Oy van 290 jelubtasej kʼopetik ta México xchiʼuk ta Centro América ti te nakalik ta vakib mukʼta lumetike, tsjelubtasik vunetik lokʼem ta Vivlia ta mas ta 60 jeltos kʼopetik. ¿Kʼu yuʼun tsots chakʼ yipalik? Yuʼun kʼalal oy ta skʼopik krixchanoetik li vunetik lokʼem ta Vivliae mas xaʼibeik smelolal xchiʼuk mas chkʼot ta yoʼontonik (1 Corintios 14:9).

Sventa masuk to lek xbat yuʼunik ta sjelubtasele, junantik jelubtasej kʼopetik ti te toʼox oyik li ta Betel ta Mexicoe, laj yichʼik takel batel ti bu jech chkʼopojik li ta skʼopike. ¿Kʼuxi staojbeik sbalil? Li jelubtasej kʼopetike mas chchiʼinik ta loʼil li krixchanoetik ti jmoj skʼop xchiʼukike, vaʼun jaʼ jech mas kʼun chaʼiik ta sjelubtasel vunetik ti lek xkaʼitike.

¿Kʼu yelan chaʼi sbaik li jelubtasej kʼopetike? Jun jelubtasej kʼop ta Náhuatl ta Guerrero ti Federico sbie, xi chale: «Ti jutuk mu lajunebuk jabil te oyun ta Mexicoe kʼajomal jun utsʼ alalil la jta ti koʼol jkʼopkutik xchiʼuke. Pe ta skoj ti liʼ xa oy li ofisina bu chichʼ jelubtasel kʼope, ¡oy xa ep buchʼutik jech chkʼopojik!».

Karin ti tsjelubtas kʼop ta alemán bajo li ta ofisina bu chichʼ jelubtasel kʼop ta s-estadoal Chihuahua ta yosilal Mexicoe, xi chale: «Kʼalal nopol oyun ti bu nakalik li jmenonitaetike jaʼ skoltaojun sventa xkaʼi kʼu yelan chkʼopojik. Liʼ nakalunkutik xchiʼuk chi-abtejkutik ta jun uni bikʼit lume, kʼalal ta jkʼel lokʼel ta ventanae xkil lokʼel li buchʼutik tstabeik sbalil li vunetik ta jelubtaskutike».

Neyfi ti te xa nakal ta ofisina bu chichʼ jelubtasel kʼop ta Mérida ta yosilal Mexicoe, xi chale: «Kʼalal chkakʼkutik chanubtasel ta Vivlia ta mayae, te chkakʼkutik venta ti oy jpʼelantik kʼopetik ti mu xaʼiik leke. Jaʼ yuʼun ta jsabekutik smelolal sventa masuk xkʼot ta koʼontontik».

¿Kʼuxi tstabeik sbalil li buchʼutik tskʼelik li vunetik tsjelubtasike? Jkʼelbetik jun skʼelobil: Elena ti yichʼoj 40 jabil ti chkʼopoj ta tlapanecoe, chkʼotilan onoʼox li ta stsobajelik stestigotak Jeovae, pe ta skoj ti ta español ch-echʼ li tsobajele mu xaʼi li kʼusi chalike. Xi chale: «Ti kʼusi noʼox jnaʼoje jaʼ ti skʼan xibate». Pe kʼalal lik xchan jlik foyeto ta tlapanecoe lik skʼan mas li Jeovae, chʼi ta mantal, vaʼun laj yakʼ sba ta stojolal Jeova xchiʼuk laj yichʼ voʼ ta 2013. Xi chale: «Ta jtojbe ta vokol Jeova ti chakʼ xkaʼibe smelolal li kʼusi chal Vivliae».