Li imprenta ti te oy ta Hacienda Watchtower (Wallkill, Nueva York) oy xa van mas ta 40 jabil ti lik abtejuke, lik ta 2 yuʼun fevrero ta 1973. Li vaʼ kʼakʼale te laj yichʼ pasel imprimir li revista ¡Despertad! xchiʼuk Li Jkʼel osil ta toyole, pe jaʼ noʼox sprevail.

Li stestigotak Jeovae la sman jsep yosilik ta 1963 sventa tstsʼunik kʼusitik tslajes li buchʼutik te ch-abtejik ta smeʼ nail abtelal ta Brooklyn (Nueva York). Pe li ta 1973 lik slokʼesik yan veʼlil te, jaʼ li veʼlil ta mantale (Mateo 24:45-47).

Li Philip Wilcox ti jaʼ sbainoj imprenta li vaʼ jabile, xi chvul ta sjol li kʼusi kʼot ta pasel li ta sba kʼakʼale: «Jun u lek laj yichʼ kuʼunkutik stsakanel li mukʼta makinaetik sventa spasobil vune. Kʼalal lek xaʼox chapale, lik jpaskutik preva mi lek. Ta ora noʼox ti ta smilal xa oy li revistaetike, la jtakkutik batel ta imprenta ta Brooklyn, vaʼun jaʼ xa la stakik batel ta tsobobbailetik. Lek laj yichʼ tunesel skotol li revistaetike». Li ta slikebaltik 1970, li imprenta ta Brooklyne mu xa stabe yipal spasel imprimir skotol li vunetike, yuʼun toj echʼ noʼox ep tskʼanik. Akʼo mi ta kʼakʼal-akʼobal ch-abtejik jaʼ noʼox chlokʼ ti kʼu yepal tskʼanike. Jaʼ yuʼun sventa mu xa xil mas svokolike, li stestigotak Jeovae la spasik li imprenta ta Wallkille.

Li baʼyel na laj yichʼ pasel ta Wallkille te laj yichʼ akʼel chanib spasobil vunetik, laj yichʼ pasel xtok ti bu chichʼ takel batel ta tsobobbailetik li vunetike xchiʼuk jpʼej Salon sventa Tsobobbail. Pe jujun kʼakʼal mas to tskʼanik li vunetike. Jaʼ yuʼun, te lik yichʼ vaʼanel jpʼej na xtok ti mas to mukʼe, yoʼ mu to tstabe yipal lek li kʼu yepal tspas imprimir li baʼyel imprentae. Kʼalal muʼyuk toʼox tsutsem svaʼanel li yan na taje, lik yichʼ tunesel li vakib spasobil vunetik ti te laj yichʼ akʼele.

Ta skoj ti yantik x-epaj li buchʼutik tskʼanik li vunetike xchiʼuk ti ch-achʼub batel ti kʼu yelan ta tunesel li spasobil vunetike, laj yichʼ mukʼibtasel xchiʼuk laj yichʼ meltsanel ep ta velta li imprenta ta Wallkille. Li ta 1980 lik yichʼ tunesel li makinaetik offset, jaʼ xa muʼyuk tstunesik li mol spasobil vunetik ti jaʼ tipográficas sbie.

Li ta 2004 muʼyuk xa te chichʼ pasel vunetik li ta imprenta ta Brooklyne, jaʼ yuʼun te lik yichʼ pasel livroetik ta sba velta li ta Wallkille. Li ta 2010 te xa lik yichʼ pasel revistaetik li ta Betel yuʼun stestigotak Jeova ta Canadae. Li imprentae tspas yuʼun 200 mil revistaetik ta jun noʼox ora.

Li avie jutuk mu skotoluk jaʼ tspas vunetik li imprenta ta Wallkille, yuʼun toj pʼijik xa li makinaetike. Te ch-abtejik 281 stestigotak Jeova ti naka noʼox chkoltavanike. Li echʼ jabile lokʼ mas ta vuklajuneb miyon livroetik xchiʼuk Vivliaetik. Maʼuk noʼox stuk li imprenta ta Wallkill, ta Canadá xchiʼuk ta Mexicoe, oy to xtok ta lajcheb lumetik jech kʼuchaʼal ta África, Asia, Australia, Europa xchiʼuk ta América del Sur. Jaʼ tsmakʼlinik epal miyon krixchanoetik ti solel chviʼnajik ta mantale (Mateo 5:3).