Kʼalal chichʼ akʼbel klik ti bu chal: «SAʼO KʼUSI KʼOPAL» xie, li ta pajina liʼe te chvinaj mas ta oxib sien kʼopetik, ti kʼu yepal li kʼopetik taje muʼyuk bu jech chichʼ tael ta yan pajina li ta Internete.

Akʼo mi oy yantik pajinaetik ti yichʼoj ep kʼopetike, pe jaʼ mas to ep yichʼoj li jw.org. Jkʼelbetik junantik skʼelobil. Li ta julio ta 2013 li spajina Naciones Unidas oy ta vakib kʼopetik, li ta spajina Unión Europea yichʼoj 24 kʼopetik. Li spajina Google oy junantik ti yichʼoj 71 kʼopetike, li spajina Wikipedia xuʼ yichʼ tael kʼusitik ta 287 kʼopetik.

Kʼalal chichʼ pasel mas ta oxib sien kʼopetik junuk pajina ta Internete, ta melel skʼan tsots abtel xchiʼuk jal tajek yichʼoj. Ta sienal noʼox stestigotak Jeova ta spʼejel Balumil ch-abtejik ta sjelubtasel li ta kʼopetik taje, ti jaʼ sventa yichʼobil ta mukʼ Diose. Ta inglés chichʼ pasel skotol li kʼusitik oy ta pajinae, vaʼun li ta jujutos kʼope oy jtsop jelubtasej kʼopetik ti lek xtojobik xchiʼuk ti muʼyuk chichʼik tojel ti jaʼ tsjelubtas ta skʼop stukike.

Li ta jw.org oy ep kʼusitik ti yichʼoj jelubtasel ta mas ta 300 kʼopetike. Li ta jw.org oy mas ta 200,000 li kʼusitik oye, ta melel toj echʼ xa noʼox ep.

Maʼuk noʼox ti xuʼ xij-och li ta jw.org, yuʼun oy ep buchʼutik tskʼan ch-ochik xtok. Taje oy sprevail ta skoj ti slokʼesojbe slistail jun empresa ti Alexa sbie, yuʼun li empresa taje tskʼel kʼusitik pajinail ta Internet ti mas te ch-ochik li krixchanoetike. Li ta spajinaik ta Internet li empresa taje oy jun parte ti bu chal «Religion y espiritualidad» (Relijion xchiʼuk kʼusitik sventa mantal) ti te chakʼ ta ilel ti oy 87,000 pajinaetike, ti te spajinaik li relijionetik mas ojtikinbilike, li organisasionetike xchiʼuk li empresaetik ti jaʼ yabtelik spasel vunetik sventa relijione. Ti bu «Religion y espiritualidad» xie, li jw.org jaʼ li xchibal pajina ti bu mas ch-och krixchanoetik li ta julio ta 2013. Pe ti bu mas ch-ochike jaʼ ta spajina jun empresa ti bu xuʼ skʼelik ta jeltos kʼopetik Vivlia li krixchanoetike.

Li ta oktuvre ta 2013, jujun kʼakʼale ochik mas ta 890,000 krixchanoetik li ta jw.org ti jeltos kʼusitik tstunesik sventa ch-ochik ta Internete. Li kʼusi ta jkʼankutike jaʼ ti jechuk-o ta matanal staik aʼyejetik sventa Vivlia li buchʼutik tstunesik Internete.