojel ta skoj li yabtele, jaʼ jech li voʼotik eke jmalaojtik lajelal ti jaʼ stojobil xkaltik li jmultike.

 Pe li Pabloe xi laj yale: «Tupʼbil xa smul li buchʼu chamem xae» (Romanos 6:7). Kʼalal oy buchʼu chchame chtupʼbat˗o skotol li smultak la spase. Jaʼ yuʼun, mu xuʼ jnoptik ti oy to bu ta xil svokolik ta skoj ti oy kʼusitik chopol la spasik kʼalal kuxulik toʼoxe. Li Vivliae jamal onoʼox chal ti buchʼutik chamemike muʼyuk kʼusi tsnopik, muʼyuk kʼusi chaʼiik mi jaʼuk kʼusi stakʼ spasik (Eklesiastes 9:5).

 «Yan li matanal chakʼ Diose jaʼ kuxlejal sbatel osil ta stojolal li Kristo Jesuse». Jech kʼuchaʼal laj kaltik talele li ‹stojobil› mulile jaʼ li lajelale. Pe jaʼuk li Diose chakʼbutik li kuxlejal ta sbatel osil kʼuchaʼal jun matanal. Kʼalal matanal xi chichʼ jelubtasel li ta griegoe jaʼ skʼan xal: «Matanal ti mu jtatik˗oe» o «matanal ti muʼyuk tojbile». Jaʼ skʼan xal ti oy kʼusi chkichʼtik akʼbel akʼo mi muʼyuk kʼusi jpasojtik sventa xij˗akʼbate. Jech ta melel, jkotoltik jpasmulilutik, jaʼ yuʼun akʼo mi oy kʼusitik ta jkʼan ta jpastik, mu onoʼox xtoj kuʼun jtuktik li jkoleltike xchiʼuk mu onoʼox xuʼ jtatik ta jtuktik li kuxlejal sbatel osile (Salmo 49:7, 8). Pe li Diose ta slekil yoʼonton tskʼelanbe li kuxlejal sbatel osil li buchʼutik chakʼik ta ilel xchʼunel yoʼontonik ta stojolal li Jesuse (Juan 3:16; Romanos 5:15, 18).

 Li karta la stsʼiba li jtakbol Pabloe jaʼ la stakbe batel li yajtsʼaklomtak Kristo ta Roma, tetik van ta sjabilal 56 kʼalal talem xa ox Jesuse. Junantik yajtsʼaklomtak Kristoe jaʼ jech tsnopik kʼuchaʼal li jfilosofoetik ta Greciae, yuʼun tsnopik ti mas to la chilbeik xkʼuxul yoʼonton Dios xchiʼuk ch˗akʼatik ta perton mi mas to ep tspas smulike (Romanos 6:1). Jlom xtoke, xuʼ van la snopik ti muʼyuk xa tstoj smulik ta skoj ti muʼyuk xa chchʼunbeik smantaltak li Moisese (Romanos 6:15). Pe li ta skarta Pabloe jamal laj yalbe li yajtsʼaklomtak Kristoe ti mu xuʼ x-akʼbatik ta ilel xkʼuxul yoʼonton Dios mi yolbaj ta spas smulike (Romanos 6:12-14, 16).

 Li kʼusi laj yal Pabloe tspatbe yoʼonton li yajtuneltak Dios avie, yuʼun akʼo mi jpasmulil chvokʼik xuʼ staik li kuxlejal sbatel osil mi chchʼunbeik smantaltak li Diose xchiʼuk mi tstsalik li kʼusi chopol tskʼan yoʼontonike (Romanos 6:22).

 Sventa xavaʼibe smelolal kʼusi chal li karta sventa Romanose, kʼelo li video liʼe.