«Tstij koʼonton, chakʼ jnopbe skʼoplal, toj kʼupil sba chkaʼi».

«Kuxul xa chkaʼi li kʼusi chalbe skʼoplal li Vivliae».

«¡Tstij koʼonton! Mas to batsʼi kuxul chkaʼi li kʼusi chal Vivlia avie».

Taje jechtik onoʼox chalik li buchʼutik chchikintaik li s-evanjelio Mateo ti pasbil xa gravare, oy xa ta pajina ta Internet ta inglés ta jw.org.

Ti baʼyel velta la spasik gravar Vivlia li stestigotak Jeovae jaʼ ta 1978. Ta tsʼakale, la spasik gravar ta jtob jeltos kʼopetik ta sliklej o ta jvokʼ noʼox li Vivlia taje.

Kʼalal laj yichʼ achʼubtasel li Vivlia ta 2013, laj yakʼik venta xtok ti skʼan pasel gravare. Pe mu xa xkoʼolaj kʼuchaʼal baʼyel ti oxvoʼ noʼox la spasik gravare, avie tspasik gravar mas ta mil krixchanoetik, yuʼun mas ta mil li buchʼutik chalbe skʼoplal Vivliae.

Kʼalal ep buchʼutik tspasik gravare, mas kuxul xa chilik loʼiletik ta Vivlia li buchʼutik chchikintaike. Pe maʼuk kʼuchaʼal audiodramaetik, yuʼun muʼyuk chkaʼitik chbakʼ li kʼusitik chkʼot ta pasele xchiʼuk muʼyuk sonal, pe mas xa melel chaʼiik li kʼusi chal Vivliae.

Kʼalal ep buchʼutik spasik gravare, skʼan lek xichʼ chapanel. Baʼyel tskʼelik lek buchʼu yakal chkʼopoj ta jujun loʼil, ti kʼusi skʼan xal li loʼile xchiʼuk ti kʼu yelan chaʼi sba li buchʼu chkʼopoje. Yuʼun xuʼ staik jun loʼil ti chkʼopoj junuk jtakbol ti muʼyuk jamal chakʼ ta aʼiel buchʼu junukal chkʼopoje. ¿Kʼusi tspasik mi jech la staike? Mi xchibet noʼox laj yilik ti kʼu yelan chkʼopoje, jaʼ tspas gravar li buchʼu tspasbe ye Tomase; pe mi laj yilik ti tstikʼ sba ta anil noʼox kʼalal chkʼopoj li ta loʼile, jaʼ tspas gravar li buchʼu tspasbe ye li Pedroe.

Jech xtok, skʼan kʼelel jayib sjabilal li buchʼu chalbe skʼoplal Vivliae. Chaʼvoʼ laj yichʼ saʼel sventa xichʼ pasbel gravar ye li jtakbol Juane, jun kʼalal kerem toʼoxe xchiʼuk jun kʼalal mol xaʼoxe.

Laj yichʼ tʼujel xtok buchʼutik lek xtojobik ta skʼelel vun. Jutuk mu skotoluk li buchʼutik chichʼik tʼujele te ch-abtejik li ta Betel yuʼun stestigotak Jeova ta Estados Unidose. Sventa xtʼujatike, ch-akʼbat xchapanik junuk parafo ta revista ¡Despertad!, vaʼun chaptaik. Jech xtok, ch-akʼbat skʼelik jaycholuk loʼil ta Vivlia ti bu skʼan xakʼ ta ilel ti kʼu yelan chaʼi sbae, ti chakʼ ta aʼiel ti kapem sjole, ti chat yoʼontone, ti xmuyubaje o ti chibajem chaʼi sbae. Vaʼun jech chakʼik venta mi xtojob lek li buchʼu tskʼel vune xchiʼuk ti bu junukal sta-o lek li yee.

Kʼalal albilik xa kʼusi tspasik gravare, ta jujuntal chkʼotik li bu tspasik gravar ta Brooklyn, Patterson o ta Wallkill. Li direktore jaʼ tskʼel ti stauk-o xchiʼuk ti lekuk yechʼomal ye li buchʼu tskʼel vune. Li direktore xchiʼuk li buchʼu tskʼel vune te chal ta svunik ti bu skʼan xpaj jlikeluke xchiʼuk ti bu sta-o xakʼbe lek snukʼilale. Li direktore tstunes xtok li Traducción del Nuevo Mundo ti pasbil xa onoʼox gravar ta voʼnee.

Jlom li kʼusitik muʼyuk lek lokʼe chichʼ meltsanel kʼalal yakal chichʼ pasel gravare. Yoʼ lek xlokʼe, li buchʼutik tspasvanik gravare tslokʼesik li kʼusi muʼyuk lek xbate, vaʼun tstsobik li kʼusitik lek laj yichʼ pasel gravare.

Mu to stakʼ naʼel kʼu to sjalil skʼan sventa xichʼ pasel gravar sjunul li Traducción del Nuevo Mundo ti lokʼ ta 2013. Pe mi tsuts spasel gravar jujun livroe, tsmuyesik ta jw.org, vaʼun te chvinaj ta xokon slokʼol Vivlia li jujun sbi livroetik ta Vivliae.