Yojtikinel li kʼusitik ta voʼnee
Leʼ xa talel ta 2012, li buchʼutik tsvulaʼanik li smeʼ nail abtelal yuʼun stestigotak Jeova ta Brooklyn (Nueva York), oy kʼusi achʼ tskʼupinik skʼelel. a Li kʼusitik te chichʼ ilele jaʼ li vokoliletik la snuptanike, li buchʼutik la spakbeik skʼoplal ta sventa li yajtsʼaklom Cristoe xchiʼuk te chal ta jaypʼeluk noʼox kʼop li kʼusi la snuptanik li stestigotak Jeovae.
Ti kʼu yelan chkojtikintik batele chʼakbil ta chanvokʼ, ti te snitojbe batel skʼoplal ti chlik talel ta sjabilal 33 kʼalal maʼuk toʼox jkʼakʼaliltik ti chvul kʼalal to ta jkʼakʼaliltike. Li ta jujuvokʼe oy yuni bitak ti te lokʼesbil talel ta Vivliae xchiʼuk ta xlik yalbe skʼoplal ta jun uni bikʼit video (taje ta ingles oy, pe xuʼ jtʼujtik ta kʼusi kʼopal ta jkʼanbetik li sletrailtake: ta coreano, español, francés, italiano, japonés xchiʼuk portugués).
Ti chʼakbil ta chanvokʼe
Li sbi li baʼyel jvokʼ —ti te laj yichʼ lokʼesel ta Juan 3:19— jaʼ: «Li cristianoetique jaʼ la scʼanic o li icʼ osile». Li Vivliae laj xa onoʼox yal ti chtal chopol viniketik ti «chopol cʼusi chalic» sventa tsloʼlaik li krixchanoetike (Hechos 20:30). Ti kʼu yelan lek xcholet chalbe tal sloʼilal li kʼusitik echʼem talel ta voʼnee, lek tajek xvinaj ti oy echʼ li chopol viniketik taje.
Li sbi li xchaʼvokʼale jaʼ liʼe: «Acʼo oyuc sac osil», taje te laj yichʼ lokʼesel ta 2 Corintios 4:6. Jech kʼuchaʼal chal li kʼusitik echʼemik talele, te chalbe lek skʼoplal li kʼusitik echʼ talel ta slajebtik siglo 19 kʼalal to ta slikebaltik siglo 20, kʼalal skʼan toʼox li Baʼyel Mukʼta Paskʼop ta spʼejel Balumile. Taje te chalbe skʼoplal jayvoʼ viniketik ti laj yakʼik persa ta xchanel ta stukik li Vivliae, akʼo mi mu toʼox kʼusi snaʼik. Jech noxtok te chalbutik skʼoplal ti kʼu yelan ta kʼunkʼun lik yojtikin mase xchiʼuk ti epajik talele.
Li ta jvokʼ taje te chalbe skʼoplal li kʼusi lek ojtikinbil ti «Foto-Drama de la Creación» sbie, taje jaʼ noʼox xkaʼibetik yechʼomal ye xchiʼuk lokʼoletik. Li Jchanolajeletik ta Vivliae (ti jech toʼox ojtikinbilik li stestigotak Jeova) ta 1914, jaʼ baʼyel lik stunesik talel taje ti kapal ta lokʼoletik ti lek bonbil, ta pelikula xchiʼuk yechʼomal eil. Kʼalal echʼ xaʼox talel jayibuk jabile, ay skʼelik ta smiyonal xa noʼox krixchanoetik. Li kʼusi laj yichʼ akʼel ta ilele, jaʼ laj yichʼ tunesel li voʼneal lokʼoletike xchiʼuk mas ta 500 lokʼoletik ti lek oy skolorale xchiʼuk laj yichʼ tunesel uni videoetik li ta slikebale.
Li ta yoxvokʼale, xi chal li sbie: «Li dragone batsʼi tsots iʼilin», ti te laj yichʼ lokʼesel ta Apocalipsis 12:17. Te chalbe skʼoplal li svokol laj yilik talel li epal yajtsʼaklomtak Cristo li ta oʼloltik talel siglo 20 xchiʼuk te chalbe talel skʼoplal ti kʼu yelan muʼyuk la stikʼ sbaik talel ta politika kʼalal jaʼo yakal talel li paskʼope. Jech kʼuchaʼal li Remigio Cuminetti ti te ch-albat skʼoplal ta jun uni video ti jaʼ jun stestigo Jeova ti muʼyuk la skʼan la slapbe skʼuʼ soltaroetik ta Italiae xchiʼuk ti xbat li ta Baʼyel Mukʼta Paskʼop ta spʼejel Balumile. Yan video xtoke jaʼ chalbe skʼoplal li Alois Moser ti likem ta Austriae, ti muʼyuk laj yal li «¡Heil Hitler!» xie, ta skoj taje lokʼesat ta yabtel xchiʼuk laj yichʼ ikʼel batel ti bu chtakatik batel ta tsatsal abtel li jchukeletik ta Dachaue.
Ti kʼu toʼox yelan li chukinabetik ta voʼnee, jaʼ te chakʼ ta ilel li slokʼoltak li stestigotak Jeova ti laj yichʼik chukel ta skoj li xchʼunel yoʼontonik ta Grecia, Japón, Polonia xchiʼuk Serbiae.
Li ta xchanvokʼale, xi chal li sbie: «Ta sbejel banamil li Lequil Aʼyej ta jventae», ti te laj yichʼ lokʼesel ta Mateo 24:14. Jaʼ te chalbe skʼoplal li yabtel spasojik talel li stestigotak Jeova leʼ xa talel ta 1950 kʼalal to ta jkʼakʼaliltike. Ti kʼu yelan te cholol talel li lokʼoletike, oy oxtos ti kʼusi chalbe skʼoplal ta sventa li stestigotak Jeovae: ti kʼu yuʼun anil epajik talele, ti yakʼojik talel persa ta xcholel mantale xchiʼuk ti skʼanoj sbaike.
Kʼalal skʼan toʼox xlokʼ batel li jvulaʼale, xuʼ te xkom uni jlikeluk ti bu xuʼ stʼuj stukik ta jun pantaya li kʼusi tskʼan tskʼelike, ti xuʼ skʼelik li Casa Bíblica xchiʼuk li Tabernáculo de Brooklyn sbie, ti oy xa mas ta sien jabil laj yichʼ tunesel li naetik taje.
¿Kʼu yuʼun jech chichʼ akʼel ta ilel li naetik taje?
Jalij jun jabil sventa laj yichʼ pasel taje xchiʼuk laj to yichʼ jayibuk u sventa lek xa xkome. Li stestigotak Jeova ta spʼejel Balumile la stakik batel li kʼusitik oy yuʼunik ti voʼneik xa sventa lek ta kʼelele.
¿Kʼu yuʼun toj ep abtejik? Kʼalal laj yichʼ jakʼbel sloʼil jun li buchʼu te skʼoplal li ta Jtsop Jbeiltasvanej yuʼun li stestigotak Jeova ti kʼu yuʼun skʼan xbat svulaʼanik li stestigotak Jeova li kʼusitik te chichʼ akʼel ta ilele, xi noʼox ta stakʼ ta jun ojtikinbil loʼile: «Mu xuʼ xanaʼ bu chakʼan chabat mi mu xanaʼ bu likemot talele».
a Jamal sventa skotol krixchanoetik ta lunes kʼalal ta viernes, chjam ta vaxakib ora ta sob jaʼ to chmak ta voʼob ora ta bat kʼakʼal. Ti bu xkome jaʼ li ta numero 25 ta Columbia Heights. Muʼyuk tojbil chij-och.
Xuʼ van chakʼupin skʼelel xtok liʼe
KʼU YELAN LI BETELE
Museo ta smeʼ nail abtelal
Ojtikinbo sloʼilal li baʼyel yajtsʼaklomtak Cristoe xchiʼuk li xrextoik ta mantal li stestigotak Jeova. Li kʼusi chichʼ akʼel ta ilele te kapal skʼoplal voʼne vunetik, lokʼoletik xchiʼuk yan kʼusitik.