Li stestigounkutik Jeovae ta jelubtaskutik ta jeltos kʼopetik li vunetik xchiʼuk yan kʼusitike. Li ta noviembre ta 2014, jelubtasojkutik xaʼox ta 125 jeltos kʼopetik li Vivliae xchiʼuk ta 742 jeltos kʼopetik li vunetik lokʼem ta Vivliae. Jech xtok, ta jelubtaskutik li videoetike. Leʼ tal ta enero ta 2015, lik yichʼ jelubtasel li video ¿Kʼu yelan li jtsobajelkutike?, vaʼun oy xa ta 398 jeltos kʼopetik, yan li video ¿Kʼu yuʼun skʼan jchantik li Vivliae? oy xa ta 569. ¿Kʼu yuʼun ti jech laj yichʼ pasele xchiʼuk kʼuxi laj yichʼ pasel?

Li ta marso ta 2014, li Jtsop Jbeiltasvanej yuʼun stestigotak Jeovae laj yalbe mantal li yan Beteletik ta spʼejel Balumile ti akʼo sjelubtasik ti bu kʼalal xuʼ yuʼunik ta jeltos kʼopetik li videoetike, taje jaʼ sventa stijbe yoʼonton krixchanoetik ti akʼo xchanik li Vivliae.

Ep kʼusitik skʼan pasel sventa xichʼ jelubtasel ta jeltos kʼopetik li jun videoe. Baʼyel, ta sjelubtasik kʼusi chichʼ alel li jelubtasej kʼopetike. Xchibal, ta sventa li buchʼutik chkʼopojik ta videoe tstʼujik buchʼutik ch-echʼ spasik gravar ti jaʼuk sbatsʼikʼopike. Yoxibal, li buchʼutik ch-abtejik ta spasel gravar audio xchiʼuk videoe tspasik gravar li yechʼomal eile, chchikintaik sventa tsmeltsanik xchiʼuk tstikʼbeik li sletrail ti chvinaj ta pantayae. Ta slajebal une, tspasik ta jmoj yoxtosal, vaʼun tsmuyesik ta jw.org kʼalal tsutsem xaʼoxe.

Junantik Betele oy yavil yuʼunik li bu tspasik gravare xchiʼuk xtok oy buchʼutik ti tojobtasbilik ta spasel li abtelal taje. Pe, ¿kʼuxi la spasik gravar li jeltos kʼopetik ti nom to bu oy li jnaklejetike xchiʼuk ti nom bu tsjelubtasike?

Ta spʼejel Balumil li buchʼutik ch-abtejik ta spasel gravar audio xchiʼuk videoe la stunesik yabtejebik ti stakʼ kuchel ti buuk noʼox chbatike. La stunesik jun mikrofono, jun komputadora ti stakʼ kuchel ti oy jun sprogramail ti tspas gravare, te tspasik gravar ta junuk ofisina, ta junuk Salon sventa Tsobobbail o ta jpʼejuk na. Vaʼun li buchʼutik jaʼ sbatsʼikʼopike jaʼ tspasatik gravar, chkomik ta direktor sventa gravasion xchiʼuk tskʼelik batel mi lek chkom. Kʼalal tsutsem xaʼox yuʼunik spasel gravar li buchʼutik ch-abtejik ta spasel gravar audio xchiʼuk videoe xchiʼuk ti lek xa skotole, chichʼ batel li yabtejebik sventa spasel gravare xchiʼuk chbatik ta yan jteklum xtok.

Ta skoj ti jech chichʼ pasele, mas xa epajem ti ta jeltos kʼopetik lokʼem li videoetike.

Kʼupil sba yilojik li videoetik taje. Yuʼun epal krixchanoe jaʼ to sba velta chilik ti oy kʼusi jelubtasbil ta sbatsʼikʼopike.

Li videoetik taje la spasik gravar ta pitiantiatiara kʼop, oy van mas ta 2,500 krixchanoetik ta Australia ti jaʼ sbatsʼikʼopike. Taje te la spasik gravar ta Alice Springs (Territorio del Norte). Xi chal Callan Thomas ti jaʼ koltavan ta spasel gravare: «Toj kʼupil sba chilik li videoetike. Solel chʼayem tajek yoʼontonik ta skʼelel li tavletae xchiʼuk te xjakʼlajetik jujulikel bu xuʼ staik mas videoetik. Ta skoj ti muʼyuk vunetik li ta pitiantiatiara kʼope labal sba tajek chilik ti oy kʼusi xuʼ xchikintaik ta sbatsʼikʼopike, pe mas to kʼalal tskʼelike».

Chaʼvoʼ stestigotak Jeova ta Camerune batik ta jun varko ta ukʼum ti muyeltike. Te pajik ta uni bikʼit lum ti bu nakalik pigmea krixchanoetike xchiʼuk la skʼoponik li bankilal tee ti jaʼ maestro ta eskuela xtoke. Laje laj yakʼik venta ti bassa sbatsʼikʼope, vaʼun li ermanoetike laj yakʼbeik yil ta stavletaik li video ¿Kʼu yuʼun skʼan jchantik li Vivliae? ti oy ta bassa kʼope. Labal sba tajek laj yil li bankilale xchiʼuk la skʼan komel jaylikuk vunetik.

Jun jnitvanej ta relijion ta uni bikʼit lum ta Indonesiae la xchikʼbe svunik li stestigotak Jeova ti spukojike, yuʼun skontrainoj tajek li stestigotak Jeovae. Yan jnaklejetik te xtoke chchikʼ ox la yaʼiik li Salon sventa Tsobobbaile. Jech xtok, chanvoʼ polisiae kʼotik ta sna jun ants ti jaʼ stestigo Jeova sventa oy kʼusitik chjakʼbat xchiʼuk li yutsʼ yalale. Li polisiaetike tskʼan tsnaʼik kʼusi chichʼ pasel li ta salone, vaʼun li ermanae laj yakʼbe yilik ta indonesio kʼop li video ¿Kʼu yelan li jtsobajelkutike?

Xi laj yal jun polisia kʼalal yilojik xaʼox li videoe: «Kakʼ xa venta ti ep kʼusi mu snaʼik ta atojolalik li krixchanoetike». Xi la sjakʼ yan polisia xtoke: «¿Mi xuʼ xavakʼbeikun sventa xkakʼbe yil yantik li video liʼe? Yuʼun li videoe chakʼ ta ilel kʼu avelanik ta melel». Muʼyuk xa chopol chil stestigotak Jeova li polisiaetike xchiʼuk avie chchabiik xa li stestigotak Jeovae.

Mi muʼyuk to aviloj li videoetike, ¿kʼu yuʼun mu xakʼel ta abatsʼikʼop?