«Pajeso xa abaik xchiʼuk naʼik ti voʼon Diosune. Chkichʼ toybel jkʼoplal ta stojolal li mukʼtik lumetike; chkichʼ toybel jkʼoplal li ta balumile» (Salmo 46:10, Xchʼul Kʼop Dios sventa Achʼ Balumil).

 «Pajanic xa, naʼic me ti vuʼun Diosune; ichʼbilun ta mucʼ ta jujun banamil, vuʼun jventainoj scotol li banamile» (Salmo 46:10, Xch’ul C’op Jtotic Dios, ta skʼop Chenalhó).

 Li Diose chalbe skotol li krixchanoetik ti akʼo x˗ichʼat ta mukʼe xchiʼuk ti akʼo snaʼik ti jaʼ noʼox oy sderecho tspas mantal li ta balumile. Chʼabal buchʼu xuʼ xal ti chʼabal sjuʼele xchiʼuk ti chʼabal sderecho tspas mantale. Skotol li buchʼu tskʼan chkuxi ta sbatel osile skʼan snaʼik taje (Apokalipsis 4:11).

 «Pajeso xa abaik xchiʼuk naʼik ti voʼon Diosune». Junantik Vivliae xi jelubtasbil li ta slikeb versikuloe: «Pajeso abaic, chʼan xa chanic» (Xch’ul C’op ti Jtotic Diose, ta skʼop Chamula). Jaʼ yuʼun, ep krixchanoetik muʼyuk lek kʼusi tsnopik ta sventa li versikulo liʼe ti skʼan la tsʼijiluk o chʼanxiik li ta xchʼulnaike. Akʼo mi jech, li ta ebreo kʼop kʼalal chal «pajeso xa abaik xchiʼuk naʼik ti voʼon Diosune», jaʼ jun tojobtasel laj yalbe krixchanoetik ta spʼejel balumil li Jeovae. a Li Jeovae laj yalbe ti akʼo mu xa xkontrainate xchiʼuk ti akʼo yakʼik venta ti jaʼ noʼox sta˗o ichʼel ta mukʼe.

 Jaʼtik jech chal jun tojobtasel ta Salmo 2. Tee chal ti chakʼbe kastigo li buchʼu chkontrainate. Jech xtok, li buchʼutik xchʼunojik ti jaʼ noʼox oy sderecho chventainvan li Diose spatoj yoʼontonik ti chbeiltasatike, tstsatsubtasatik xchiʼuk ti ch˗akʼbat spʼijilike. Li buchʼutik tsaʼ snakʼobbailik ta stojolale, xmuyubajik noʼox xchiʼuk jun yoʼontonik mas to kʼalal chil svokolike (Salmo 2:9-12).

 «Chkichʼ toybel jkʼoplal ta stojolal li mukʼtik lumetike; chkichʼ toybel jkʼoplal li ta balumile». Li ta voʼnee, li Jeovae laj yichʼ mukʼibtasbel skʼoplal kʼalal laj yakʼ ta ilel sjuʼel sventa spoj li steklumale (Eksodo 15:1-3). Li ta jelavele, kʼalal skotol xa ox krixchanoetik chichʼik ta mukʼ Jeova ti jaʼ noʼox stuk oy sderecho chventainvan tale, mas to chichʼ mukʼibtasbel skʼoplal (Salmo 86:9, 10; Isaias 2:11).

 Jlik livro ta español ti chalbe skʼoplal li Salmo 46 chakʼ kaʼitik ti «jpat koʼontontik li ta sjuʼel Dios ti te skotol ora sventa spoj steklumal kʼalal jaʼo chil svokolike». Kʼalal la skʼejintaik Salmo 46 li steklumal Diose, laj yakʼik ta aʼiel ti spatoj yoʼontonik ta stojolal Jeova ti xuʼ xpojatik xchiʼuk ti xuʼ xkoltaatike (Salmo 46:1, 2). Li kʼusi chal li salmo liʼe vulesbat ta sjolik ti te chiʼinbilik˗o yuʼun Jeova skotol orae (Salmo 46:7, 11).

 Li yajtuneltak Jeovae oy kʼusi albatik ta salmo sventa masuk to spat yoʼontonik ta stojolal Jeova ti xuʼ xkoltaatike. Albatik ti akʼo snopbeik skʼoplal li kʼusitik labalik sba spasoj Jeova ta stojolalike (Salmo 46:8). Li kʼusi mas chakʼbe snopike jaʼ ti xuʼ slajesbe skʼoplal paskʼopetik li Diose (Salmo 46:9). Kʼalal la spoj lokʼel steklumal Jeova ta skʼob yajkontratak ta voʼne li Jeovae, xkoʼolaj ti la slajesbe skʼoplal li paskʼope. Pe li Vivliae chal ti Jeovae jutuk xa skʼan slajesbe skʼoplal ta j˗echʼel li paskʼopetik ta spʼejel balumile (Isaias 2:4).

 Li avi une, ¿mi jech˗o yakal tskolta yajtuneltak li Jeovae? Jech. Li jtakbol Pabloe la stojobtas li yajtsʼaklomtak Kristo ti akʼo spat yoʼontonik ta stojolal Dios ti ta onoʼox xkoltaatike (Ebreos 13:6). Li kʼusi chal li Salmo 46 mas to ta jpat˗o koʼontontik ti ta onoʼox xchabiutik xchiʼuk tskoltautik ta stsatsal juʼel li Diose, jech xtok chkʼot ta jnakʼobbailtik xchiʼuk kipaltik (Salmo 46:1).

 Sventa xavaʼibe smelolal li kʼusi chal li slivroal Salmose, kʼelo li video liʼe.