Li stestigotak Jeovae yakʼojik persa sventa xcholbeik mantal ta sbatsʼikʼopik li krixchanoetik ta Irlanda xchiʼuk ta Gran Bretañae. a Oy chkʼopojik ta inglés, pe oy jlome chkʼopojik ta gaélico escocés, galés xchiʼuk irlandés.

Li ta septiembre ta 2012, laj kachʼubtaskutik li jpajinakutik ta Internet sventa oyuk ta jeltos kʼopetike, avie oy xa ta irlandés xchiʼuk ta galés xtok. Lik yichʼ lokʼesel ta agosto ta 2014 li ta gaélico escocese. Jech xtok, ep ta tos vunetik chichʼ pasel imprimir li ta batsʼikʼopetik taje. ¿Kʼusitik lek kʼotem ta pasel ta skoj ti jech chichʼ pasele?

Oy jun jbabe ta jun relijion ti la stsak jun tratado ti chalbe skʼoplal Vivlia ta gaélico escocés kʼope, xmaxet likel yaʼlel sat kʼalal la skʼele. ¿Kʼu yuʼun? Yuʼun toj lek laj yil ti kʼu yelan jelubtasbile, jaʼ yuʼun xi laj yale: «Buchʼu la sjelubtas liʼe ¡Toj echʼ xa noʼox lek jelubtasbil!».

Te van 750 krixchanoetik och skʼelik ta gaélico escocés li pajina ta Internet li ta agostoe.

Oy jun maestro ta Universidad Nacional de Irlanda ta Galway ti laj yalbe stestigotak Jeova ti muʼyuk ta yoʼonton li relijione. Pe kʼalal laj yaʼi ti xuʼ skʼel ta irlandés li foyeto Li Vivliae, ¿kʼusitik chalbe skʼoplal?, la skʼan jlik. Laj yal ti skʼan la oyuk ta sbatsʼikʼop krixchanoetik skotol li vunetik lokʼemik ta Vivliae xchiʼuk la skʼupil kʼopta li stestigotak Jeova ti yakʼojik persa slokʼesel vunetik ta sventa li buchʼutik chkʼopojik ta irlandese.

Jun ants ti oy xa sjabilale toj lek laj yaʼi kʼalal akʼbat jun foyeto ta galés ti lokʼem ta Vivliae, yuʼun xi laj yale: «Jamal chkal avaʼiik ti muʼyuk van la jchʼam jechuk ti ta inglesuk li vun laj avakʼbeikune, pe toj lek laj kaʼi ti oy ta jkʼope».

Li ta agosto ta 2014, laj yakʼik mas vunetik ta galés li ta jw.org. Li vaʼ ue mas to ta oʼlol epaj ti buchʼutik ochik li ta jpajinakutik ta Internet sventa skʼelik li vunetik ta galese.

Jun velta kʼalal la xchapbe lek smelolal Tsʼibetik chaʼvoʼ yajchankʼoptak li Jesuse, xi laj yalik li jchankʼopetike: «¿Mi mu xtiltunuk koʼontontik kʼalal yakal chchiʼinutik tal ta loʼil ta bee, kʼalal lek tsʼakal tsjambutik tal smelolal li Tsʼibetike?» (Lukas 24:32). Kʼalal ta sbatsʼikʼop ch-albatik mantal li krixchanoetike, lek tsʼakal chjambat smelolal chaʼiik li Tsʼibetike, vaʼun chjelbat-o xkuxlejalik.

Jun vinik ta Gales ti Emyr sbie yikʼoj jun ants ti jaʼ stestigo Jeovae, pe mi jutebuk lek chilbe li srelijione. Ta tsʼakale muʼyuk xa chopol chil, yuʼun lik yamigoin sbaik xchiʼuk Russell ti jaʼ stestigo Jeovae. Xi laj yal Emyr ti kʼu yuʼun muʼyuk xa chopol chile: «Jaʼ to la stijbun koʼonton ta xchanel Vivlia kʼalal laj yakʼbun Russell li livro ¿Kʼusi chchanubtasvan ta melel li Vivliae? b Vaʼun xi laj yalbune: ‹Ta galés tsʼibabil li livro liʼe. Jaʼ xa me chlik jchantik un›». ¿Kʼu yuʼun ti kʼot tajek ta yoʼonton Emyr ti jech albat yuʼun Russelle? Xi laj yale: «Yuʼun koʼol jkʼopkutik, koʼol kʼusi nopem xkaʼikutik spasel, jaʼ yuʼun xkaʼibe jba jrasonkutik». Xkoʼolaj kʼuchaʼal xtiltun van laj yaʼi ta yoʼonton Emyr kʼalal chchapbat ta skʼop stuk li kʼusi chal Vivliae, yuʼun lek jamal smelolal laj yaʼi.

Li stestigotak Jeovae jech tskoltaik-o krixchanoetik sventa xchanbeik skʼoplal Dios ta skʼop stukik, yuʼun jaʼ chkʼot ta yoʼontonik.