Kʼalal chichʼ jelubtasel ta yan kʼopetik li sletrail kʼejoje mu toj kʼunuk ta pasel. ¡Nopo noʼox avaʼi ti kʼu to yepal abtel yichʼoj ti xichʼ jelubtasel sliklej li livro ti yichʼoj 135 kʼejoje!

Li stestigotak Jeovae la spasik li abtelal taje, ta oxib jabile laj yichʼ jelubtasel ta 116 kʼopetik li achʼ livro sventa kʼejoje, ti jaʼ sbi: Jkʼejintatik li Jeovae. Jech xtok, yichʼoj jelubtasel ta 55 kʼopetik li jvokʼ ti yichʼoj 55 kʼejoje. Yakal xa chichʼ jelubtasel ta yan kʼopetik xtok.

Li stestigotak Jeovae sjelubtasojik van ta vakib sien kʼopetik li svunike xchiʼuk oy van chanibuk sien kʼopetik ti oy ta Internete. Pe li sjelubtasel sletrail kʼejoje to jvokol laj yaʼiik, yuʼun ti kʼu yelan snukʼilal ta kʼejintael li kʼejoje muʼyuk bu jel li ta yan kʼopetike.

Li smeltsanel kʼejoje mu xkoʼolaj kʼuchaʼal jelubtasel jlikuk revista. Yuʼun li revista Li Jkʼel osil ta toyole, li jelubtasej kʼopetike chakʼik tajek persa ti jechuk sjelubtasik jech kʼuchaʼal li ta orijinale. Pe li sjelubtasel kʼejoje mutik jech xkoʼolaj.

Li sjelubtasel kʼejoje jelel jutuk kʼu yelan chichʼ pasel. Yuʼun maʼuk noʼox ti jech tajek chichʼ jelubtasele kʼuchaʼal li ta orijinale, skʼan ti alakʼuk sba li kʼusi chale xchiʼuk ti xkom noʼox ta joltike.

Li sletrail kʼejoje skʼan kʼunuk ta aʼiel sventa xaʼibe smelolal xchiʼuk xkʼot ta yoʼonton ta anil li buchʼu tskʼejintae. Ta kʼusuk noʼox kʼopal ti chichʼ jelubtasele, skʼan kʼunuk ta kʼelel, jmojuk xbat xchiʼuk li sone xchiʼuk ti xkʼot ta koʼontontike.

¿Kʼuxi pas yuʼunik li jelubtasej kʼopetik taje? Ti kʼusi la spasike maʼuk ti jujupʼel xa tajek la sjelubtasik jech kʼuchaʼal li kʼejoj ta inglese. Laj yichʼik albel ti akʼo jechuk sjelubtasik jech kʼuchaʼal chkʼopojike, ti xkom noʼox ta joltike, ti akʼo jmojuk xbat xchiʼuk son kʼalal tskʼejintaike xchiʼuk ti teuk li kʼusi chal Vivliae.

Li kʼusi baʼyel laj yichʼ pasele jaʼ ti ta jujupʼel laj yichʼ jelubtasel li kʼusi chal ta inglese. Ta mas tsʼakale jun stestigo Jeova ti snaʼ smeltsanel kʼejoje jaʼ la smeltsan lek sventa alakʼuk yuni ba ta kʼejintael xchiʼuk ti oyuk smelolal ta aʼiele. Vaʼun li buchʼutik la sjelubtasike la skʼelik yan velta li sletraile sventa chakʼik venta mi xkoʼolaj kʼuchaʼal li kʼusi chal ta Vivliae.

Li stestigotak Jeovae xmuyubajik tajek la xchʼamik li achʼ kʼejoje. Jech xtok ep buchʼutik ti ta yan kʼop chkʼopojike yakal tsmalaik ta skʼop stukik.