Li ta Feria Internacional del Libro ta Toronto ta Canadae, te laj yichʼ akʼel ta ojtikinel livroetik ti pasbil imprimire o ti jaʼ noʼox ta jun tavleta, komputadora o ta yan kʼusitik ti stakʼ kʼelele. Ti bu laj yichʼ pasele jaʼ ta Centro Metropolitano de Convenciones ta skʼakʼalil 13 kʼalal ta 16 yuʼun noviembre ta 2014, mas ta 20 mil krixchanoetik ay skʼelik.

Li buchʼutik laj yakʼik ta ilel li vunetike, te oyik ek li stestigotak Jeova ti alakʼik sba xvinaj ti bu laj yakʼ svunike xchiʼuk baxbol noʼox tajek ti kʼu yelan chakʼik ta ilele. Te yakʼojik tavletaetik sventa xchanubtasik kʼuxi xuʼ x-ochik ta jw.org li buchʼutik chkʼot skʼelike.

Jun ti buchʼu jbabe ta sventa li feria taje xi laj yale: «Li apajinaike toj achʼik li programa tstunese. Li buchʼutik tspasik livroetike skʼan skʼelik jechuk kʼu yelan chavakʼik ta ilel li avunike». Ep ti buchʼutik ay skʼelike laj yalik ti toj alakʼ sba xvinaj xchiʼuk kʼun ta tunesel li jw.org, li ta pajinae xuʼ te staik li sjakʼobiltak ti tsotsik skʼoplale. Lek laj yilik xtok ti te chal kʼuxi xuʼ xchapan skʼopik xchiʼuk kʼuxi xuʼ sta spatobil yoʼonton li krixchanoetike.

Li stestigotak Jeova ti jaʼ la xchabiik li vunetik laj yichʼ akʼele laj yakʼik venta ti jutuk mu skotolikuk li buchʼutik ay skʼelike muʼyuk ochemik-o li ta jw.org. Jutuk mu skotolikuk la xchʼamik li uni tarjeta sventa xojtikinik li stestigotak Jeovae o li tratado ¿Dónde hallar respuestas a las grandes cuestiones de la vida? Jech xtok, ep buchʼutik laj yalik ti ta x-ochik yan velta li ta jw.org, li yantik xtoke la skʼanik ti oyuk buchʼu xbat vulaʼanatikuke.

Li ta feria taje, li ta viernese, jaʼo kʼot yorail li skʼinal ololetike. Li stestigotak Jeovae laj yakʼik ta ilel li video pizarra animada ta jw.org. Epal jchanunetik xchiʼuk maestroetik te vaʼi skʼelik li videoe.

Jun vinik ti likem ta Chicago ti ch-abtej ta jun empresa ti bu tspasik imprimir Vivliaetike la skʼupil kʼopta stestigotak Jeova ta skoj ti lek la kʼu yelan spasojik li Traducción del Nuevo Mundo de las Santas Escrituras. Vaʼun la skʼan jlik uni tarjeta sventa xchiʼin ta loʼil li buchʼutik la spasik li Vivliae.

Oy mas ta vukub sien kʼopetik li jpajinatike. Li buchʼutik ayik li ta feriae laj yilik ta vaklajuneb kʼopetik: amárico, bengalí, chino, coreano, español, francés, griego, gujarati, hindi, inglés, portugués, sueco, tamil, tigriña, urdu xchiʼuk ta vietnamita.

Jun stestigo Jeova ti jaʼ la xchabi li vunetik ta feriae laj yakʼ venta ti jaʼ mas lek mi laj yakʼik ta ilel kʼuxi xuʼ x-ochik ta jpajinatike, jaʼ mu sta mi jaʼ noʼox laj yichʼik albel skʼoplale. Xi laj yale: «Ep tajek laj yichʼ tabel sbalil sventa xichʼ pukbel skʼoplal li jw.org».