LA SBAKʼES skʼobik li buchʼutik makal xchikinike, taje jaʼ senyail ti tstʼax skʼobik ta skoj ti xi laj yichʼ alele: «Jaʼ jun muyubajel chavaʼiik ti yakal chichʼ jelubtasel ta senya kʼop junantik li Tsʼibetik ta Hebreo Kʼope [Pokoʼ Testamento], xchiʼuk oy xa ta video skotol li slivroal Genesise».

Taje te laj yichʼ alel li ta slajeb mantal laj yichʼ etʼesel li ta voʼne Mukʼta Tsobajel ta oxib kʼakʼal tspasik stestigotak Jeova ta senya kʼop ta Estados Unidose.

Li ta sjabilal 2005 li stestigotak Jeovae lik sjelubtasik ta senya ta kʼop ta Estados Unidos li Traducción del Nuevo Mundo de las Santas Escrituras, te la slikesik ta Evanjelio yuʼun Mateo. Li ta sjabilal 2010 laj yichʼ jelubtasel ta senya kʼop skotol li 27 livroetik ti mas ojtikinbil kʼuchaʼal Achʼ Testamentoe.

Jech xtok, li stestigotak Jeovae sjelubtasojik xa jlom ta voʼob yantik senya kʼop li Vivliae.

¿Kʼu yuʼun ti jech tspasike? Yuʼun li stestigotak Jeovae snaʼojik ti jaʼ sventa buchʼutik snaʼ chkʼopojik li vunetik chlokʼe, pe ep li buchʼutik makal xchikinike mu xojtikinik. Pe kʼalal melel, jamal xchiʼuk kʼun ta aʼibel smelolal li Vivlia ta senya kʼope, ep li buchʼutik makal xchikinike xuʼ xaʼibeik smelolal li kʼusi chal Vivliae, vaʼun chchʼiesik li kʼu yelan chil sbaik xchiʼuk Diose. Jkʼeltik junantik kʼu yelan laj yaʼi sbaik kʼalal laj yichʼ Svivliaik ta skʼop stukike.

Xi laj yal jun kerem ti makal xchikine: «Kʼalal lokʼ ta senya kʼop li slivroal Mateo leʼ xa ta sjayibal jabile, laj kakʼ venta ti kʼu to yelan skʼanojun li Jeovae, pe mas to laj kakʼ venta ti skʼanojun kʼalal laj yichʼ jelubtasel li slivroal Genesise. Jnaʼoj ti ep kʼusitik yakal tspas Jeova sventa xuʼ xkojtikin mase».

Xi laj yal li kʼusi oy ta yoʼonton jun ants ti makal xchikine: «¡Jamalik tajek xchiʼuk tstij tajek oʼontonal li senya kʼope! Lik jkʼan ta melel li Vivliae. Jaʼ yuʼun laj kakʼ venta ti tskʼan ti akʼo jchanbe skʼop li Jeovae, ti akʼo jchan ti kʼu yelan snitoj sba tal li loʼiletike, ti akʼo jchan ta jujun versikuloe, taje jaʼ sventa xuʼ xkojtikin mas. Chkʼot kʼalal to ta yut koʼonton li yojtikinele xchiʼuk jaʼ tskoltaun sventa ta jambe koʼonton kʼalal oy kʼusi chkalbe li Jeovae».