Ta skoj ti ep tstunesik Vivlia li stestigotak Jeova ti ta lujo pasbil xchiʼuk ti lek pim spate, lik stunesik jun achʼ spasobil livroetik ta imprenta li ta Ebina, Japone.

Vokoltik jutuk li ta slikebale, yuʼun bat lus kʼalal echʼ nikel xchiʼuk li tsunami ta Japón ta 11 yuʼun marso ta 2011.

Akʼo mi jech, lik yichʼ tsakanel li makina ta septiembre ta 2011. Pe kʼalal mu to chlokʼ oxib ue yakal xa ch-abtej. Li kʼusi baʼyel laj yichʼ pasele jaʼ li Traducción del Nuevo Mundo ta chino kʼope.

Chanib sien metro snatil li makinae, pe mu persauk ti oy buchʼu tstijbe li jujutos yabtejebe, yuʼun te xa ch-abtej stuk. Baʼyuke, chichʼ pakʼel li julots vunetike, vaʼun tspas ta livroetik. Jech xtok, chichʼ akʼbel li spate, chichʼ puxel, mi laje chcholik. Vaʼun li ta stsutsebal xa makinae jaʼ te chichʼ tikʼel ta kaja li Vivliaetike, chichʼ pakʼbel lek li skajailtake, mi laje chichʼ latsel lek ta skajleb.

Sventa lek xkʼot ta pasel skotole la xchapan sbaik lek. Baʼyel la xpixik lek li makinae, la skʼejik lek xchiʼuk la stikʼik ta smukʼta aviltak ti 34 to ta pʼeje, vaʼun la stakik batel ta Japón ti te to lik tal ta Europae.

Lajunvoʼ betelitaetik ta Estados Unidos bat skolta sbaik ta spasel li abtelal ta Japone. Jlome vakib to u te pajik sventa chchanubtasik li buchʼutik tskʼelik xchiʼuk tspikik li makinae.

Toj labal sba laj yilik makina li buchʼutik ch-abtejik ta spasel vun xchiʼuk yantik ti ch-abtejik ta spasel livroetik li ta Japone. Jaʼ yuʼun li ta 19 yuʼun marso ta 2012 mas ta sien j-abteletik ta jeltos favrikaetik ay skʼelik kʼu yelan ch-abtej, toj yan to sba laj yilik.

Jaʼ yuʼun kʼalal tsutik xa batele kʼelanbat julik Svivliaik ta Traducción del Nuevo Mundo ti te xa laj yichʼ pasel ta achʼ spasobil livroetike.

Vaʼun li Japón, li Estados Unidos xchiʼuk li Brasile jmoj xa tspasik Vivlia ti pim spat ta sventa li stestigotak Jeovae.

Xmuyubajik tajek ti jmoj abtejik li stestigotak Jeova xchiʼuk li buchʼutik ch-abtejik ta junuk empresa ti la skolta sbaik ta sventa taje. Xi laj yal jun j-abtele: «Kutsʼ kalaloxuk xa chkaʼi».

Kʼalal tsuts xaʼox stsʼakel li makinae, xi laj yal jun j-abtel ti maʼuk stestigo Jeovae: «Mas xa tsots chkaʼi mi bat jpas yan abtelale, yuʼun jnaʼoj ti muʼyuk bu jech jun yoʼonton ch-abtejik kʼuchaʼal ch-abtej li Watchtowere».