Mas ta 40 jabil te oy li mukʼta tsajal letrero li ta smukʼta nail smeʼ nail abtelal yuʼun li stestigotak Jeovae. Jaʼ te tskʼelik-o ora xchiʼuk xkʼixnal osilbalumil li krixchanoetike. Jech xtok, jaʼ xa jtos ti kʼusi ojtikinbil-o li lume.

Xi chal Eboni ti lek skʼeloj batel ti bu nakal ta Brooklyn (Nueva York): «Toj lek chkil ti xkil jayib orae xchiʼuk li xkʼixnal osilbalumil ta jventana kʼalal skʼan toʼox xilokʼ batel ta kabtele. Jaʼ jech chkakʼ venta ti sob to chibate xchiʼuk ti lek li jkʼuʼ jpokʼ jlapoj batele».

¿Mi te to van chkom 40 jabiluk li jtunel letrero taje? Mase jaʼ ti chʼabal xae, yuʼun snopojik xa ti tsjelbeik yavil smeʼ nail abtelal yuʼunik li stestigotak Jeovae, te chjelav batel ta snoroesteal Nueva York. Jech oxal jaʼ xa me tsnopik kʼusi tspasik ta sventa letrero li buchʼutik tsmanike.

Oy onoʼox yan sletreroal li mukʼta na ti leʼ mas ta 70 jabile. Pe li stestigotak Jeovae la sjelbeik sletreroal kʼalal la smanik ta sjabilal 1969 li na taje.

Skʼan onoʼox kʼelilanel li letreroe. Jaʼ yuʼun, ep kerem tsebetik la sbainik skʼelel, tsmeltsanbeik li kʼusitik tsok yuʼun ti kʼusiuk noʼox orae.

Xi chvul ta sjol jun jchabivaneje: «O jun akʼobale kʼopoj tal li direktor sventa notisia ta jun kanal ta televisione. Laj yalbunkutik ti jelel la 15 segundo yorail li reloje, ti skʼan la tukʼibtasel ta orae, yuʼun la chlokʼ ta sprograma li vaʼ akʼobale. Jaʼ yuʼun akʼo mi chvay tajek yaʼi li jun teknikoe, bat smeltsan ta anil».

Ti kʼu xa sjalil echʼem tale, ep xa kʼusitik smeltsanojbeik tal li letreroe. Jech kʼuchaʼal liʼe, ta slikebale jaʼ noʼox chakʼ ta ilel li ora xchiʼuk li xkʼixnal osilbalumil ta Fahrenheit, pe te van ta 1985 talele laj yichʼ akʼel li skʼelobil xkʼixnal osilbalumil ta grados Celsius.

Li ta 2009 xtoke laj yichʼ jelbel li stuvoaltak ti neón sbie, jaʼ xa la stikʼbeik tsajal tuvo ti diodos emisores de luz (LED) sbie; jaʼ mas yalel, mas lek yijil takʼin xchiʼuk ti mas jal xtune. Jech xtok, mas ta 4 mil dolar muʼyuk xa chlaj yuʼun ta smeltsanobil. Mu xa epuk tsnit lus li letrero taje.