Ta 1987, li ermano Lyman Swingle ti tun toʼox li ta Jtsop Jbeiltasvanej yuʼun stestigotak Jeovae la sjelubtas mantal kʼalal te tsobol 63,580 krixchanoetik li ta Plaza de Toros Monumental ta Valencia (Venezuela). Ep li buchʼutik te oyike sjunul akʼobal xanavik batel ta autovus sventa chaʼiik li mantal tsjelubtas li ermanoe. Xi laj yalbe buchʼutik te oyik li ermano Swinglee: «Maʼuk xa noʼox ti uni jayvoʼoxuke, yuʼun lek xa epoxuk. Chkile poʼot xa xakʼotik ta 100,000 jcholmantaletik».

Ta Venezuelae oy toʼox mas ta 38,000 jcholmantaletik li ta 1987, jaʼ xkaltik, mas ta 38,000 stestigotak Jeova ti chalbeik skʼoplal li Ajvalilal yuʼun Diose. Li vaʼ jabile kʼajomal toʼox vaxakib lumetik ti oy mas ta 100,000 jcholmantaletik yuʼune.

Labal sba ti kʼu yelan epajem tal li stestigotak Jeova ta spʼejel Balumile. Kʼalal echʼem xaʼox li Baʼyel Mukʼta Paskʼop ta spʼejel Balumile, jaʼ noʼox uni jaymil toʼox ti chcholbeik skʼoplal li Ajvalilal yuʼun Diose. Pe taje mu xa jechuk. Li 1943 Yearbook of Jehovahʼs Witnesses (Anuario de los testigos de Jehová de 1943) xi laj yale: «Jaʼ skʼelobil ti yakʼojbutik sbendision Dios ti kʼu yelan li yaʼyejal ta 1942, manchuk mi muʼyuk lek tsʼakal ta skoj ti chʼabal toʼox lek kʼuxi xuʼ skʼopon sbaike [...]; chakʼ ta ilel ti avie oy xa mas ta 106,000 jcholmantaletik ta spʼejel Balumil [ti chalbeik skʼoplal li lekil aʼyeje]». Akʼo mi jaʼo yakal li Xchibal Mukʼta Paskʼop ta spʼejel Balumile ep krixchanoetik kʼotik ta stestigo Jeova. Ta 1950, mas xaʼox ta 100,000 jcholmantaletik li ta Estados Unidose.

Yan lum ti kʼotik ta 100,000 jcholmantaletik xtoke jaʼ li Nigeriae, ta 1974.

Li ta 1975, mas xaʼox ta 100,000 jcholmantaletik li ta Brasil xchiʼuk Alemaniae. Jaʼ yuʼun, epaj stestigotak Jeova ta chanib kontinente ti jaʼ skʼelobil ti lek chaʼiik mantal li krixchanoetik ta buyuk noʼoxe.

Ta spʼejel Balumil epaj-o talel li stestigotak Jeovae, taje jech kʼotem ta pasel li kʼusi yaloj xa onoʼox Vivlia liʼe: «Acʼo me toj jutebic, pero chcʼot cʼalal ta jmil; acʼo me solel muʼyuc epic, pero chcʼot ta jun mucʼta lum. Vuʼun li Mucʼul Diosune, ta xcacʼ cʼotuc ta pasel ta ora noʼox cʼalal me la sta scʼacʼalile» (Isaías 60:22).

Li ta yaʼyejal kabteltik ta 2014, chakʼ ta ilel ti oy xa mas ta 100,000 stestigotak Jeova ta jujun li 24 lumetike. Taje te xa tsakal skʼoplal li Venezuelae, yuʼun kʼotik mas ta 100,000 li ta 2007. Ta spʼejel Balumile oy 115,416 stsobobbailik li stestigotak Jeovae xchiʼuk oy 8,201,545 jcholmantaletik.