Li ta junantik lum ti povreik noʼoxe muʼyuk mas ichʼbilik ta mukʼ li maʼsatetike. Ep buchʼutik ti muʼyuk chichʼik lek koltaele xchiʼuk pʼajbilik noʼox. Li maʼsatetike toj vokol chaʼiik spasel junantik abtelal akʼo mi kʼun noʼox chaʼiik li yantike. Jech kʼuchaʼal liʼe, toj vokol chaʼiik chbatik ta chʼivit, kʼalal chbatik ta autovuse xchiʼuk mu xtojobik stunesel takʼin. Jech xtok, ep buchʼutik mu xojtikinik ti kʼu yelan tsʼibabil li braile kʼope, jaʼ yuʼun mu snaʼik skʼelel. Akʼo mi oy buchʼutik ti snaʼik xchanel li brailee pe muʼyuk vunetik li ta skʼopike.

Pe li stestigotak Jeovae oy xa mas ta sien jabil yakal tslokʼesik vunetik sventa maʼsatetik ti lokʼemik ta Vivliae. Li achʼtik toe la stakik batel jun makina ta Países Bajos ta Malaui sventa tspasik imprimir xchiʼuk tspasik encuadernar vunetik li ta braile. Vaʼun xuʼ xa xichʼ lokʼesel vunetik ta braile li ta chichewa kʼope, ti jaʼ jun batsʼikʼop ta Malaui.

Li Leo, ti xtojob spasel vunetik ta braile, bat ta Malaui ti te lik batel ta Brasil ta Betel yuʼun stestigotak Jeovae. Kʼalal te xaʼox ta Malauie la xchanubtas voʼob stestigotak Jeova sventa xtojobik stunesel li makina ti laj yichʼ takel batele. Jech xtok la xchanubtas ta stunesel jun programa ta komputadora sventa xichʼ tsʼibael li vunetik ta braile, li programa taje jaʼ spasoj li stestigotak Jeovae. Sventa xtun li programae li ermanoetike la stsʼibaik skotol li letraetik ta chichewa kʼope xchiʼuk ti kʼu yelan ta tsʼibael li ta brailee. Li programa taje toj lek tstsʼiba li vunetike, jaʼ yuʼun kʼun ta chanel. Li avie, li maʼsatetik ti chkʼopojik ta chichewae oy xa vunetik ta skʼop stukik ta braile. Jkʼeltik batel kʼusi yalojik junantik stestigotak Jeova ti maʼsatetike.

Li Munyaradzi jaʼ jun tsebal ants ti ch-abtej ta jun programa sventa radio ti jaʼ yuʼun stuke. Jech xtok, chchʼak skʼakʼal 70 ora jujun u sventa chchanubtas ta Vivlia li slakʼnatake. Xi chale: «Chkichʼ xa onoʼox akʼbel li vunetik ta braile ta inglese, pe li avi ti oy xa kuʼun ta jkʼop jtuke, li mantaletike chkʼot ta koʼonton. Toj ep sbalil chkil ti tsots ch-abtejik xchiʼuk ti ep tslajesik takʼin li kermanotak [li stestigotak Jeovae] sventa tslokʼesik li vunetik ta braile ta jkʼop jtukutike. Ichʼbilunkutik lek ta mukʼ chkaʼikutik xchiʼuk muʼyuk chʼaybilunkutik ta jolal».

Li Francis, ti te nakal ta snorteal Malauie, persa oy buchʼu skʼan chkʼelbat li vunetik ta chichewa kʼope. Jaʼ yuʼun, kʼalal kʼot ta skʼob ta sba velta li vun ta braile ta chichewa kʼope, xi xmuyubaj laj yale: «¿Mi melel van o mi yakal chivaychinaj? ¡Mu jchʼun chkaʼi!».

Li Loyce chchol mantal ta tsʼakal ora. Kʼalal chakʼ chanubtasel ta Vivliae jaʼ tstunes li vunetik ta brailee, pe li buchʼu chakʼbe chanubtasele jaʼ tstunesik li vunetik ti maʼuk ta braile ti tspasik li stestigotak Jeovae. Ta skoj taje skoltaoj 52 ta voʼ krixchanoetik sventa sjel xkuxlejalik.

Li Leo, ti jaʼ stestigo Jeova ti laj xa onoʼox kalbetik tal skʼoplal ta slikebale, xi chale: «Chakʼbun tajek muyubajel kʼalal chkakʼbeik vunetik ta braile li maʼsatetike xchiʼuk kʼalal chkakʼ venta kʼu yelan chaʼi sbaik ti oy ta skʼop stukike. Ep buchʼutik chalik ti tstojbeik tajek ta vokol li Jeovae, yuʼun li vunetik taje chkoltaatik-o sventa xchapan sbaik ta tsobajel xchiʼuk ta cholmantal. Mu xa persauk ti oy buchʼu xkʼel batik li vunetike; li avie xuʼ xa xchan Svivlia stukik. Jech xtok mas xa kʼun ta koltael chaʼiik yutsʼ yalalik sventa xchʼiik ta mantal. Pe li kʼusi mas tsots skʼoplale, jaʼ ti chkoltaatik-o sventa xnopajik mas ta stojolal li Jeovae».