Ta smilal noʼox krixchanoetik ayik li ta Feria Internacional 2014 ti jaʼ te la spasik ta Ruán, ti te xkom ta snorteal Franciae. Te laj yilik jun kʼupil sba yavil vun ti xi sbie: «Ti kʼu toʼox yelan li Vivlia ta voʼnee, li avie xchiʼuk ti kʼu yelan ta jelavele».

Li ta yochebal ti bu akʼbil li yavil vunetike te chichʼ akʼel ta ilel ta television jun video ti jaʼ chalbe skʼoplal li voʼneal tsʼibetike. Li buchʼutik nopajik ta skʼelel li video ti bu akʼbil li yavil vunetike, laj yilik ti yichʼoj talel lekil beiltaseletik li Vivliae, ti lek tukʼ chalbe skʼoplal li kʼusitik kʼotemik ta pasel ta voʼne, ti jaʼ jech chal li kʼusitik staojik ta sabel skʼoplal li sientifikoetik xchiʼuk ti ep tajek pukbil batele.

Ti bu akʼbil li yavil vunetike te chakʼ iluk xtok ti kʼuxi kuchem-o tal yuʼun li Vivlia kʼalal to ta jkʼakʼaliltik xchiʼuk ti kʼusi pasbil sventa oyuk yuʼunik ta smiyonal xa noʼox krixchanoetik ti xuʼ staik ta jaytosuk formatoe, ti oy pasbil imprimir o ti xuʼ syalesik ta selular o ta yan kʼusitike. Li buchʼutik ay skʼelik li yavil vunetike laj yichʼik akʼbel ta moton jujulik Svivliaik ti jaʼ li Traducción del Nuevo Mundo, ti pasbil yuʼun stestigotak Jeova ta mas ta 120 jeltos kʼopetike.

Li buchʼutik ay skʼelik li vunetike la stojik ta vokol li kʼusi la spasik li stestigotak Jeovae, ti laj yakʼik Vivliaetik ti xuʼ xichʼik batel li krixchanoetike. Jun maestra ti ay xchiʼuk jayvoʼ kerem tsebetik ti bu yakʼojik vunetik li stestigotak Jeovae, xi laj yale: «Li Vivliae jaʼ jrextotik. Jaʼ jlik vun ti oy sjuʼele. Kʼalal ta jkʼel jujukoje, te ta jtabe xchapanobil li jvokoltake.

Jun ants ti 60 sjabilale toj labal to sba laj yil ti xuʼ stsak ta moton li Vivliae, vaʼun xi laj yale: «Toj lek ti jkotoltikuk jchantike, yuʼun chtun tajek kuʼuntik».