Li stestigotak Jeovae echʼ s-asambleaik ti stuk noʼox jech echʼ li ta Brasil, Costa Rica, Hong Kong, Irlanda, Israel, Nueva Zelanda xchiʼuk ta Suecia. Li baʼyel asambleae echʼ ta Suecia ta julio ta 2012, yan li oxib xa slajebe echʼ ta Costa Rica xchiʼuk ta Nueva Zelanda ta enero ta 2013.

Jech onoʼox kʼuchaʼal ch-echʼ li ta yan asambleaetik tspasik jujun jabil ti oxib kʼakʼal chjalij ti jech nopem xaʼiik spasel li stestigotak Jeovae, ch-echʼ mantaletik, chakʼik ta ilel skʼelobiltak xchiʼuk ch-echʼ dramaetik.

Li vaʼ asambleaetike ayik krixchanoetik ti likemik talel ta yantik lumetike. Kʼalal mu toʼox chlik xchiʼuk kʼalal echʼem xaʼox li asambleae ikʼatik batel ta yojtikinel li kʼusitik alakʼik sba ti baʼyel xa onoʼox xchapanojike.

Xi laj yal jun li buchʼu ay ta Brasile: «Kʼot tajek ta koʼonton kʼalal laj kil ti skʼanoj sbaik xchiʼuk ti lek xchʼamvanik li ermanoetike. Xkoʼolaj ta anil noʼox epaj yaʼel li kutsʼ kalale».

Xi laj yal jun li buchʼu ay ta Hong Kong xtoke: «Kʼot tajek ta koʼonton kʼalal laj kil ti laj yichʼik li achʼ vunetik ta mandarín kʼope, xnochʼanoj ta stiʼ yoʼontonik ti ch-okʼik xa ta muyubajel li ermanoetike».

Skotol jabil ch-echʼ yuʼunik mukʼtik asambleaetik ta spʼejel Balumil li stestigotak Jeovae. Ta smiyonal noʼox li buchʼutik te chkʼotike.

Li buchʼutik chbatik li ta asambleae tskʼupinik tajek ti oy kʼanbail, muyubajel xchiʼuk jun oʼontonal ti jech ojtikinbilik-o li yajtsʼaklomtak Cristoe. Jaʼ jech chkʼot ta pasel li ta asambleaetik ti stuk noʼox jeche xchiʼuk li ta internasionale. Li ta oʼlol kʼakʼale chchiʼin sbaik ta loʼil sventa tspatbe sba yoʼontonik, jmoj chveʼik, oy kʼusi tskʼelanbe sbaik, chakʼbe sba snumeroal selularik, tslokʼta sbaik xchiʼuk xmuyubaj noʼox tsmey sbaik.

Jech kʼuchaʼal li ta yan asambleaetike lek chchʼamik xtok li buchʼutik maʼuk stestigotak Jeova ti chbatik ta asambleae.